"საქართველოს ადვოკატთა ასოციაციის" თავმჯდომარე ზაზა ხატიაშვილი თბილისის საქალაქო სასამართლოს თავმჯდომარეობის კანდიდატად გიორგი მიქაუტაძის წარდგენას ეწინააღმდეგება და აცხადებს, რომ მოსამართლე, რომელმაც სავარაუდოდ ჩაიდინა სისხლის სამართლის დანაშაული, სასამართლოს თავმჯდომარე არ უნდა იყოს.
ამ განცხადებას თბილისის საქალაქო სასამართლო მოსამართლის დისკრედიტაციად აფასებს და აცხადებს, რომ ზაზა ხატიაშვილის განცხადება პროვოკაციულია, რომელიც მიზნად საზოგადოების შეცდომაში შეყვანას ისახავს.
კერძოდ, ადვოკატთა ასოციაციის თავმჯდომარე გიორგი მიქაუტაძეს გადაწყვეტილების შეცვლაში ადანაშაულებს. ხატიაშვილის თქმით, მიქაუტაძემ სავარაუდო სისხლის სამართლის დანაშაული ჩაიდინა.
ზაზა ხატიაშვილმა დღეს ჟურნალისტებთან იმ გადაწყვეტილებაზე ისაუბრა, რომელიც გიორგი მიქაუტაძემ 2015 წლის 28 აპრილს გამოიტანა.
კერძოდ, ხატიაშვილმა განმარტა, რომ ადვოკატთა ასოციაციაში გაწევრიანებაზე ადვოკატთა ასოციაციის აღმასრულებელმა საბჭომ მოქალაქე რობერტ გრიგალაშვილს უარი უთხრა. საბჭოს გადაწყვეტილების შესახებ ხატიაშვილმა გრიგალაშვილს წერილობით აცობა. გრიგალაშვილმა კი ეს წერილი საქალაქო სასამართლოში გაასაჩივრა. როგორც ხატიაშვილი ამბობს, მოსამართლე გიორგი მიქაუტაძემ საქმის განხილვის შემდეგ ბათილად ცნო არა საბჭოს გადაწყვეტილება, არამედ, ხატიაშვილის წერილი, დასაბუთებულ ნაწილში კი შეცვალა და ბათილად სცნო საბჭოს გადაწყვეტილება, რაც ადვოკატთა ასოციაციის ხელმძღვანელის თქმით, მნიშვნელოვანი დარღვევაა.
ამ თემაზე ხატიაშვილმა პროკურატურას და იუსტიციის საბჭოს მიმართა, თუმცა, როგორც ის ამბობს, ამას რეაგირება არ მოჰყოლია.
"ნიშანდობლივია, რომ თბილისის საქალაქო სასამართლოში 2015 წლის 28 აპრილს გამართული სასამართლო პროცესზე რობერტ გრიგალაშვილის სარჩელის განხილვისას, რომელიც ეხებოდა მისი ადვოკატთა ასოციაციაში გაწევრიანებაზე უარის თქმის შესახებ საქართველოს ადვოკატთა ასოციაციის გადაწყვეტილების ბათილად ცნობას, მოსამართლე გიორგი მიქაუტაძემ გამოაცხადა სასამართლო გადაწყვეტილების სარეზოლუციო ნაწილი, ხოლო მხარეთათვის გადაცემულ დასაბუთებულ გადაწყვეტილებაში ასახა სულ სხვა მოტივირებული გადაწყვეტილება", _ აცხადებს ხატიაშვილი.
მისივე თქმით, მან 2015 წლის 23 ივნისს ოფიციალურად მიმართა საქართველოს მთავარ პროკურორს გიორგი ბადაშვილს მოსამართლე გიორგი მიქაუტაძის მხრიდან განხორციელებულ ქმედებასთან დაკავშირებით, რომელიც სავარაუდოდ შეიცავს საქართველოს სისხლის სამართლის კოდექსის 332-ე და 341-ე მუხლით გათვალისწინებული დანაშაულის ნიშნებს.
როგორც ხატიაშვილი ამბობს, მსგავს გადაცდომასთან დაკავშირებით იუსტიციის უმაღლეს საბჭოსაც უკვე ჰქონდა მიღებული გადაწყვეტილება, რის გამოც კონკრეტული მოსამართლეები დაისაჯნენ. თუმცა, ეს გიორგი მიქაუტაძის შემთხვევაში არ მომხდარა, მიუხედავად იმისა, რომ ხატიაშვილმა გარდა მთავარი პროკურორისა, წერილით იუსტიციის უმაღლესი საბჭოს მდივანსაც მიმართა.
