თბილისის ბაგა-ბაღების მართვის სააგენტოს განცხადებით, საბავშვო ბაღში საკვები პროდუქტების გადამალვის ფაქტი კიდევ ერთხელ აღმოაჩინეს. ამჯერად საქმე ეხება № 26 საბავშვო ბაღს, სადაც სააგენტოს წარმომადგენლების თქმით, გადამალული ხორცი აღმოაჩინეს. ამ ფაქტთან დაკავშირებით, სააგენტო განცხადებას ავრცელებს, რომელსაც უცვლელად გთავაზობთ.
"მიუხედავად იმისა, რომ თბილისის საბავშვო ბაგა-ბაღების მართვის სააგენტომ არაერთხელ განაცხადა ბაღებში რეგულარული მონიტორინგის შესახებ, ასევე, ბაღის დირექტორებს მიეცათ რეკომენდაციები და გაფრთხილებები, სასწავლო-სააღმზრდელო დაწესებულებებში კვლავ ფიქსირდება გადაცდომებისა და დარღვევების ფაქტები.
თბილისის საბავშვო ბაგა-ბაღების მართვის სააგენტოს მონიტორინგის სამსახურმა, მორიგი შემოწმების დროს, თბილისის №26 ბაღში 5.300 კგ. გადამალული ფარშირებული საქონლის ხორცი აღმოაჩინა. მონიტორინგის სამსახურის თანამშრომლების კვების ბლოკში შესვლისას, მზარეულის თანაშემწე გადამალული ხორცის სამზარეულოდან ფარულად, უკანა გასასვლელიდან გატანას შეეცადა, თუმცა ეს ვერ შეძლო. შედგა მონიტორინგის აქტი, რომელშიც პროდუქტის გადამალვის ფაქტი ხელმოწერით დაადასტურა ბაღის დირექტორმა. თავის მხრივ, მზარეულის თანაშემწემ აღიარა, რომ ფარშირებული ხორცი გადამალული იყო. ზემოაღნიშნულ ფაქტთან დაკავშირებით მონიტორინგის სამსახურის დასკვნა დირექტორს უახლოეს დღეებში ჩაბარდება.
დარღვევიდან გამომდინარე, მენიუფაქტურით გათვალისწინებული პროდუქტი (ხორცი) სრულად არ იყო გამოყენებული, შესაბამისად, აღსაზრდელებმა ვერ მიიღეს დღიური რაციონით განსაზღვრული კალორაჟი.
აღსანიშნავია, რომ ეს საბავშვო ბაღებში საკვები პროდუქტის გადამალვის ერთადერთი შემთხვევა არ ყოფილა. ბოლო პერიოდში მსგავსი ფაქტი ხშირად ფიქსირდება. მნიშვნელოვანია ის ფაქტი, რომ ერთი შეხედვით მცირე რაოდენობით გადამალული საკვები მთლიანობაში მნიშვნელოვან რაოდენობას ქმნის, ზარალი კი დიდი ოდენობით თანხას შეადგენს.
№26 ბაღში ეს იყო განმეორებითი დარღვევა და პირველ შემთხვევაში, დირექტორს გამოეცხადა საყვედური."-ნათქვამია სააგენტოს მიერ გავრცელებულ განცხადებაში.
