ჩოხატაურში ნოემბერში მომხდარი ყაჩაღობიდან 6 თვე გავიდა. საქმე, რომელიც შინაგან საქმეთა მინისტრს გიორგი მღებრიშვილს პირად კონტროლზე ჰყავს აყვანილი, ამ დრომდე გაუხსნელია.
საკრებულოს თავმჯდომარის ზაალ მამალაძის და “გურია ნიუსის“ გამომცემლის – ია მამალაძის ოჯახის დაყაჩაღებას პოლიტიკურ წრეებში ბევრი გამოხმაურება მოჰყვა. უმრავლესობა დარწმუნებულია, რომ ეს რიგითი ყაჩაღობა არ ყოფილა, პოლიტიკურ მოტივით ჩადენილ დანაშაულზე გააკეთეს აქცენტები პარლამენტარებმაც და სამართალდამცავ ორგანოებს საქმის დროულად გამოძიება მოსთხოვეს, თუმცა, ეს "დროული გამოძიება" უკვე ექვს თვეს ითვლის და ამდენი ხანია ხელისუფლება "სილაგაწნულია".
შინაგან საქმეთა სამინისტროში ამბობენ, რომ გამოძიება აქტიურად მიმდინარეობს, თუმცა, საქმის დეტალებზე არ საუბრობენ. არც იმას ამბობენ, ჰყავთ თუ არა ეჭვმიტანილები.
"გურია ნიუსის" ინფორმაციით, სავარაუდო დამნაშავეთა ვიდეოკადრები გამოძიებამ კლინიკა "ავერსის" კამერიდან ყაჩაღობის მეორე დღეს ამოიღო. ასევე დაკითხულია იმ მიკროავტობუსის მძღოლი, რომელსაც სამი თავდამსხმელი ქუთაისიდან ჩოხატაურში ჩამოჰყვა.
არსებული ინფორმაციით, ყაჩაღები ჩოხატაურში 28 ნოემბერს, პოლიციის რეიდის დასრულებისთანავე ჩამოვიდნენ. მუშების ტანსაცმელში გამოწყობილი პირები მამალაძის სახლის წინ მდებარე მიტოვებულ სახლს დაღამებამდე აფარებდნენ თავს, თან ელოდებოდნენ, თუ როდის დაბრუნდებოდა სახლში ოჯახის უფროსი, მიუხედავად იმისა, რომ ძარცვა (თუკი ძარცვა იყო თავდამსხმელთა მიზანი) მისი სახლში არყოფნისას უფრო უსაფრთხო იქნებოდა.
გამოძიებას ხელთ აქვს ფირები, რომელზეც სავარაუდო თავდამსხმელების ჩამოსვლაა აღბეჭდილი. ასევე, ზაალ მამალაძის მიერ ერთ-ერთი თავდამსხმელისთვის 
ჩამოგლეჯილი პირბადე. როგორც გამომძიებლები ამბობენ, ნიღაბზე დნმ-ის კვალია, თუმცა, ექსპერტიზის პასუხი ამ დრომდე უცნობია. ასევე, უცნობია, ვის ეკუთვნის თითის ანაბეჭდები, რომლებიც ზაალ მამალაძის კუთვნილ გატაცებულ ავტომანქანაში ბევრი იყო.
_ ყაჩაღობა, რომლის მიზანიც, ცხადია, ნაძარცვის წაღება არ ყოფილა (ყაჩაღებმა ის უმნიშვნელო თანხა წაიღეს, რაც თავად დაზარალებულებმა გადასცეს და რაიმეს მოძებნისთვის თავი არ შეუწუხებიათ – მაგიდაზე დატოვეს 200 ლარი, ფანჯრის რაფაზე – ყულაბა 140 ლარით, დიასახლისის ოქროს საყურეები, რომლებიც ყაჩაღობის მომენტში ეკეთა!), კვლავაც გაუხსნელია იმის მიუხედავად, რომ სამხილები საკმარისზე მეტია!
ყველაზე ცუდი ისაა, რომ ხელისუფლების პირველი პირების წუხილისა,ის, ვისაც გამოძიება ევალება, დემონსტრაციულად ახდენს დეკლარირებას: ქვეყანაში დაცული არავინაა, ამგვარი ფაქტების გახმაურებას აზრი არ აქვს, დანაშაულის არდაფარვა, საკუთარი პრინციპების ქონა, მიუკერძოებლობა და საზოგადოების სამსახურში ყოფნა ამ ქვეყანაში დასჯადია! _ ამბობს “გურია ნიუსის“ გამომცემელი ია მამალაძე.
მისი თქმით, ყოველგვარი ვადა, რომელიც გამოძიებისთვის ხელის არშეშლის გამო დაითქვა, გასულია და ხელისუფლებამ, საგამოძიებო ორგანოებმა პასუხი უნდა გასცენ მოქალაქეების, ცოტა ხანში კი ამომრჩევლების კითხვას – ვისი ინტერესები დგას ამ სამარცხვინო ღია ყაჩაღობის და კიდევ უფრო სამარცხვინო გამოძიების უკან?!
