ოზურგეთის მუნიციპალიტეტის სოფელ დვაბზუს მოსახლეობა დასახლებულ პუნქტში ჯეოსელის ანძის დადგმას აპროტესტებს. მათ "გურია ნიუსს" დახმარებისთვის მიმართეს. მათი თქმით, მოსახლეობასთან და სოფლის ხელმძღვანელობასთან შეთანხმების გარეშე იდგმება 40 -50 მეტრიანი სიმაღლის ინტერნეტის რაიოდასადგური, რაც მათივე აზრით, ადგილობრივი მოსახლეობის ჯანმრთელობას საფრთხეს შეუქმნის. როგორც ადგილობრივები ამბობენ, ერთ-ერთმა მოსახლემ მეზობლებთან შეთანხების გარეშე გასცა მის საკუთრებაში არსებული მიწის ნაკვეთი და ხელშეკრულებაც გააფორმა კომპანიასთან.
ადგილზე, სადაც აღნიშნული პროექტი უნდა განხორციელდეს, სამუშაოები უკვე დაწყებულია, თუმცა მოსახლეობა კატეგორიული წინააღმდეგია და სამუშაოების შესრულებას აფერხებს.
გუშინ, ოზურგეთის მუნიციპალიტეტის სოფელ დვაბზუს მცხოვრებელები კიდევ ერთხელ შეიკრიბნენ და პროტესტი ხმამაღლა გამოხატეს. ადგილზე მოვიდა სოფლის რწმუნებული ვასილ ღლონტი, მობილიზებული იყვნენ სამართალდამცავებიც.
როგორც სოფელ დვაბზუში მცხოვრები ქეთევან თოხაძე "გურია ნიუსთან" ამბობს, ისე დაწიყო აღნიშნული სამუშაოები, რომ მოსახლეობამ ამის შესახებ არაფერი იცოდა:
"ერთ დღესაც მოვიდნენ ტრაქტორები, ამოთხარეს ორმოები, არავინ არაფერი იცოდა, არც სოფლის დეპუტატმა, არც რწმუნებულმა, არც გამგეობამ. მოვიდნენ და დაიწყეს მუშაობა. რომ ვიკითხეთ, ასე გვითხრეს, ჩვენ რა შუაში ვართო, ეს ადგილი შეისყიდა ჯეოსელმა და ჩვენ სამუშაოებს ვაწარმოებთო.
ჩვენ ასე გავიგეთ, რომ 500 ლარი ექნება მთელი ცხოვრება ხელფასის სახით ჩვენს მეზობელს, ვინც მისცა ამის ნებართვა, ექნება ასევე უფასო ინტერნეტი. ის მიწა კი 37 000 ლარად გაყიდაო, ხელშეკრულება გაფორმებული აქვს, თუმცა ჩვენ არავინ არ გვანახებს.
სადაც ეგ ანძები დგას, იქ ყველა სახვადასხვა დაავადებით ავადმყოფობს. პირველ რიგში ფუტკარს და პირუტყვს ვნებსო, მაგრამ ამას ვინ ამბობს, შვილები ხომ გვყავს, შვილიშვილები? თითქმის ყველა ოჯახში პატარა იზრდება. ერთადერთი იმედი თქვენ ხართ ჩვენი, იქნებ გადაიფიქრონ და აღარ მოხდეს ამ პროექტის განხორციელება."_ამბობს ქეთევან თოხაძე.
ლადო თოხაძე: "აქ მარტო დვაბზუ არაა, ამ სოფელს ესაზღვრება ცხემლისხიდი, ბოხვაური.
მთა რომ იყოს ჯანდაბას, ასე მჭიდრო დასახლებაში, სამოსახლოში? ჩვენ თავს შევაკლავთ და არ დავადგმევინებთ, გამორიცხულია! ჩვენ შევაჩერეთ კიდევ მშენებლობა, თორემ ახლა შეიძლება ანტენა დადგმულიც ყოფილიყო. ორმოა ამოთხრილი, გუშინწინ მოვიდა ელექტროობისა და ბურღის მანქანა და არ შევუშვით შიგ, ბოძები უნდა დაესოთ და დენი გაეყვანათ და ხელი შევუშალეთ, ვერაფერს გავხდით. ერთადერთი თქვენი იმედი დაგვრჩა, რომ იქნებ ახალგაზრდები გადავარჩინოთ."
