საქართველოს დემოკრატიული ინიციატივა (GDI) საკონსტიტუციო სასამართლოს კონსტიტუციური სარჩელით საქართველოს ორგანულ კანონში "საქართველოს საკონსტიტუციო სასამართლოს შესახებ" და საქართველოს კანონში "საკონსტიტუციო სამართალწარმოების შესახებ" შეტანილი ცვლილებების არაკონსტიტუციურად და ძალადაკარგულად გამოცხადების მოთხოვნოთ მიმართავს.
აღნიშნულთან დაკავშირებიტ ორგანიზაცია განცხადებას ავრცელებს, სადაც აღნიშნულია, რომ "საკანონმდებლო ცვლილებების პაკეტი, რომელიც საქართველოს პარლამენტმა მიიღო მრავლად შეიცავს ისეთ ნორმებს, რომლებიც არღვევს ადამიანის უფლებებსა და თავისუფლებებს, არაკონსტიტუციურია და საფრთხეს უქმნის დროულ და ეფექტურ საკონსტიტუციო მართლმსაჯულების განხორციელებას".
"მათ შორის აღნიშნულ ნორმათა მნიშვნელოვან ნაწილზე სამწუხაროდ არაფერი თქმულა საქართველოს პრეზიდენტის ვეტოშიც.
საქართველოს დემოკრატიული ინიციატივის მიერ მოამზადებული კონსტიტუციური სარჩელით გასაჩივრებულია ის ნორმები, რომლებიც შეეხეხბა თავმჯდომარის ან/და თავმჯდომარის მოადგილის ხელმეორედ არჩევის აკრძალვის კონსტიტუციურობას, 10 წლიანი უფლებამოსილების ვადის ავტომატური შეწყვეტის კონსტიტუციურობას, სადავო ნორმის შეჩერებასთან დაკავშირებთ პლენუმის იურისდიქციისა და ნორმათა მხოლოდ განმწესრიგებელ სხდომაზე შეჩერების შესაძლებლობის კონსტიტუციურობას, საქართველოს ორგანული კანონით გათვალისწინებულ საკითხებთან დაკავშირებით პლენუმის იურისდიქციის კონსტიტუციურობას, საკონსტიტუციო სასამართლოს წევრის მიერ პლენუმისათვის საქმის გადაცემის არსებული მოდელის კონსტიტუციურობას, გადაწყვეტილების ძალაში შესვლისათვის საკონსტიტუციო სასამართლოს სრული ტექსტის გამოქვეყნების ვალდებულების კონსტიტუციურობას, პლენუმის მიერ გადაწყვეტილების მიღებისათვის დადგენილი კვორუმის კონსტიტუციურობასა და საკონსტიტუციო სასამართლოს თავმჯდომარის არჩევის ახალი წესის ამოქმედების გადავადების კონსტიტუციურობას და სხვა.
იმის გათვალისწინებით, რომ სადავო ნორმათა ნაწილი წინააღმდეგობაშია არამხოლოდ კონსტიტუციის მე-2 თავით დაცულ ადამიანის უფლებებთან და თავისუფლებებთან, არამედ კონსტიტუციის სხვა მუხლებთანაც, საქმის განხილვაში მოსარჩელე მხარეა საქართველოს პარლამენტის წევრთა 1/5, ხოლო საქართველოს დემოკრატიული ინიციატივა გამოიყენებს მათ მიერ რწმუნებულებით დელეგირებულ უფლებამოსილებას და თავად წარმოადგენს მხარეს სასამართლოში", _ აღნიშნულია "საქართველოს დემოკრატიული ინიციატივის" განცხადებაში.
ცნობისთვის, საკონსტიტუციო სასამართლოს კანონში პარლამენტის მიერ შეტანილ ცვლილებებს პრეზიდენტმა 31 მაისს ვეტო დაადო. მოგვიანებით, პრეზიდენტის შენიშვნები პარლამენტმა სრულად გაიზიარა.
პრეზიდენტის მიერ პარლამენტისთვის შეთავაზებული წინადადებები შეეხება საკონსტიტუციო სასამართლოს პლენუმის მიერ გადაწყვეტილების მიღების კვორუმს, მოსამართლეთათვის 10-წლიანი უფლებამოსილების ვადის ბოლომდე გამოყენებასა და პლენუმისათვის განსახილველად გადაცემული საკითხის განხილვაზე უარის თქმის შემთხვევას.
თუმცა, არასამთავრობო ორგანიზაციების ნაწილი აღნიშნულ ცვლილებებს მხარს მაინც არ უჭერენ და კანონს ანტიკონსტიტუციურად მიიჩნევენ.
ამავე თემაზე:
საკონსტიტუციო სასამართლოსთან დაკავშირებით პრეზიდენტის შენიშვნები პარლამენტმა გაიზიარა
გიორგი მარგველაშვილი: ბოლომდე კმაყოფილი, სავარაუდოდ, ვერ იქნებიან
პრეზიდენტმა საკონსტიტუციო სასამართლოს შესახებ კანონში ცვლილებებს ვეტო დაადო
საკონსტიტუციო კონტროლი იზღუდება – "მოძრაობა სახელმწიფო ხალხისათვის"
"ეს ზღუდავს საკონსტიტუციო სასამართლოს" _ სადაო კანონპროექტი მიღებულია
