“ქალს აქვს ისეთი “მეექვსე გრძნობა”, რომელიც ზუსტად განსაზღვრავს ხმის ტონალობისაც კი”

მარტი გურიაში ქალბატონებისთვის მიძღვნილი ღონისძიებებით დატვირთული იყო: ქალაქ ოზურგეთში, გურიის ნარდის ფედერაციის ოფისში, გაიმართა რეგიონული ტურნირი მოკლე ნარდში, რომელშიც ოზურგეთის, ლანჩხუთისა და ჩოხატაურის მუნიციპალიტეტებიდან 32 ქალბატონი მონაწილეობდა; ჩოხატაურის მუნიციპალიტეტის სოფელ ბუკისციხეში პენსიონერ ქალბატონებს შეხვედრა თემის მაჟორიტარმა დეპუტატმა ქეთევან სიხარულიძემ მოუწყო.

საქართველოს დამფუძნებელი კრების წევრების, გურული ქალბატონების შესახებ ისაუბრეს ოზურგეთის დემოკრატიული ჩართულობის ცენტრში და სკოლის მოსწავლეებს ქართველი ქალების პოლიტიკური აქტიურობის შესახებ ინფორმაცია მიაწოდეს.

ეს აქტივობები "გურია ნიუსის" და Post _ ალიონის ერთობლივი პროექტის ფარგლებში მომზადებულ გადაცემაში _ "მონოლოგიდან დიალოგამდე" გაშუქდა.

ამავე გადაცემის სტუმარი ჩოხატაურის მუნიციპალიტეტის სოფლის მეურნეობის სამსახურის უფროსი, საკრებულოს დეპუტატი მანანა მინდაძე გახლდათ _ ქალბატონი, რომლის თანამდებობას, არსებული სტერეოტიპის თანახმად, "მამაკაცის სამსახურს" უწოდებენ.

თავად მინდაძე ამბობს, რომ ქალ ფერმერთა წრე საკმაოდ დიდია და სოფლის მეურნეობის სამინისტროში ბევრი ქალბატონი მუშაობს:

_ არ არიან ქალები ცოტანი სოფლის მეურნეობაში. ჩოხატაურში რამდენია, არ ვიცი, მაგრამ საერთოდ, ფერმერი ქალების წრე ძალიან დიდია. მმართველი ქალები სოფლის მეურნეობის სამინისტროშიც არიან _ მინისტრის მოადგილეებად, აპარატის უფროსებად.

სპეციალობით აგრონომი ვარ, ჩემი განხრით ვმუშაობ, თუმცა, იმ ავადსახსენებელ წლებში, მთელი 9-წლის განმავლობაში, არ მქონდა საშუალება და არც სურვილი ამ სპეციალობით მემუშავა სამინისტროში. ამიტომ გავეცალე ჩემს სპეციალობას და სხვადასხვა უცხოურ კომპანიებში ვმუშაობდი. სოფლის მეურნეობის სფეროში დაბრუნება გადავწყვიტე მას შემდეგ, რაც ბიძინა ივანიშვილი გამოჩნდა და ამ მიმართულებებზე აქცენტები გააკეთა. იმ დროს ჩავები პოლიტიკაშიც. მას შემდეგ, რაც ჩვენი გუნდი ხელისუფლებაში მოვიდა და შეიქმნა აღნიშნული სამსახურები, სადაც ხელმძღვანელები კონკურსის წესით უნდა შეერჩიათ, დავწერე განცხადება. ეს ისე გავაკეთე, რომ ჩემი ოჯახის არც ერთმა წევრმა არ იცოდა. სიურპრიზი იყო ჩემი შვილებისთვისაც, რომ ჩოხატაურში ვითხოვდი სამუშაო ადგილს. საკმაოდ რთული კონკურსი გავიარე და ასე აღმოვჩნდი ამ თანამდებობაზე, _ თქვა მინდაძემ გადაცემაში სტუმრობისას.

_ ქალბატონო მანანა, თქვენს სამსახურში სულ მამაკაცები მუშაობენ. რთულია მათთან ურთიერთობა უფროსის რანგში?

_ ძალიან კარგი და სასიამოვნოა. სამი მამაკაცი მუშაობს ჩემთან და მათ სხვადასხვა საკითხზე სხვადასხვა შეხედულება აქვთ, მაგრამ როდესაც ვერთვები და თუ მჯერა, რომ ის არის მართალი, იქ მთავრდება ყველაფერი. ანუ ქალს აქვს რაღაც დამატებითი გრძნობა, დამატებითი თავდაჭერა, დამატებითი ღირებულება, რასაც მამაკაცი ეთანხმება. თუმცა, არ იფიქროთ, თუ არასწორი ხარ, დაგეთანხმონ. სწორი აზრის შემთხვევაში, გააჩნია, როგორ მივაწოდებთ ამ სწორ აზრს _ ეს უპირატესობა ქალს აქვს.

როცა საქმეა გასაკეთებელი და ქალი ამ საქმეს კარგად აგვარებს, ამას აღიარებენ. მქონდა ასეთი შემთხვევა _ ახალ ჩამოსულს, გაერთიანებულ თათბირზე სულ მამაკაცები დამხვდნენ. ბევრი პრობლემა იყო დაგროვილი, რომლის მოგვარებისაც არავის სჯეროდა. თუმცა, სამინისტროს აქტიური ჩართულობით პრობლემების მოგვარება 2 დღეში მოვახერხე და 2013 წელს ხვნა-თესვის პროცესმა ძალიან კარგად ჩაიარა. ეს იმ დროს, როცა რაიონში მხოლოდ 2 ტრაქტორი არსებობდა და ორივე გაფუჭებული. თუმცა, ამ საქმეს კარგად გავართვი თავი და თათბირიდან ათ დღეში ჩოხატაურში 18 გამართული ტრაქტორი მუშაობდა.

