2016 წლის 8 ოქტომბერს, გარდა საქართველოს საპარლამენტო არჩევნებისა, აჭარის უმაღლესი საბჭოს არჩევნებიც ტარდება, რითაც უმაღლესი საბჭოს შემადგენლობა უნდა დაკომპლექტდეს. აღნიშნულის შესახებ საქართველოს პრეზიდენტის განკარგულებები უკვე გამოიცა, თუმცა ძალაში 2016 წლის 8 აგვისტოდან შევა.
აჭარის უმაღლესი საბჭოს შესახებ
აჭარის ავტონომიური რესპუბლიკის უმაღლესი საბჭო არის აჭარის ავტონომიური რესპუბლიკის წარმომადგენლობითი ორგანო, რომელიც თავისი კომპეტენციის ფარგლებში ახორციელებს საკანონმდებლო საქმიანობას; აკონტროლებს აჭარის ავტონომიური რესპუბლიკის მთავრობის საქმიანობას და ასრულებს საქართველოსა და აჭარის ავტონომიური რესპუბლიკის კანონმდებლობით განსაზღვრულ სხვა უფლებამოსილებებს.
აჭარის ავტონომიური რესპუბლიკის უმაღლესი საბჭოს შედგება საყოველთაო, პირდაპირი საარჩევნო უფლების საფუძველზე ფარული კენჭისყრით, 4 წლის ვადით, აჭარის ავტონომიური რესპუბლიკის ტერიტორიაზე მცხოვრები საქართველოს მოქალაქეების მიერ, პროპორციული საარჩევნო სისტემით არჩეული 12 და მაჟორიტარული საარჩევნო სისტემით არჩეული 6 დეპუტატისგან.
აჭარის ავტონომიური რესპუბლიკის უმაღლესი საბჭოს მორიგი არჩევნები ტარდება აჭარის ავტონომიური რესპუბლიკის უმაღლესი საბჭოს უფლებამოსილების ვადის ამოწურვის კალენდარული წლის ოქტომბერში.
აჭარის ავტონომიური რესპუბლიკის უმაღლესი საბჭოს არჩევნებს ნიშნავს საქართველოს პრეზიდენტი საქართველოს ორგანული კანონით დადგენილი წესით.
აჭარის ავტონომიური რესპუბლიკის უმაღლესი საბჭოს წევრად შეიძლება აირჩეს საარჩევნო უფლების მქონე საქართველოს მოქალაქე 25 წლის ასაკიდან.
აჭარის ავტონომიური რესპუბლიკის უმაღლესი საბჭოს წევრთა მანდატები განაწილდება მხოლოდ იმ პოლიტიკურ გაერთიანებასა და საარჩევნო ბლოკებს შორის, რომლებიც პროპორციული სისტემით ჩატარებულ არჩევნებში მიიღებენ მონაწილე ამომრჩეველთა ხმების 5 პროცენტს მაინც.
უმაღლესი საბჭოს უფლებამოსილება
აჭარის ავტონომიური რესპუბლიკის უმაღლესი საბჭო იღებს აჭარის ავტონომიური რესპუბლიკის კონსტიტუციას, აჭარის ავტონომიური რესპუბლიკის კანონებს "აჭარის ავტონომიური რესპუბლიკის სტატუსის შესახებ” საქართველოს კონსტიტუციური კანონით აჭარის ავტონომიური რესპუბლიკის განსაკუთრებული გამგებლობისათვის მიკუთვნებულ საკითხებზე, ასევე საქართველოს საკანონმდებლო აქტებით პირდაპირ განსაზღვრულ შემთხვევებში; ამტკიცებს აჭარის ავტონომიური რესპუბლიკის ბიუჯეტს;
აკონტროლებს აჭარის ავტონომიური რესპუბლიკის აღმასრულებელი ორგანოების მიერ აჭარის ავტონომიური რესპუბლიკის საბიუჯეტო სახსრების ხარჯვას;
ამტკიცებს აჭარის ავტონომიური რესპუბლიკის მთავრობის თავმჯდომარეს;
ამტკიცებს აჭარის ავტონომიური რესპუბლიკის მთავრობის შემადგენლობას მთავრობის თავმჯდომარის წარდგინებით;
უფლებამოსილია სრული შემადგენლობის ორი მესამედით უნდობლობა გამოუცხადოს აჭარის ავტონომიური რესპუბლიკის მთავრობას;
აწესებს კონტროლს მის მიერ მიღებული ნორმატიული აქტების აღსრულებაზე;
ირჩევს აჭარის ავტონომიური რესპუბლიკის უმაღლესი საბჭოს თავმჯდომარეს და მის მოადგილეს, კომისიების თავმჯდომარეებს, ამტკიცებს კომისიების შემადგენლობასა და პროპორციული წარმომადგენლობის კვოტებს;
კანონმდებლობით გათვალისწინებულ შემთხვევებში იძლევა თანხმობას თანამდებობის პირების დანიშვნასა და განთავისუფლებაზე; საქართველოს კონსტიტუციის 67-ე მუხლის პირველი პუნქტის შესაბამისად, სარგებლობს საკანონმდებლო ინიციატივის უფლებით საქართველოს პარლამენტში; უფლებამოსილია საქართველოს კანონმდებლობით დადგენილ შემთხვევებში კონსტიტუციური სარჩელით მიმართოს საქართველოს საკონსტიტუციო სასამართლოს; ახორციელებს "აჭარის ავტონომიური რესპუბლიკის სტატუსის შესახებ” ასქართველოს კონსტიტუციური კანონით, საქართველოს კანონმდებლობითა და აჭარის ავტონომიური რესპუბლიკისკანონმდებლობით მის კომპეტენციას მიკუთვნებულ სხვა უფლებამოსილებებს.
