ქალაქ ოზურგეთსა და ოზურგეთის მუნიციპალიტეტში მეორე მსოფლიო ომის 15 ვეტერანი ცხოვრობს.
9 მაისი _ ფაშიზმზე გამარჯვების 71 წლისთავი მათ ადგილობრივი ხელისუფლების და საზოგადოების წარმომადგენლებმა მიულოცეს.
ოზურგეთის მუნიციპალიტეტში მცხოვრებ 12 ვეტერანს 200 ლარის ოდენობით ფულადი პრემია ოზურგეთის მუნიციპალიტეტის გამგებელმა მერაბ ჭანუყვაძემ გადასცა. ქალაქ ოზურგეთში მცხოვრებ სამ ვეტერანი კი ქალაქის მერმა, ბეგლარ სიორიძემ 300-300 ლარით დააჯილდოვა.
დაჯილდოების შემდეგ, საზეიმო ღონისძიება ქალაქ ოზურგეთში მეორე მსოფლიო ომში დაღუპულთა ხსოვნის მემორიალთან გაგრძელდა, სადაც ხელისუფლების წარმომადგენლებმა დაღუპულ გმირთა მემორიალი გვირგვინებით შეამკეს.
95 წლის ზინა სალუქვაძე ოზურგეთის კოლორიტია. ის ყოველ წელს მონაწილეობს 9 მაისის ღონისძიებაში.
"9 მაისის სადღესასწაულო ღონისძიებას ომის დამთავრების შემდეგ ყოველ წელს ვესწრები. მე ომთან გათანაბრებული პიროვნება გახლავართ. საბჭოთა კავშირმა დაამარცხა უდიდესი სახელმწიფო გერმანია. ბუნების ძალას ვთხოვ, იმ ვეტერანებმა, რომლებმაც იბრძოლეს და დღეს ცოცხლები არიან, იცოცხლონ დიდხანს, ხოლო სამარადისო ხსოვნა იყოს იმ 21 000 000 ადამიანის, რომელიც შეეწირა სამშობლოს კეთილდღეობას.
როდესაც ომი იყო, ჩვენ დავდიოდით ჩაის პლანტაციებში და ვკრეფდით ჩაის ფრონტისათვის. ყველაფერს ფრონტზე ვაგზავნიდით, რაც კი შეიძლებოდა და ასე ვეხმარებოდით ჩვენს გმირებს. 1418 დღე დაძაბულ ვითარებაში ვიყავით + ეს იყო უმძიმესი დღეები. ყველა ერთმანეთს ვეხმარებოდით და ერთი აზრი გვქონდა: სამშობლო და გამარჯვება." – გვითხრა ზინა სალუქვაძემ.
ომის ვეტარანი გიორგი ინწკირველი ქალაქ ოზურგეთში ცხოვრობს და 90 წლისაა. "ჩემი ცხოვრება არის დიდი ისტორია. ბრძოლა დავიწყე კავკასიიდან და შემდეგ მოვხვდი პოლონეთის საზღვარზე.
ომის დამთავრების შემდეგ ვმკურნალობდი _ ომში დავიწვი. გამოვჯანმრთელდი და შემდეგ ცოლად მოვიყვანე მედიკო ვაშალომიძე, გვყავს ორი შვილი და ორი შვილიშვილი. ახლა 90 წლის ვარ და ყოველ 9 მაისს გამოვდივარ ქალაქში სადღესასწაულო კონცერტზე." – თქვა გიორგი ინწკირველმა.
შაქრო მარგალიტაძე ოზურგეთის მუნიციპალიტეტის სოფელ მერიიდანაა.
"ძალიან მძიმედ მახსენდება ომის დღეები. მეც არ ვიცი, როგორ გადავურჩი სიკვდილს, მაგრამ დღემდე ვარ ცოცხალი. ახლა 91 წლის ვარ და იშვიათად გამოვდივარ გარეთ."- გვითხრა შაქრო მარგალიტაძემ.
შოთა მანჯავიძე 15 წლის იყო, როდესაც ომში წავიდა.
"15 წლის ვიყავი, როდესაც ომი დაიწყო და წამიყვანეს. წინა ხაზზე არ ვყოფილვარ, მაგრამ ბევრგან ვინრძოდი."_ მოკლედ გაიხსენა ომის წლები შოთა მანჯავიძემ.
შოთა კოპლატაძემ ჩვენთან საუბრის დროს თქვა, რომ ჯერ უკრაინაში იბრძოდა და შემდეგ ბელარუსიაში.
"ორჯერ დამჭრეს, მაგრამ სიკვდილს გადავურჩი. ოჯახიდან მხოლოდ მე ვიყავი წასული, 17 წლის ვიყავი, როდესაც ომში მოვხვდი. ახლა 91 წლის ვარ."– თქვა შოთა კოპლატაძემ.