თენგიზ სამსონია: "მთელი საქართველოს მასშტაბით, ასეთი ანტენა არსად არ არის დასახლებულ პუნქტში და მანდამაინც აქ მოინდომეს? ჩვენ ხალხი არ ვართ თუ რა ხდება? სადაც ეგ ანძები დგას, დასახლებული პუნქტიდან 8 და 10 კილომეტრშია მოცილებული, აქ 50 მეტრში უნდა დადგან, როგორი გამოსხივება აქვს ხომ იცით? თუ ადამიანები ფეხებზე ვკიდივართ? სადმე სხვაგან რომ დადგან მოშორებით, იქ გზა უნდა შეიყვანონ. ეს ძვირი უჯდებათ და აჰა, დასახლებული პუნქტი, ვის ადარდებს ადამიანები.
არავინ არ მისცემს მაგის უფლებას, რომ ეს დაიდგას. ჩვენ ასე გვითხრეს, თქვენ განვითარებას უშლით ხელს და ბნელი ხალხი ხართო, ხომ ხედავთ როგორი მჭიდრო დასახლებაა, ჩვენ არაფრად არ ჩაგვაგდეს, ჩვენთან შეუთანხმებლად მოხდა. არ უნდა იცოდეს ეს სოფლის გამგებელმა და ან დეპუტატმა მის სოფელში რომ ასეთი რამ ხდება? ან ხალხს ხომ უნდა შეეკითხო? ახალი მეზობელი რომ სახლდება, იმის ამბავს ვიკითხავთ, ვინაა, სამეზობლოდ თუ ვარგაო და ამხელა ანძას გვიდგამენ და ჩვენ არაფერი არ ვიცით. შენ ფული იშოვო და ჩემთან შვილმა და შვილიშვილმა არ გაიხაროს? მაგის შიში უნდა მქონდეს?"
ხარიტონ დათუნაშვილი: "ჩვენ იძულებული ვართ, დავხვდეთ და ფიზიკურად გავუსწორდეთ, მერე დაიწყებს პოლიცია ძებნას ვინაა ორგანიზატორიო, ნახავს საქმეს, დაიჭერენ ვიღაცას ან დააჯარიმებენ და ამ საცოდავ ხალხს გაამწარებენ. 400 კაცის ხელმოწერა გვაქვს და ამ ამბით არც დეპუტატი და არც გამგებელი არ დაინტერესებულა. გამგებელს უთქვამს, ამ საარჩევნოდ ნუ ამიბუნტებ ხალხსო, ეს რას ნიშნავს ახლა გაჩერდებიან და მერე ისევ დაიწყებენ? ჯერჯერობით ვუმკლავდებით, მერე პოლიციას მოვიყვნათო, არ შევეპუებით პოლიციას და მოხდება უბედურება. რას გვიზამენ, ყველას დაგვიჭერენ? ისედაც გაჭირვებულები ვართ, წყალი ჩვენთან არაა, არც გზა და არც გაზი.
ამდენი წელია გაზის გამოყვანას ვეხვეწებით ხელისუფლებას და ამას ვერ მივაღწიეთ, წვიმაში ამ გზაზე ვერ გაივლი, დაიწყეს საცალფეხო ხიდის გაკეთება და მიატოვეს, რაც საჭიროა იმას არ გვიკეთებენ და ახლა ეს უნდათ? არ დავთმობთ".
ლონდა წიტაიშვილი: "ამაზე მეტი ხალხი მოიყრის თავს, არ დავადგმევინებთ არავითარ შემთხვევაში, მთელი სოფელია წინააღმდეგი, ყველას შვილები და მომავალი თაობა ეზრდება და არავის არ უნდა ეს ანძა აქ."