აჭარის უმაღლესი საბჭოს სტუქტურა და შემადგენლობა
აჭარის უმაღლესი საბჭოს თავმჯდომარეა ავთანდილ ბერიძე, რომელიც საბჭოში კოალიცია "ბიძინა ივანიშვილი – ქართული ოცნების" კვოტით აირჩა.
აჭარის უმაღლესი საბჭო 21 წევრისგან შედგება. ამჟამად უმაღლესი საბჭოს წევრები არიან: აბაშიძე მერაბი, ბარამიძე ირაკლი, ბაციკაძე დავითი, ბერიძე ავთანდილი, ბერიძე მურმანი, ბოლქვაძე თემური, დიასამიძე ასმათი, ვასაძე მედეა, ზამბახიძე პეტრე, თარგამაძე ეკატერინე, თხილაიშვილი ანზორი, კახიძე თემური, კუდბა სვეტლანა, მასალკინი გიორგი, მჟავანაძე მიხეილი, ფუტკარაძე ჯემალი, ღლონტი სულხანი, ძნელაძე აკაკი, ჩხაიძე რობერტი, ჩიტიშვილი ალექსანდრე და ჯაში ირაკლი.
რაც შეეხება აჭარის უმაღლეს საბჭოში შექმნილ კომისიებს, ამჟამად ფუნქციონირებს – აგრარულ და თვითმმართველობის საკითხთა კომისია, ადამიანის უფლებათა დაცვის საკითხთა კომისია, განათლების, მეცნიერების, კულტურისა და სპორტის საკითხთა კომისია, საკონსტიტუციო, იურიდიულ და საპროცედურო საკითხთა კომისია და ჯანმრთელობის დაცვისა და სოციალურ საკითხთა კომისია.
კომისიებს უმაღლესი საბჭო თავისი უფლებამოსილების ვადით ქმნის, ხოლო საქმიანობას საერთო კოორდინაციას უწევს უმაღლესი საბჭოს თავმჯდომარე.
რაც შეეხება ფრაქციებს, საბჭოში მოქმედებს 6 ფრაქცია – "ქართული ოცნება", "ქართული ოცნება – აჭარა", "ქართული ოცნება თავისუფლება", "დემოკრატიული აჭარა", "ერთიანი ნაციონალური მოძრაობა", "ნაციონალური მოძრაობა მაჟორიტარები".
საბჭოში ასევე მოქმედებს გენდერული თანასწორობის საბჭო, რომელიც 2014 წელს შეიქმნა და მედეა ვასაძე ხელმძღვანელობს.
კანონმდებლობა
აჭარის ავტონომიური რესპუბლიკის უმაღლესი საბჭოს სტატუსს საქართველოს კონსტიტუციური კანონი განსაზღვრავს. ხოლო აჭარის ავტონომიური რესპუბლიკის უმაღლესი საბჭოს შიდა ორგანიზაციას, პროცედურებს, საქმიანობის წესს (სავალდებულოა უმაღლესი საბჭოს წევრებისათვის, აგრეთვე განსაზღვრულ ფარგლებში – უმაღლესი საბჭოს კონტროლს დაქვემდებარებული ყველა ორგანოსა და ორგანიზაციისათვის) განსაზღვრავს აჭარის ავტონომიური რესპუბლიკის უმაღლესი საბჭოს რეგლამენტი.