შინაგან საქმეთა სამინისტროს პრესსამსახურის ინფორმაციით, საქმეზე ინტენსიური საგამოძიებო მოქმედებები მიმდინარეობს, თუმცა, რა იგულისხმება "ინტენსიურ საგამოძიებო მოქმედებებში", არ გვპასუხობენ.
უწყებაში მხოლოდ იმას განმარტავენ, რომ ექსპერტიზები ჯერ არ დასრულებულა და არც შემთხვევის ადგილიდან აღებული დნმ-ის ნიმუშების პასუხია მათთვის ცნობილი.
_ მიუხედავად იმისა, რომ ხელისუფლების პირველი პირები უშუალოდ გასცემდნენ განკარგულებებს გამოძიების პროცესში უცხოელი ექსპერტების ჩართვის, ექსპერტიზების დროულად, სასწრაფოდ ჩატარების შესახებ, გამაოგნებელია შინაგან საქმეთა სამინისტროს პოზიცია, რომ მათ პასუხები არ აქვთ!
რამდენიმე შეხვედრის დროს მე მათ მივაწოდე ინფორმაცია საეჭვო გარემოებების, დაინტერესებული პირების შესახებ, მაგრამ შედეგი ხელისუფლებისთვის სამარცხვინოა. შემსრულებლების გარდა, გამოძიება ვალდებული იყო შემკვეთებზე გასულიყო, მაგრამ ამის ნაცვლად, კიდევ უფრო დაგვაზარალეს – ამჯერად თავად “დაგვაყაჩაღეს“ და “ნივთმტკიცების“ სახით “ამოღებული“ ავტომანქანა მეექვსე თვეა პოლიციაში უდგათ! – ამბობს ია მამალაძე.
ის, რომ პოლიციას ზაალ მამალაძისთვის ამ დრომდე არ დაუბრუნებია კუთვნილი ავტომანქანა, თურმე, “გამოძიების ინტერესებში შედის“:
_ გამოძიების ინტერესებიდან გამომდინარე, მამალაძის ავტომობილი დგას პოლიციის ეზოში, _ გვითხრეს შინაგან საქმეთა სამინისტროში.
რა ინტერესი აქვს გამოძიებას, როცა ყაჩაღობიდან 6 თვეა გასული და საქმეზე ახალი დეტალი არ არსებობს, პოლიციაში არ აკონკრეტებენ. შინაგან საქმეთა მინისტრის ყოფილი მოადგილე ავთანდილ (ზურა) ჩხაიძე ამბობს, რომ როგორც წესი, ექსპერტიზებს დიდი დრო არ სჭირდება:
_ გააჩნია, რა სახის ექსპერტიზაა ჩასატარებელი. როგორც წესი, ძალიან დიდი დრო არ აგვიანდება. მე არ ვიცნობ საქმის მასალებს და დეტალებზე არ შემიძლია საუბარი, თუმცა, რაც ვიცი, მაძლევს იმის თქმის საფუძველს, რომ ეს საქმე არაპროფესიონალების ხელშია. ეს მათი პრესტიჟის საქმეა _ ცხვირწინ დაუყაჩაღეს საკრებულოს თავმჯდომარე და ამ დრომდე არაფერია გარკვეული. თუ ვერ იძიებენ, ესეც უნდა თქვან. ალბათ, საქმეს ვეტერინარები იძიებენ და არა პოლიციელები, _ აღნიშნა „გურია ნიუსთან“ საუბრისას ჩხაიძემ.
პოლიციის ყოფილი მაღალჩინოსნისთვის გაუგებარია, რატომ არ უნდა უბრუნებდეს შსს ამდენ ხანს კუთვნილ ავტომობილს დაზარალებულს:
_ არანაირი საფუძველი იმისა, რომ ავტომობილი ამდენ ხანს პოლიციის ეზოში იყოს, არ არსებობს. ეს ჩემთვის აუხსნელი რამაა, _ ამბობს ჩხაიძე.
ასე, რომ, ყაჩაღობის საქმე, რომლის გახსნითაც ქვეყნის პირველი პირები არიან დაინტერესებული და რომლის შესახებაც, "გამოძიების ინტერესებიდან გამომდინარე" ნაკლები ინტენსივობით ვწერდით, ადგილიდან არ დაძრულა.
შესაბამისად, „სილაგაწნულ“ ხელისუფლებას საზოგადოებისთვის სათქმელი არაფერი აქვს, ცხადი მხოლოდ მომხდარი ფაქტია _- საკრებულოს თავმჯდომარის, მედიაორგანიზაციის ხელმძღვანელის ოჯახზე შეიარაღებული თავდასხმა მოხდა, რაც მოქალაქეებს იმის თქმის საფუძველს აძლევთ, რომ ამ ქვეყანაში ყველა დაუცველია!
