მოსახლეობის 28,5 პროცენტი წარმოადგენს შიდა მიგრანტებს – პირებს, რომლებმაც შეიცვალეს მუდმივი საცხოვრებელი ადგილი (გადავიდა საცხოვრებლად სხვა დასახლებულ პუნქტში) საქართველოს ფარგლებში. შიდა მიგრანტთა 33,6 პროცენტს მამაკაცები წარმოადგენენ, ხოლო 66,4 პროცენტს – ქალები. შიდა მიგრანტთა უმეტესობა ცხოვრობს ქ. თბილისში (33,1 პროცენტი), იმერეთის რეგიონში (15,1 პროცენტი) და სამეგრელო-ზემო სვანეთის რეგიონში (9,6 პროცენტი). – ეს მონაცემები საყოველთაო აღწერის დროს გახდა ცნობილი.
მოსახლეობის 5,0 პროცენტს შეადგენენ იმიგრანტები – პირები, რომელთაც ოდესმე უცხოვრიათ საზღვარგარეთ 12 თვეზე მეტ ხანს. მათ შორის 51,9 პროცენტი მამაკაცია, ხოლო 48,1 პროცენტი – ქალი. იმიგრანტთა 77,4 პროცენტი საქალაქო დასახლებებში ცხოვრობს, ხოლო 22,6 პროცენტი – სასოფლოში.
იმიგრანტთა უმეტესობა განაწილებულია ქ. თბილისში (45,5პროცენტი), იმერეთის რეგიონში (12,9 პროცენტი) და ქვემო ქართლის რეგიონში (11,0 პროცენტი). იმიგრანტთა 51,6 პროცენტისათვის წინა საცხოვრებელ ქვეყანას წარმოადგენდა რუსეთის ფედერაცია, 8,3 პროცენტისათვის-საბერძნეთი, ხოლო 8,1 პროცენტი უკრაინაში ცხოვრობდა. აღწერის პერიოდში სპეციალური კითხვარის მეშვეობით მიღებულ იქნა ინფორმაცია ემიგრანტების შესახებ.
აღწერის მეთოდოლოგიის შესაბამისად ემიგრანტი წარმოადგენდა 2002 წლის 1 იანვრიდან საქართველოდან უცხო სახელმწიფოში მუდმივად ან დროებით საცხოვრებლად წასულ პირს, რომლის არყოფნა საქართველოში აღემატებოდა 12 თვეს ან რომელიც აპირებდა საზღვარგარეთ დარჩენას 12 თვეზე მეტ ხანს.
აღწერის შედეგების მიხედვით ემიგრანტთა რაოდენობამ შეადგინა 88,5 ათასი კაცი, მათ შორის 45,4 პროცენტი მამაკაცია, ხოლო 54,6 პროცენტი – ქალი.
მიგრანტთა 66,1 პროცენტი საზღვარგარეთ წასვლამდე საქალაქო დასახლებებში ცხოვრობდა, ხოლო 33,9 პროცენტი – სასოფლო დასახლებებში. ემიგრანტთა 31,6 პროცენტისათვის წინა საცხოვრებელ ადგილს ქ. თბილისი წარმოადგენდა, 22,9 პროცენტისათვის – იმერეთის, ხოლო 12,5 პროცენტისათვის – ქვემო ქართლის რეგიონი. ემიგრირებულთა ძირითად ნაწილს 20-54 ასაკობრივი ინტერვალის მოსახლეობა (ემიგრანტების 75,1 პროცენტი) შეადგენს.
39 წლამდე ასაკის ემიგრანტებში მამაკაცები ჭარბობენ ქალებს, ხოლო 40 წლის და უფროსი ასაკის ემიგრანტებში საპირისპირო სურათი გვაქვს და ქალების რაოდენობა აღემატება მამაკაცთა რაოდენობას. 50 წლისა და უფროსი ასაკის ემიგრანტი ქალები 2-ჯერ მეტია შესაბამისი ასაკის ემიგრანტ მამაკაცთა რაოდენობაზე.
როგორც აღწერის შედეგებმა აჩვენა, ემიგრანტთა ყველაზე დიდი ნაწილი ცხოვრობს რუსეთის ფედერაციაში (21,7 პროცენტი), საბერძნეთში (15,9 პროცენტი)და თურქეთში (11,2 პროცენტი). რუსეთის ფედერაციაში, საფრანგეთში, უკრაინაში და აზერბაიჯანში ემიგრირებულთა უმრავლესობას მამაკაცები შეადგენენ, ხოლო საბერძნეთში, თურქეთში, იტალიაში, გერმანიაში, აშშ-ში და ესპანეთში ემიგრანტი ქალები ჭარბობენ.
