14 ივნისს, კულტურის სამინისტროში ფოლკლორის საერთაშორისო ფესტივალთან დაკავშირებით პრესკონფერენცია გაიმართა. ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე, ფოლკლორის ცენტრის ხელმძღვანელი გიორგი დონაძე, საქართველოში თურქეთის ელჩი ლევენთ გუმრუქჩუ, გურიის გუბერნატორი გია სალუქვაძე და ფესტივალის სხვა მხარდამჭერები უძღვებოდნენ.
ფოლკლორის საერთაშორისო ფესტივალი, პროექტის "Check in Georgia" ფარგლებში, ოზურგეთსა და შეკვეთილში 1, 2 და 3 სექტემბერს გაიმართება. ფესტივალში მონაწილეობას მიიღებენ საქართველოს, იტალიიის, შვეიცარიის, საფრანგეთისა და თურქეთის ანსამბლები. სამდღიან ფესტივალს 3 სექტემბერს გალა კონცერტი დახურავს, რომელიც შეკვეთილში, ახლადგახსნილ საკონცერტო დარბაზში "Black Sea Arena"-ზე გაიმართება.
"Black Sea Arena" ფესტივალის ოფიციალური მხარდამჭერია. ფოლკლორის საერთაშორისო ფესტივალი წელს პირველად ტარდება. მასში მონაწილეობას მიიღებენ სხვადასხვა ქვეყნის ფოლკლორული კოლექტივები და ქართველ მაყურებელს ქვეყნის ხალხურ შემოქმედებას გააცნობენ. ფოლკლორის საერთაშორისო ფესტივალი საქართველოს ფოლკლორის სახელმწიფო ცენტრის ორგანიზებითა და საქართველოს კულტურისა და ძეგლთა დაცვის სამინისტროს და ადგილობრივი მუნიციპალიტეტის მხარდაჭერით გაიმართება.
