პერსონალურ მონაცემთა დაცვის ინსპექტორის თამარ ქალდანის შეფასებით, კვლავ პრობლემად რჩება პერსონალურ მონაცემთა დამუშავების პრინციპების დაუცველობა.
ამის შესახებ ქალდანმა ჟურნალისტებს პარლამენტის იურიდიულ საკითხთა კომიტეტის დაწყებამდე განუცხადა, სადაც მან პერსონალურ მონაცემთა დაცვის მდგომარეობის და ინსპექტორის საქმიანობის შესახებ ყოველწლიური ანგარიში წარადგინა.
"მთავარ პრობლემად რჩება მონაცემთა დამუშავების პრინციპების დაუცველობა. ხშირად ადგილი აქვს იმაზე მეტი მოცულობის ინფორმაციის დამუშავებას, ვიდრე ეს კანონიერი, ლეგიტიმური მიზნებისთვის არის საჭირო. ხშირად ორგანიზაციებს უჭირთ იმ საფუძვლის იდენტიფიცირება, რის საფუძველზეც მონაცემთა დამუშავებას უნდა ახორციელებდნენ. კვლავ პრობლემატურია მოძველებული ინფორმაციის ინტერნეტსივრცეში ხელმისაწვდომობა, რაც არაერთ მოქალაქეს უქმნის პრობლემას. ასევე საკითხი ეხება მონაცემთა ბაზების დუბლირებას და განუახლებლობას", _ განმარტა ქალდანმა.
კერძოდ კი, პერსონალურ მონაცემთა დაცვის ინსპექტორის 2015 წლის ანგარიშში აღნიშნულია, რომ 2015 წელს სამართალდამცავ ორგანოებზე ზედამხედველობის სამმართველომ განახორციელა 20 ინსპექტირება, რომელთაგან 6 შეეხებოდა ფარული საგამოძიებო მოქმედებების აღრიცხვისა და ელექტრონული კომუნიკაციების კომპანიების მიერ მოწოდებული ინფორმაციის ანალიზის შედეგად გამოვლენილ შესაძლო დარღვევის ფაქტებს, კერძოდ, საქართველოს შინაგან საქმეთა სამინისტროს საგამოძიებო ორგანოებისა და ელექტრონული კომუნიკაციის კომპანიების მიერ ელექტრონული კომუნიკაციის მაიდენტიფიცირებელი მონაცემების კანონით დადგენილი წესის დარღვევით დამუშავებას.
ანგარიშის მიხედვით, ადგილი ჰქონდა შსს-ს ტერიტორიული ორგანოების მხრიდან ისეთი ელექტრონული მაიდენტიფიცირებელი მონაცემების გამოთხოვას, როგორიცაა ტელეფონის ნომერი, იმეიკოდი, კომპანიის ქსელში ჩართული კონკრეტული სიმბარათის მფლობელის დემოგრაფიული მონაცემები, იმ ტელეფონის იმეიკოდის მონაცემები, რომელშიც ტელეფონის ნომერიიყო გააქტიურებული და ასევე, კონკრეტული სიმბარათის გარდა, იმ სიმბარათის მონაცემები, რომელიც გააქტიურდა დანაშაულებრივი გზით მითვისებულ მობილურ ტელეფონში.
პერსონალურ მონაცემთა დაცვის ინსპექტორი მიუთითებს, რომ აღნიშნულ ორგანოებს იმეიკოდის მეშვეობით შეუძლიათ არაპირდაპირი გზით განახორციელონ ფიზიკური პირის შემდგომი იდენტიფიცირება.
ანგარიშის თანახმად, მიუხედავად იმისა, რომ 2015 წელს გამოვლინილი 6 სამართალდარღვევის ფაქტზე ორთვიანი ხანდაზმულობის ვადის გამო ადმინისტრაციული სახდელის დადება ვერ მოხდა, ინსპექტორის გადაწყვეტილებით, შსს-ს და ელექტრონული კომუნიკაციის კომპანიას დაევალათ ელექტრონული კომუნიკაციის მაიდენტიფიცირებელი მონაცემების მხოლოდ კანონით განსაზღრული წესით დამუშავება და აღმოიფხვრა ელექტრონული კომუნიკაციის მაიდენტიფიცირებელი მონაცემების მხოლოდ წერილის საფუძველზე გამოთხოვის კანონშეუსაბამო პრაქტიკა.
ამავე თემაზე:
რამდენი ორგანიზაცია დააჯარიმა პერსონალურ მონაცემთა დაცვის ინსპექტომა
რა სამართალდარღვევები გამოავლინა პერსონალურ მონაცემთა დაცვის ინსპექტორმა შსს-ში
სარეკლამო მესიჯების გაგზავნისთვის ორგანიზაციები დაჯარიმდნენ
„ორგანიზაციები ვიდეოთვალთვალს უკანონო მიზნებისთვის იყენებენ“
