"უკანასკნელი წლების განმავლობაში მნიშვნელოვნად გაიზარდა განრიდებულ არასრულწლოვანთა რაოდენობა, დაიკლო პატიმრობის გამოყენების მაჩვენებელმა როგორც არასრულწლოვნებში, ისე სრულწლოვნებში", _ ამის შესახებ საქართველოს მთავარი პროკურორის, ირაკლი შოთაძის ანგარიშშია აღნიშნული, რომელიც მან საპროკურორიო საბჭოს დღეს წარუდგინა.
როგორც შოთაძე ანგარიშში წერს, პროკურორები საკმაოდ აქტიურად იყენებდნენ განრიდების მექანიზმს, რომლის საშუალებითაც ასეულობით არასრულწლოვანს მიეცა ნასამართლობის გარეშე ცხოვრების გაგრძელების შესაძლებლობა.
"პროგრამის ამოქმედების პირველ, 2010 წელს, განრიდებული იქნა 2 არასრულწლოვანი, 2011 წელს – 81, 2012 წელს – 125, 2013 წელს – 331, 2014 წელს – 203, ხოლო 2015 წელს – 296 არასრულწლოვანი.
2014 წელს, წინა წელთან შედარებით, განრიდებული არასრულწლოვნების რაოდენობის კლება განაპირობა სისხლის სამართლის კოდექსში განხორციელებულმა ცვლილებამ, რომლის თანახმად, არასრულწლოვნის მიერ ცივი იარაღის ტარება პირველ და მეორე ეტაპზე აღარ წარმოადგენს დანაშაულს. 2013 წელს განრიდებული 331 პირიდან, 122 მათგანის მიერ ჩადენილი იყო სწორედ საქართველოს სსკ-ის 2381 მუხლით გათვალისწინებული დანაშაული, ხოლო დარჩენილი 209 პირის მიერ ჩადენილი იყო სხვა დანაშაული (ძირითადად ქურდობა).
განრიდებული არასრულწლოვნების რაოდენობის მატებასთან ერთად შევამცირეთ არასრულწლოვანთა მიმართ სისხლის სამართლებრივი დევნის დაწყების შემთხვევები.
პროცენტულ ჭრილში, 2012 წელს განრიდებული იქნა დანაშაულის ჩამდენი არასრულწლოვნების 25%; 2013 წელს – 51%; 2014 წელს – 40%; 2015 წელს – 44%.
პროგრამის წარმატებულობაზე მიუთითებს ის ფაქტი, რომ მისი ამოქმედებიდან (2010 წლიდან) დღემდე განრიდებული არასრულწლოვნების მხოლოდ 8%-მა ჩაიდინა ახალი დანაშაული.
საერთაშორისო სტანდარტებით პროგრამა მაშინაც კი ითვლება წარმატებულად, როდესაც რეციდივის მაჩვენებელი 20% -ის ფარგლებშია.
არასრულწლოვანთა მიმართ ლიბერალური სისხლის სამართლის პოლიტიკა შევინარჩუნეთ 2016 წელსაც. 2016 წლის 4 თვის მდგომარეობით განრიდებული არასრულწლოვნების რაოდენობა მნიშვნელოვნად აღემატება წინა წლების ანალოგიურ პერიოდში განრიდებულ პირთა რაოდენობას, ხოლო სისხლისსამართლებრივი დევნის დაწყების მაჩვენებელი საგრძნობლად იკლებს. 2016 წლის 4 თვეში განრიდებულია დანაშაულის ჩამდენ არასრულწლოვათა 59 %.
გატარებული ღონისძიებების და ეფექტური სისხლის სამართლის პოლიტიკის შედეგად, არამხოლოდ გაიზარდა განრიდებულ არასრულწლოვანთა რაოდენობა, არამედ არასრულწლოვნებში შემცირდა პატიმრობის მაჩვენებელი.
2009წელს პატიმრობა გამოყენებული იქნა დევნადაწყებულ არასრულწლოვანთა 42.6%-ის მიმართ; 2010 წელს- 39.7%-ის მიმართ, 2011 წელს – 24.6%-ის მიმართ, 2012 წელს – 21.6%-ის მიმართ, 2013 წელს – 11.1%-ის მიმართ, 2014 წელს – 12.5%-ის, 2015 წელს კი მხოლოდ 9.4%-ის მიმართ. აღნიშნული მაჩვენებელი უკანასკნელი წლების განმავლობაში უპრეცედენტოდ დაბალია", _ აღნიშნულია მთავარი პროკურორის ანგარიშში.
ცნობისთვის, დამოუკიდებელი კოლეგიური ორგანო საპროკურორო საბჭო, რომლის წინაშეც არის მთავარი პროკურორი ანგარიშვალდებული, შედგება 15 წევრისგან. საბჭოს შემადგენლობაშია იუსტიციის მინისტრი, პროკურორთა კონფერენციის მიერ არჩეული 8 პროკურორი წევრი, ასევე, საქართველოს პარლამენტის უმცირესობის და უმრავლესობის წარმომადგენლები,მოსამართლეები და არასამთავრობო ორგანიზაციების/აკადემიური წრეების წარმომადგენლები.
საპროკურორო საბჭოს ევალება ექვს თვეში ერთხელ მაინც, ხოლო საპროკურორო საბჭოს წევრთა უმრავლესობის გადაწყვეტილებით – დაუყოვნებლივ, პროკურატურის ორგანოთა საქმიანობის შესახებ მთავარი პროკურორის/მთავარი პროკურორის მოადგილის იმ ანგარიშის მოსმენა, რომელიც შეეხება დანაშაულთან ბრძოლის პოლიტიკას, სტატისტიკურ მაჩვენებლებს, სამართალწარმოების პროცესში ადამიანის უფლებებისა და თავისუფლებების დაცვას, მაღალი საზოგადოებრივი ინტერესის მქონე საკითხებს, პროკურატურის საქმიანობის პრიორიტეტულ მიმართულებებს, პროკურორთა პროფესიული გადამზადებისა და განვითარების პროგრამებს და არ შეიცავს კონკრეტული სისხლის სამართლის საქმის გამოძიებასთან, სასამართლოში მის განხილვასთან ან/და საქმის ცალკეულ გარემოებებთან დაკავშირებულ საკითხებს.
