თბილისის საქალაქო სასამართლომ კოჯორში მომხდარი მკვლელობის საქმესთან დაკავშირებით, ერთ პირს პატიმრობა დაუსწრებლად შეუბარდა.
სასამართლოს მიერ გავრცელებული ინფორმაციით, მოსამართლემ დააკმაყოფილა პროკურატურის შუამდგომლობა დამამძიმებელ გარემოებებში ორი ან მეტი პირის განზრახ მკვლელობის ფაქტზე და ბრალდებულების მიმართ აღკვეთის ღონისძიების სახით პატიმრობა იქნება გამოყენებული.
სასამართლოს ინფორმაციით, საქმე ეხება 2014 წლის 17 დეკემბერს მომხდარ დედა-შვილის ნატო და გურამ კვეზერელების მკვლელობის საქმეს, კერძოდ ბრალდებულებმა გურამ კვეზერელი მოტყუებით მიიყვანეს კოჯორში, ერთ-ერთ აგარაკზე და ცივი იარაღით მრავლობითი ჭრილობა მიაყენეს, რის შედეგადაც ეს უკანასკნელი ადგილზე გარდაიცვალა. ბრალდებულებმა ცხედარი მოათავსეს კასრში, დაასხეს სპეციალური მჟავა და აგარაკის ეზოში ჩამარხეს. იმავე დღეს, აღნიშულმა პირებმა თბილისის ზღვის დასახლებაში ცივი იარაღით მრავლობითი სასიკვდილო ჭრილობა მიაყენეს დედას, ნატო კვეზერელს. ბრალდებულებმა სახლიდან 12 000 აშშ დოლარი, გურამ კვეზერელის სახელზე გაფორმებული ორი ცეცხლსასროლი იარაღი, პორტატიული კომპიუტერი, პირადი ნივთები გაიტაცეს და შემთხვევის ადგილიდან მიიმალნენ.
სასამართლოს განჩინებით ერთ-ერთ ბრალდებულს, რომელიც მიმალვაშია, დაუსწრებლად აღკვეთის ღონისძიების სახით პატიმრობა შეეფარდა, ხოლო ამავე საქმეზე ბრალდებული კიდევ ერთი პირი სასამართლომ აღკვეთის ღონისძიების გარეშე დატოვა, ვინაიდან, იგი უკვე მსჯავრდებულია სხვა სისხლის სამართლის საქმეზე და სასჯელს იხდის სასჯელაღსრულების დაწესებულებაში.
ბრალდების მხარის შუამდგომლობა სასამართლომ ღია სასამართლო პროცესზე განიხილა და წინასასამართლო სხდომა 2016 წლის 14 ივნისს, 12:00 საათზე გაიმართება.
