საქართველოს ადვოკატთა ასოციაციის თავმჯდომარე, ზაზა ხატიაშვილი პრემიერ-მინისტრ გიორგი კვირიკაშვილს ღია წერილით მიმართავს, სადაც აღნიშნულია, რომ ხატიაშვილი მხარს არ უჭერს ევროსასამართლოს მოსამართლეს იუსტიციის უმაღლესი საბჭოს წევრის, ევა გოცირიძის წარდგენას და აცხადებს, რომ გოცირიძის კანდიდატურის შეთავაზებით, საქართველო თავს სამარცხვინო სიტუაციაში იგდებს.
"გურია ნიუსი" ხატიაშვილის განცხადებას უცვლელად გთავაზობთ:
"ბატონო პრემიერო!
2016 წლის 25 მაისს საქართველოდან ევროპის საბჭოს საპარლამენტო ასამბლეაში, ევროპის ადამიანის უფლებათა სასამართლოში მოსამართლეობის კანდიდატთა წარდგენის ვადა იწურება.
ბატონო პრემიერო! თუ საქართველოს მთავრობის მიერ, ევროპის ადამიანის უფლებათა სასამართლოში მოსამართლეობის ერთ-ერთ კანდიდატად წარდგენილი იქნება იუსტიციის უმაღლესი საბჭოს წევრი ქალბატონი ევა გოცირიძე, მსურს წინასწარ გაგაფრთხილოთ საქართველოსთან მიმართებაში მოსალოდნელი ნეგატიურ მოვლენებთან დაკავშირებით.
საქართველოს მთავრობის 2015 წლის 14 დეკემბრის №623 დადგენილებით დამტკიცდა "2016 წელს ადამიანის უფლებათა ევროპულ სასამართლოში, საქართველოდან ასარჩევი მოსამართლის კანდიდატურების შერჩევის წესი", რომლის საფუძველზეც შექმნილი სამთავრობო კომისიის წევრიც მეც, საქართველოს ადვოკატთა ასოციაციის თავმჯდომარეც გახლდით. სამთავრობო კომისიამ 20016 წლის 28 თებერვალს შეარჩია 5 კანდიდატი, რომელთაგან თქვენ მოგიწევთ 3 კანდიდატის წარდგენა ევროპის საბჭოს საპარლამენტო ასამბლეისთვის. ყველაზე დიდი ხმაური სამოქალაქო სექტორსა და სამთავრობო კომისიაში საუკეთესო 5 კანდიდატს შორის ქალბატონ ევა გოცირიძის მოხვედრამ გამოიწვია, მაგრამ შედეგების მიხედვით, ქალბატონი ევა გოცირიძე ბოლო, მეხუთე ადგილზე გავიდა. ენის გამოცდის დროს, გამსვლელ 5 კანდიდატს შორის, ქალბატონ ევა გოცირიძეს ჰქონდა ყველაზე დაბალი შეფასება.
ბატონო პრემიერო! შეგახსენებთ, რომ იუსტიციის უმაღლესი საბჭოს მოქმედი წევრი ქალბატონი ევა გოცირიძე გახლდათ გირგვლიანის, მიქიაშვილის და სხვა მრავალი უკანონობის შემოქმედი იუსტიციის საბჭოს მდივნის ლევან მურუსიძის ერთ-ერთი მხარდამჭერი, მის მოსამართლედ გამწესების დროს. ქალბატონმა ევა გოცირიძემ ჩემთან სატელევიზიო დებატებში აღიარა, რომ იუსტიციის უმაღლესი საბჭოს ფარულ კენჭისყრამდე ჰქონდა გადაწყვეტილი ლევან მურუსიძის მხარდაჭერა და ეს იცოდა უზენაესი სასამართლოს თავმჯდომარემ. ასევე, ევა გოცირიძემ განაცხადა, რომ თუ იუსტიციის საბჭოს არამოსამართლე წევრები ხმას არ მისცემდნენ ლევან მურუსიძეს, ვერ მოხერხდებოდა სხვა მოსამართლეების დანიშვნა, რაც არაპირდაპირ, სავარაუდოდ ადასტურებს ევა გიცირიძის გარიგებაში მონაწილეობას.
ბატონო პრემიერო,
ევროპის საბჭოს საპარლამენტო ასამბლეას მხრიდან არსებობს რამდენიმე პრეცედენტი, როდესაც ასამბლეა უკან აბრუნებს წარდგენილ კანდიდატებს. მთავარი კრიტერიუმი, რითიც ასამბლეა ხელმძღვანელობს, არის მოსამართლეობის კანდიდატის მაღალი მორალური და ზნეობრივი რეპუტაცია, რომელიც, ჩემი, როგორც კომისიის წევრის შეფასებით, ქალბატონ ევა გოცირიძეს არ გააჩნია.
