საავადმყოფოს დირექტორი, ექიმი დავით მდინარაძე “გურია ნიუსთან” საუბარში, ამბობს, რომ ყოველთვის უსაყვარლეს პროფესიულ მოვალეობას ასრულებდა და მომავალშიც ასე გააგრძელებს.
_ ბატონო დავით, დიდი ხანია, გავრცელდა ხმები თქვენი საბავშვო კლინიკის ახალ სამედიცინო ცენტრ შპს “მედალფასთან” შეერთების შესახებ. რას იტყვით ამ ინფორმაციის შესახებ?
_ ახალ კლინიკაში _ ახალ სამედიცინო ცენტრში გამოიყო პალატები და საწოლები ბავშვთა სამედიცინო მომსახურებისთვის. ჯერჯერობით, ირკვევა დეტალები პირობებთან დაკავშირებით, რომელიც უნდა შეექმნას ბავშვებს. ალბათ, უახლოეს ხანში გაირკვევა, რა მოხდება.
_ თქვენ, როგორც გამოცდილ და ავტორიტეტულ ექიმს, მიგაჩნიათ მიზანშეწონილად, რომ ეს სასიკეთო ცვლილებაა?
_ მე მიმაჩნია, რომ ამჟამად იქ არის ძალიან კარგი პირობები მომსახურებისთვის. კლინიკის მატერიალურ-ტექნიკური ბაზაც კარგია და პირობებიც, აკმაყოფილებს სტანდარტებს.
_ როგორ ფიქრობთ, თქვენ იქ რაიმე თანამდებობას დაიკავებთ? ვრცელდება ინფორმაცია, რომ “მედალფამ” შთანთქა ოზურგეთის ბავშვთა სამკურნალო ცენტრი.
_ ესეც არ არის ჯერ გარკვეული. მე, როგორც აქამდე ვიყავი ძირითადად ექიმი, მომავალშიც იგივე მიმართულებით ვიმუშავებ. ადმინისტრაციულ სამუშაოს ვასრულებდი 20%-ის ოდენობით. უფრო მეტად, ჩემი სიცოცხლის ბოლომდე, ჩემი საყვარელი საქმით ვიქნები დაკავებული.
_ ამბობენ, რომ ბევრი გამოცდილი ექთანი წავა სახლში და აფთიაქი, რომელიც თქვენი ძალისხმევით შეიქმნა, გაუქმდება.
_ ეს მენეჯმენტის საკითხებია და კლინიკის ხელმძღვანელობაზე იქნება დამოკიდებული. ალბათ, ეყოლება იმდენი ექთანი, რამდენიც მას და ამ საქმიანობას სჭირდება. გარკვეული შემცირება, რასაკვირველია, იქნება. ყველა ექიმი გადადის _ მათი შემცირება არ მოხდება, მხოლოდ მედდებთან დაკავშირებით არის პრობლემები.
_ ტესტირება თუ ჩაუტარდა მედპერსონალს?
_ მედდებს ჩაუტარდათ ტესტირება და რამდენიმე დღეში პასუხიც იქნება. აქედან იმდენ მედდას აიყვანენ, რამდენიც დასჭირდებათ.
_ ახალი სამედიცინო ცენტრი კი გაიხსნა ზარ-ზეიმით, მაგრამ დიდად კმაყოფილი არავინ არ არის. იგივე რომ მოხდეს ბავშვთა ცენტრის გადასვლის შემდეგაც?
_ როდესაც სადაზღვევო კულტურა შემოვა ქვეყანაში, როგორც საჭიროა ისე, ყველაფერი სხვანაირად იქნება. თქვენ იცით, რომ სახელმწიფო აპირებს მოსახლეობის ძალიან მაღალი პროცენტი დააზღვიოს, თუნდაც ის, რომ ადამიანს საშუალება ეძლევა პროფილაქტიკური გამოკვლევები ჩაიტაროს, ძალიან კარგი შეღავათია. ის ხომ დაზღვეულია და ულიმიტოდ შეუძლია მიაკითხოს ამბულატორიას, თავისი ჯანმრთელობა აიყვანოს კონტროლის ქვეშ. ვთქვათ სიმართლე _ ეს კულტურაც ნაკლებად არის გამჯდარი ხალხში. არ მგონია და ვერც ერთი ექიმი ვერ გაბედავს, არ მიიღოს პაციენტი, რომელიც მძიმე მდგომარეობაშია.
_ ასეთი ფაქტების შესახებ რომ ხშირად საუბრობენ?
_ თუ ადამიანი არ არის კმაყოფილი ან უდიერად მოეპყრო ექიმი, მას აქვს სრული უფლება, გაასაჩივროს, აიყვანოს ადვოკატი. ავადმყოფის უფლება-მოვალეობებში შედის ისიც, რომ აირჩიოს ექიმი, კლინიკა. მაგალითად თუ “ალფას” დაზღვეულს სურს თბილისის კლინიკაში მკურნალობა, შესაბამისი დოკუმენტური დადასტურების შემდეგ, გადამისამართება მოხდება.
_ მოქალაქეები ჩივიან, რომ მკურნალობის ხარჯები ძალიან მაღალია.
_ ფასებს ადგენს ადმინისტრაცია, ანუ სტანდარტი წმინდა ეკონომიკური საკითხია. როგორც ექიმი, ნაკლებად ვარ ჩახედული ამ საქმეში, მაგრამ რაღაც დეტალები ვიცი. ეს ფასები, შეიძლება, დღეს ძალიან მაღალი იყოს მოსახლეობისთვის, მაგრამ საერთო ბაზრის პირობაზე ძალიან დაბალი ფასია. თუმცა, ამჯერად ყველა ვაღიარებთ იმას, რომ ქვეყანას და მოსახლეობას უჭირს.
_ დაბალი ფასი რას ჰქვია, როცა მოსახლეობის უმრავლესობას პურის ფულის შოვნა პრობლემად აქვს ქცეული?
_ ქვეყნის ეკონომიკური სიძლიერისთვის უნდა იზრუნოს ხელისუფლებამ და თითოეული ადამიანიც ვალდებულია, თავისი აგური დადოს, არავინ არ უნდა იზარმაცოს. მე მიმაჩნია, რომ ქვეყანა გამოვა გარდამავალი პერიოდიდან და ყველაფერი კარგად იქნება.