"მიქაუტაძის მხრიდან ჩადენილია სავარაუდო სისხლის სამართლის დანაშაული და არ შეიძლება ის ადამიანი დაინიშნოს საქალაქო სასამართლოს თავმჯდომარედ, რომლის მიმართაც არსებობს უტყუარი მტკიცებულებები, რომ მან გადაწყვეტილება შეცვალა. მოსამართლე მიქაუტაძემ გამოაცხადა ერთი გადაწყვეტილება და ბათილად სცნო ჩემი წერილი, და 2 კვირის შემდეგ, როდესაც ჩაგვაბარა გადაწყვეტილება, სულ სხვა რამ ჩაწერა და ბათილად სცნო არა მხოლოდ ზაზა ხატიაშვილის წერილი, არამედ აღმასრულებელი საბჭოს 12 წევრის გადაწყვეტილება. მიზანი იყო, დაეფარა სავარაუდო სისხლის სამართლის დანაშაული იმიტომ, რომ მას არ უნდა ეცნო წერილი ბათილად," _ განაცხადა ზაზა ხატიაშვილმა და დასძინა, რომ თბილისის საქალაქო სასამართლოს თავმჯდომარის თანამდებობაზე მიქაუტაძის წარდგენა "ამაზრზენი ფაქტია".
"სახელმწიფოში სამართლებრივი კრიზისის პირობებში მოსამართლის თანამდებობისთვის შეუფერებელი პირის წარდგინება ლახავს სამართლიანი სასამართლოს ძირითად უფლებას და ძირს უთხრის ქვეყანაში კანონის უზენაესობის პრინციპს", _ აცხადებს ხატიაშვილი.
ამ განცხადებას თბილისის საქალაქო სასამართლო მოსამართლის დისკრედიტაციად აფასებს და აცხადებს, რომ ზაზა ხატიაშვილის განცხადება პროვოკაციულია, რომელიც მიზნად ისახავს საზოგადოების შეცდომაში შეყვანას.
"საქმე ეხება ადვოკატთა ასოციაციაში გაწევრიანებაზე პირისთვის უარის თქმის შესახებ ასოციაციის მიერ მიღებულ გადაწყვეტილებას, რომელიც თბილის საქალაქო სასამართლოს ადმინისტრაციულმა კოლეგიამ ბათილად ცნო. განხილული საკითხის მიმართ ჩამოყალიბებულია ერთიანი სასამართლო პრაქტიკა, რაც ასახულია სასამართლოს არაერთ კანონიერ ძალაში შესულ გადაწყვეტილებაში, რომლის საფუძველზეც სამივე ინსტანციის სასამართლომ გააუქმა ადვოკატთა ასოციაციის გადაწყვეტილებები, კონკრეტული პირების ასოციაციაში გაწევრიანებაზე უარის თქმის შესახებ.
ტექნიკური ხარვეზი, რომელზეც ხატიაშვილი მიუთითებს, შესაბამისი სამართლებრივი საფუძვლებით გასწორდა შემაჯამებელ გადაწყვეტილებაში. ზოგადად, ტექნიკური ხარვეზი სამუშაო პროცესის ნაწილია, რომლისგან არცერთი მოსამართლე დაზღვეული არ არის, მით უფრო მსგავსი ხარვეზის გასწორების საფუძვლებს საპროცესო კანონმდებლობა ითვალისწინებს.
აქვე საზოგადოებას მოვახსენებთ, რომ მოსამართლე მიქაუტაძის მიერ მიღებული გადაწყვეტილება თბილისის სააპელაციო სასამართლომ და საქართველოს უზენაესმა სასამართლომ ძალაში უცვლელად დატოვეს.
სასამართლო განმარტავს, რომ აღნიშნულ საქმეში საქართველოს ადვოკატთა ასოციაცია იყო მოპასუხე მხარე და შესაბამისად, ასოციაციის წინააღმდეგ მიღებულ გადაწყვეტილებაზე ზაზა ხატიაშვილის უკმაყოფილება სუბიექტური და ტენდენციურია", _ აცხადებენ სასამართლოში.
