2015 წლის 29 ნოემბერს, საქართველოს სახელმწიფო უსაფრთხოების სამსახურის კონტრტერორისტული ცენტრის მიერ წარმოებული საგამოძიებო ღონისძიებების საფუძველზე, ოზურგეთის მუნიციპალიტეტის დაბა ნასაკირალში, ყველა მითითებულ მისამართზე ჩხრეკა ჩატარდა. ჩხრეკის შედეგად 4 პირის საცხოვრებელი სახლებიდან ამოიღეს იარაღი, ხელყუმბარები, საბრძოლო ვაზნები და ცილინდრული ფორმის ყუმბარები, ნოუთბუქები, ინფორმაციის მატარებელი ელექტრონული მოწყობილობები, CD და DVD დისკები, ისლამური სახელმწიფოს დროშები, სიმბარათები.
"გურია ნიუსთან" საუბრის დროს ერთ-ერთი დაკავებულის, მირიან ბერიძის დედა, ნათელა ბერიძე ამბობს, რომ ამ დრომდე სამჯერ გადაიდო სასამართლო პროცესი და ოთხი დაკავებულის საქმეს გრიფით საიდუმლო ადევს.
"ოთხი თვეა სასამართლო პროცესი არ გამართულა. გადავწყვიტეთ, რომ ოთხივე დაკავებულის მშობლები შევხვდეთ სახალხო დამცველს. იმედია, ის მაინც დაგვეხმარება", _ ამბობს ჩვენთან საუბრის დროს ნათელა ბერიძე.
ბერიძის თქმით, ადვოკატის საშუალებით ხდება პროკურატურასთან ურთიერთობა. სასამართლო პროცესი კი უკვე მესამედ გადაიდო და ახლა აპრილში არის ჩანიშნული. მისივე თქმით, დაკავებულებს დანაშაული ჩაუდენიათ:
"ბიჭებს დანაშაული არ ჩაუდენიათ და გრიფი _ "საიდუმლო" რატომ ადევს საქმეს, გაუგებარია. ჩემი შვილი სტუდენტია, ბათუმში სწავლობდა შოთა რუსთაველის სახელობის უნივერსიტეტში. მორწმუნე ბიჭია. ყველა მეკითხება, იყო თუ არა მორწმუნეო? ვერ გამიგია, რატომ მეკითხებიან ამას _ ყველა მორწმუნეა, ყველას სწამს ღმერთი.
სირიაში წასული ბიჭებიდან ერთ-ერთი ჩემი ძმისშვილია _ მამუკა ანთაძე. იგი ხანდახან უკავშირდებოდა ჩემს შვილს და ამის გამო აიყვანეს. ხომ იციან, რომ ეს ბიჭები არაფერ შუაში არიან?! სიმართლე გვინდა დამტკიცდეს და ვითხოვთ ყველას ჩართვას, ვისაც შეუძლია ყურადღება მოგვაქციოს.
ჩემი შვილი დაკავებამდე ერთი კვირა სასწავლებელში არ წასულა _ მანდარინის კრეფაში გვეხმარებოდა. ბათუმში წასვლის წინა დღეს დააკავეს. არანაირი ჩხრეკა არ მომხდარა, მხოლოდ კარადების კარებს გამოაღებდნენ და დახურავდნენ. კითხულობდნენ, მირიანის ოთახი რომელიაო. ნამდვილად ვერ ვიფიქრებდი, რამეს თუ ჩადებდნენ, რადგან სამართლიანობის ყოველთვის მჯეროდა _ სამწუხაროდ, შევცდი.
ჩვენ ვართ მორწმუნეები, ვართ ქართველები და გვინდა აქ ცხოვრება. ჩემს შვილს კარიერაც დაენგრა. ერთი თხოვნა მაქვს ყველასთან, ნუ დასჯიან ამ ბიჭებს სარწმუნოების გამო. სამწუხაროდ, მთელ მსოფლიოში ისლამი გაიგივდა ტერორიზმთან. გამორიცხულია, მორწმუნე ადამიანმა ბომბი შემოიკრას წელზე და ამდენი ხალხი ააფეთქოს", _ გვითხრა ნათელა ბერიძემ.
მერი ვანაძე, ერთ-ერთი დაკავებულის, ჯამბულ აბდულაევის დედაა. ისიც აპირებს, სახალხო დამცველთან შეხვედრას: "ჩემი შვილი 23 წლისაა, უფროსი შვილი 2013 წლის დეკემბერში დამეღუპა ავარიაში. ახლა მეუღლესთან ერთად ვცხოვრობ და ორივე ველოდებით, როდის დასრულდება ეს ტანჯვა!
საშინელი დღე იყო, როდესაც ჩემი შვილი დააკავეს. ჩემ მიერ დალაგებული ტანსაცმელებიდან ამოიღეს იარაღი, დროშა და "ფლეშკა". გეფიცებით სინდისს _ არაფერი შუაშია ჩემი შვილი. ყველას ვთხოვ, დამეხმარონ!
ამ დღეებში სახალხო დამცველთან ვაპირებთ შეხვედრას და იმედია, მიგვიღებს. ჩვენი შვილები არიან მორწმუნეები და არა _ ტერორისტები. ჩემი ორივე შვილი სამხედრო სამსახურში მსახურობდა და არ გაქცევიან თავიანთ პასუხისმგებლობას. ჩემი შვილი ხელოსანი კაცია და ბოლო დროს მას ეხმარებოდა ჯამბული. მუშაობდა და ლოცულობდა, ეს არის დანაშაული? მეც არ ვიცი, რა მოხდა. გაოცებული და გაოგნებული ვართ იმით, რაც ჩვენს თავს ხდება", _ თქვა მერი ვანაძემ.
"გურია ნიუსი" ამ საქმესთან დაკავშირებით სახალხო დამცველის აპარატს დაუკავშირდა. სახალხო დამცველის პრესსამსახურის მიერ მოწოდებული ინფორმაციით, ოთხი დაკავებულის საქმეს სახალხო დამცველი სწავლობს.