"გურია ნიუსმა" მაია თოხაძეც ჩაწერა, რომელსაც უპირისპირდებიან სოფელ დვაბზუს მცხოვრებლები.
მაია თოხაძე: "ჩემს მეზობლებს არ აქვთ სურვილი, რომ წაიკითხონ საერთაშორისო დონის კვლევითი ინსტიტუტის დასკვნა, სადაც აღნიშნულია, რომ ის რაც იდგმება, არ არის საშიში და არ უქმნის ადამიანის ჯანმრთელობას საფრთხეს. აქ იდგმება ინტერნეტის ფიჭვური რადიოსადგური, ამან აანერვიულა ეს ხალხი"_ამბობს მაია თოხაძე.
რაც შეეხება მოსახლეობის პროტესტს, თოხაძე ამბობს, რომ ის კანონს არ არღვვს:
"საფუძვლიანი რომც იყოს მათი პროტესტი, მე, ჩემი მხრივ არ ვარღვევ კონსტიტუციას, არ ვარღვევ რჯულის კანონს. მათ იცოდნენ, რაც კეთდებოდა და მაბრალებენ, რომ მე მეზობლებს რაღაცა დავუმალე. ჯერ ერთი, მე რაღაცას, ნებადართულს, კერძო საკუთრებაში ვაკეთებ და არ ვუპირისპირდები სახელმწიფოს. ეს არის ჩემი საკუთრება და არავისთან ანგარიშვალდებული არ ვარ. ეს არის ჩემი საკუთრება და არ ვარ ვალდებული, ვინმე ჩამეყენებინა საქმის კურში. მე ჩემით არავინ შემიწუხებია, ის პიროვნება ჩამოვიდა ნახა და დამიკავშირდა. ეს არის ინტერნეტის რადიოსადგური და უნდა დაიდგას ხალხში. ხელშეკრულება გაფორმებული მაქვს, რაც პოლიციას ვაჩვენე, თქვენ ვერ განახებთ. ჩვენს შორის რა გარიგებაა, ამის დეტალებს ნამდვილად ვერ გეტყვით"_ამბობს თოხაძე.
მისი თქმით, ჩვენ გვქონდა საშუალება დასკვნა გვენახა.
"მილიონიც რომ დამერიცხოს, მე თუ კანონიერად ვაკეთებ, არავის არ აქვს უფლება ჩემს საკუთრებაში რამე მომიშალოს. სახელმწიფოსთან შეთანხებით ვაკეთებ და არავის აქვს უფლება, დამიპირისპირდეს. დასკვნის წაკითხვა არ უნდათ. ისიც კი დამაბრალეს, რომ საერთაშორისო დონის დასკვნა გავაყალბე. ეს უნდა დადგმულიყო, თუმცა მათ ხელი შეუშალეს, მთელი საქართველოს მასშტაბით 300 ცალი უნდა დაიდგას. ოფიციალურად ხელშეკრულება მარტში გაფორმდა. მე არავისთვის არაფერი არ დამიმალავს."-გვითხრა მაია თოხაძემ.
ოზურგეთის მუნიციპალიტეტის გამგბელის წარმომადგენელი სოფელ დვაბზუში ვასილ ღლონტი "გურია ნიუსთან" ამბობს, რომ სოფელ დავბზუს მოსახლეობის აზრი ორ ნაწილად არის გაყოფილი აღნიშნულთან დაკავშირებით. ზოგი მომხრეა, ზოგი – სასტიკი წინააღმდეგი.