თუ საქართველოს მთავრობა, მიუხედავად ქალბატონ ევა გოცირიძის მიერ, ხუთ კანდიდატს შორის ბოლო ადგილის დაკავებისა, მაინც მიიღებს პოლიტიკურ გადაწყვეტილებას და ევროპის საბჭოს საპარლამენტო ასამბლეას, ევროპის ადამიანის უფლაბათა სასამართლოში ასარჩევ ერთ-ერთ კანდიდატად წარუდგენს ქალბატონ ევა გოცირიძეს მინდა გაგაფრთხილოთ, რომ ქალბატონი ევა გოცირიძე, ევროპის საბჭოს საპარლამენტო ასამბლეას მიერ არ იქნება არჩეული და საქართველოს ხელისუფლება სამარცხვინო ვითარებაში აღმოჩნდება. ვინაიდან, მე, ზაზა ხატიაშვილი ადვოკატთა ასოციაციის თავმჯდომარე და სამთავრობო კომისიის წევრი, სტარსბურგში, ევროპის საბჭოს შენობის წინ დავიწყებ შიმშილობას.
ბატონო პრემიერო !
ჩემი ცნობადობის გათვალისწინებით შევხვდები ყველა პირველი პირს, სტრასბურგში გავმართავ პრესკონფერენციას, რაც საკმაოდ დააზარალებს საქართველოს იმიჯს.
ბატონო პრემიერო, მე არ მინდა საქართველოს იმიჯისთვის ზიანის მიყენება, ამიტომ გთხოვთ, არ მიიღოთ პოლიტიკური გადაწყვეტილება. მოგიწოდებთ, მიიღეთ ზნეობრივი, სამართლიანი გადაწყვეტილება და ევროპის საბჭოს საპარლამენტო ასამბლეას, ევროპის ადამიანის უფლებათა სასამართლოში დასანიშნად წარუდგინეთ ის 3 კანდიდატი, ვინც სამთავრობო კომისიის შეფასებით პირველი სამი ადგილი დაიკავა", _ აღნიშნულია ხატიაშვილის ღია წერილში.
ცნობისთვის, ადამიანის უფლებათა ევროპული სასამართლოს მოსამართლეობის მსურველთა ხუთეული 29 თებერვალს შეირჩა.
იუსტიციის სამინისტროს ინფორმაციით, კომისიამ გასაუბრების შედეგად, ქულათა ჯამით, ხუთი კანდიდატი შეარჩია – ალექსანდრე ბარამიძე, ნანა მჭედლიძე, გიორგი ბადაშვილი, ანა დოლიძე და ევა გოცირიძე.
სტრასბურგის სასამართლოში საქართველოდან წარდგენილი მოსამართლის კანდიდატურებთან გასაუბრებას სპეციალურად ამ მიზნით შექმნილი სამთავრობო კომისია ატარებდა.
იუსტიციის სამინისტროს ცნობით, კომისიის 11-მა წევრმა 11 კანდიდატი შეაფასა. მეთორმეტე კანდიდატმა ნინო პეპანაშვილმა საკუთარი კანდიდატურა გასაუბრების დღეს მოხსნა. კომისიის წევრთა შეფასებები, მათივე თანდასწრებით დაჯამდა და ყველაზე მაღალი ქულების მქონე კანდიდატთა ხუთეული შედგა, რომელიც მთავრობას წარედგინა.
ზემოთ აღნიშნული ხუთეულიდან ევროსასამართლოს მოსამართლეობის კანდიდატი მთავრობამ 25 მაისამდე უნდა შეარჩიოს.
ამავე თემაზე:
მინისტრების მოადგილეები სტრასბურგის მოსამართლეობის მსურველთა სიაში
მათ არ აქვთ მორალური უფლება ევროპული სასამართლოს მოსამართლეები იყვნენ – ხატიაშვილი
სტრასბურგის სასამართლოში საქართველოდან წარსადგენი მოსამართლეობის მსურველთა ხუთეული შეირჩა
ადამიანის უფლებათა ევროპული სასამართლოს მოსამართლეობის კანდიდატები
სტრასბურგის სასამართლოში საქართველოს მოსამართლის შერჩევის რეგულაციები დარღვევით განხორციელდა
