ხულოს მუნიციპალიტეტის 4 სოფლის, ყინჩაურის, ჭერის, გურძაულისა და ძმაგულას მოსახლეობა საპროტესტო აქციებს მართავს და კომპანია "აჭარისწყალი ჯორჯიას" უპირისპირდება. აქციის ორგანიზატორებმა დღეს განცხადება გაავრცელეს, რომელსაც უცვლელად გთავაზობთ.
"გვინდა გაცნობოთ, რომ ხულოს მუნიციპალიტეტის სოფლების: ყინჩაურის, ჭერის, გურძაულისა და ძმაგულას მოსახლეობის საერთო გადაწყვეტილებით, იძულებულნი ვართ, დავიწყოთ პერმანენტული აქციები კომპანია "აჭარისწყალი ჯორჯიას" წინააღმდეგ, რომლის ფარგლებში ხუთშაბათიდან მოყოლებული გადაკეტილი გვაქვს ბათუმი-წაბლანა-ყინჩაურის გზა და სამშენებლო სამუშაოებზე არ ვუშვებთ აჭარისწყალი ჯორჯიის კუთვნილ ტექნიკას ჩვენი მოთხოვნების სრულ და უპირობო შესრულებამდე, კერძოდ, შეჩერდეს ყოველგვარი სამშენებლო სამუშაოები შუახევი ჰესის საპროექტო არეალში იმ დრომდე, სანამ:
არ განხორციელდება დეტალური გეოლოგიური კვლევები დამოუკიდებელი ექსპერტების მიერ ჩვენს სოფლებში და არ მოხდება შეფასება, შეუქმნის თუ არა საფრთხეს ბურღვა-ფეთქებითი სამუშაოები სოფლებს და ჩვენს მფლობელობაში არსებულ უძრავ ქონებას, სათემო, სახნავ-სათეს მიწებს და სათიბ-საძოვრებს.
არ მოხდება ინვენტარიზაციის ჩატარება სოფლებში და არ მოხდება დღეს არსებული მდგომარეობის აღრიცხვა, რათა შესაძლებელი გახდეს შედარების გაკეთება.
არ აიღებს კომპანია მის მიერ განხორციელებული საქმიანობით მიყენებული ზიანის (პირდაპირი და ირიბი) ანაზღაურების ვალდებულებას საერთაშორისო სტანდარტების შესაბამისად. ზიანი კომპანიის მიერ უნდა ანაზღაურდეს სათანადო ფულადი კომპენსაციით (შესაბამისი სახელმწიფო საექსპერტო დასკვნის საფუძველზე. ალბათობითი დასკვნის შემთხვევაში საკითხი უნდა გადაწყდეს მოსახლეობის სასარგებლოდ) ან ნაცვალგების პრინციპით უნდა მოხდეს განსახლება ხელვაჩაური–ბათუმი–ქობულეთის ტერიტორიაზე, მსოფლიო ბანკის არანებაყოფილობითი განსახლების პოლიტიკის მოთხოვნათა დაცვით.
აქვე გვინდა, მოგახსენოთ რომ ა.წ. 30 მარტს ჩვენ აღნიშნული მოთხოვნებით უკვე მივმართეთ, როგორც პროექტის დაფინანსებაში ჩართულ საფინანსო ინსტიტუტებს (ევროპის რეკონსტრუქციისა და განვითარების ბანკს, აზიის განვითარების ბანკს და საერთაშორისო საფინანსო კორპორაციას), ისე პრემიერ მინისტრს და აჭარის ავტონომიური რესპუბლიკის ხელმძღვანელსაც ( http://greenalt.org/wp-content/uploads/2016/03/Collective_letter_Shuakhevi_HPP_project.pdf ), თუმცა არანაირი რეაგირება ჩვენს მიმართვას არ მოყოლია. არაერთხელ შევხვდით კომპანიის წარმომადგენლებსაც, თუმცა ასევე უშედეგოდ. აღნიშნულიდან გამომდინარე აქციას ექნება პერმანენტული ხასიათი, მანამ სანამ არ მოხდება ჩვენი მოთხოვნების სრულად გათვალისწინება."-ნათქვამია გავრცელებულ განცხადებაში.