ვასილ ღლონტი: "ეს არის ძალიან დიდი უბანი, აპტროტესტებენ რა თქმა უნდა, შეიძლება საფუძვლიანიც იყოს მათი პროტესტი, აქვთ შეგროვებული ძალიან ბევრი ხელმოწერა, თუმცა არიან სოფელში ისეთი ადამიანები, რომლებსაც სჭირდებათ და აქვთ სურვილი, რომ დაიდგას ეს ანძა. მე მესმის ამ ადამიანების, მათ ეშინიათ და შეიძლება სამართლიანიც იყოს მათი შიშიც. ჩვენ ვნახეთ ხელმძღვანელობა და მოვთხოვეთ, რომ მათ ყველა არგუენტი აჩვენონ მოსახლეობას, რომ ისინი არ იყვნენ წინააღმდეგი, თუ მავნებელია, მაშინ ეგ ვის უნდა და თუ დაარწმუნებენ მოსახლეობას, რომ არ წარმოადგენს სიცოცხლისთვის საფრთხეს, მაშინ შევათანხმოთ მოსახლეობასთან ერთად.
ისინი მოვიდნენ და ჩვენთან შეუთანხმებლად დაიწყეს მუშაობა. მაშინ გავიგე, როცა მოსახლეობამ ამასთან დაკავშირებით ხელწერილები შეაგროვა.
იქ მცხოვრებლებმა ხელი შეუშალეს ტრაქტორის მუშაობას. ახლა ასე შევთანხმდით, აქვე იყო პოლიციის უფროსიც, რომ როცა მოვა ის ხალხი და განახლდება სამუშაოები, არ მოხდეს რაიმე ინციდენტი და მიიღონ შეასაბმისი ღონისძიებები"_ამბობს ვასილ ღლონტი.
მისივე თქმით, მოლაპარაკებები მოსახლეობასთან მალე შედგება, რაც ჩვენთვისაც გახდება ცნობილი.
ს/ს ნ. მახვილაძის სახელობის შრომის მედიცინისა და ეკოლოგიის სამეცნიერო – კვლვევითი ინსტიტუტის დასკვნაში აღნიშნულია:
"შპს "ჯეოსელის"-ის საბაზო რადიოსადგურის , ოზურგეთი, სოფელ დვაბზუში, განთავსებისათვის შერჩეულია ოპტიმალური ადგილი გადამცემის სიმძლავრის, ანტენის გამოსხივების დიაგრამის პარამეტრებისა და განთავსების სიმაღლის გათვალისწინებით. ანტენები განთავსებულია მაღალ სიმაღლეზე, აქვთ კარგი მიმართულება, 2 მეტრის სიმაღლის სანტარული დამცავი ზონა, რასაც ითვალსიწინებს ნორმატივი. ანტენების განთავსების ადგილი შერჩეული იქნა ქვეყანაში მოქმედი კანონმდებლობითა და ნორმატიული აქტებით დადგენილი მოთხოვნების შესაბამისად გადამცემის სიმძლავრის, ანტენის გასხივების დიაგრამის პარამეტრების, განთავსების სიმაღლის გათვალისწინებით, რის გამოც შ.ს. "ჯეოსელის" საბაზო რადიოსადგურის წარმოქმნილი რადიოსიხშირის დიაპაზონის ელექტრომაგნიტური გამოსხივების ინტესივობს ფაქტიური მნიშვნელობები საკვლევ ტერიტორიაზე არ აღემატება ქვეყანაში ამჟამად მოქმედი სანიტარული წესებისა და ნორმების "რადიოსიხშირის დიაპაზონის ელექტრომაგნიტური გამოსხივება 2.2.42.1.8.001-01 -ის მიხედვით დადგენილ ზღვრულად დასაშვებ მნიშვნელობას (10 მკვტ/სმ) და არ შეიძლბა მოახდინოს უარყოფითი გავლენა ადამიანსი ჯანმრთელობაზე და გარემოზე.
შპს "ჯეოსელის" საბაზო რადიოსადგურის" ოზურგეთი, სოფ.დვაბზუ, საკადსტრო კოდი 26.19.17.089 სანიტარულ -ჰიგიენური მაჩვენებლების ანგარიშის პროექტი თანხმდება."-აღნიშნულია დასკვნაში.
"გურია ნიუსი" აღნიშნულ თემასთან დაკავშირებით მუშაობას აგრძელებს.