_ ხვნის დროს ტრაქტორსაც კი მართავდით… გქონიათ შემთხვევა, როცა უთქვამთ, რა ქალის საქმეა ეს სამსახურიო?

_ თავიდან _ კი. მირეკავდნენ კიდეც _ რამ გაგაგიჟა, ჩოხატაურში რა გინდა, თბილისელმა ქალმა იქ რა უნდა გააკეთოო. არ ვიცი, დავამსხვრიე ეს სტერეოტიპი თუ არა _ ეს საზოგადოებამ განსაზღვროს. მე მთელი ჩემი სული და გულით მინდა სიკეთე მოვუტანო ჩოხატაურს.

_ თქვენ საკრებულოს დეპუტატიც ბრძანდებით. რამდენად რთულია ქალის ყოფნა პოლიტიკაში?

_ აუცილებელია და ვისურვებდი, მეტი ქალი პოლიტიკოსი გვყავდეს. არ ვამბობ, რომ ქალი სამზარეულოდან პირდაპირ პოლიტიკურ ტრიბუნასთან უნდა მოხვდეს _ ამისთვის მომზადებაა საჭირო. თუკი ქალი მოემზადება და პოლიტიკაში მოვა მომზადებული, მერწმუნეთ, უფრო კარგი შედეგი ექნება. ქალს აქვს ისეთი "მეექვსე გრძნობა", რომელიც ზუსტად განსაზღვრავს ხმის ტონალობისაც კი. ქალი უკეთ ხვდება, როდისაა გაჩუმება საჭირო და რა დროს _ ძლიერი მომზადება.

ქალები ამას ვგრძნობთ და თუ კარგად გამოვიყენებთ ამ გრძნობებს, უფრო კარგ შედეგებს მივიღებთ.

_ საკრებულოს სხდომებზე ხშირად კამათობთ. ამის გამო მამაკაცები არ ბრაზობენ?

_ ვცდილობ, არასოდეს ვთქვა ის, რასაც არ ვფიქრობ. იმ მოსაზრებას, რომელიც სწორად მიმაჩნია, ყოველთვის დავიცავ.

_ აღნიშნეთ, რომ ქალი პოლიტიკაში მოსვლამდე კარგად უნდა მოემზადოს. ჩვენი პროექტის მიზანი სახლში ჩაკეტილი ქალბატონების გარეთ გამოყვანაა _ ძალიან ბევრი ნიჭიერი ქალი დღეს მხოლოდ სამზარეულოში ყოფნით შემოიფარგლება. ჩვენ არ გვინდა, რომ ეს პროექტი პროექტად დარჩეს და მონოლოგიდან დიალოგის რეჟიმში უნდა გადავიდეთ.

ჩვენ მომავალში ერთად შევხდებით ამ ქალბატონებს. მანამდე საინტერესოა, რას ურჩევთ მათ.

_ახლა არის არაჩვეულებრივი შანსი, რომ ქალბატონები გამოვიდნენ სახლებიდან და ჩაერთონ ბიზნესში. ამის შანსს პროექტი _ "აწარმოე საქართველოში" აძლევს მათ (თუმცა, არამარტო ქალბატონებს). მინდა მათ ვურჩიო, რომ გამოვიდნენ სახლებიდან, მოვიდნენ ჩვენთან. დავეხმარებით, დავაკვალიანებთ და მივცემთ იდეების რეალიზების საშუალებას. მთავარია, ქალბატონებს ჰქონდეთ მიზანი, საქმის კეთების კეთილი ნება და ეს აუცილებლად გამოუვათ.

_ ამ პროექტში რამდენად მაღალია ქალების აქტივობა?

_ ამ მხრივ ძალიან უკმაყოფილო ვარ _ სულ 32 პროექტი გავიდა ჩოხატაურიდან და აქედან 3 თუ 4-ის ავტორია ქალი. ვიცი, რომ ჩოხატაურელ ქალბატონებს ძალიან ბევრი პრობლემა აქვთ და მინდა მათ ვუთხრა, რომ ბევრი რაღაცის გაკეთება შეიძლება ამ პროექტით. ჩემთან თუკი ითანამშრომლებენ, მე დიდი სიამოვნებით დავეხმარები.

_ ამ პროექტში ქალების ნაკლებ ჩართულობას მამაკაცებს ხომ არ უკავშირებთ? სამწუხაროდ, ხშირად ისმის ჩვენთან _ "ქალს რა უნდა ბიზნესში, ქალი ვიცი მე კუხნაში!"

 _ ქალი თუ საბერძნეთში და თურქეთში დადის სამუშაოდ, რატომ არ უნდა გამოვიდეს სოფლის ცენტრში?! არ მგონია, ჩოხატაურელი მამაკაცები ასე ფიქრობდნენ. ვფიქრობ, რომ ამის მიზეზი ნაკლები ინფორმაციის ქონაა. მიუხედავად იმისა, რომ პროექტი მუშაობს, მოსახლეობამდე არ მიდის ინფორმაცია. მაგალითად, ქვაბღაში არც კი გაუგიათ. ჩვენს მთავრობას ხშირად აბრალებენ, რომ ნაკლებ პიარს აკეთებს და რაღაც დოზით ამას ვეთანხმები. ამიტომ, გადავწყვიტე სხვანაირად ვიმოქმედო. გამგებელთანაც უკვე შევთანხმდი _ კარდაკარ ვაპირებ ვიარო და ყველას მივაწოდო ინფორმაცია პროექტის შესახებ, _ აღნიშნა მანანა მინდაძემ გადაცემაში სტუმრობისას.

გადაცემის სრული ვერსიის ნახვა შეგიძლიათ ნახოთ აქ.