"ადგილობრივი თვითმართველობის რეფორმა კბილებით გავიტანეთ, რადგან გუნდშიც ძალიან ბევრს არ უნდოდა. დღესაც ბევრი შფოთავს და მესმის, რომ აი გამგებელს ვერაფერს მოუხერხებ, არავისი ესმის, ამ დროს არ იცის. საიდან უნდა მოიყვანო ამდენი გამგებელი და მცოდნე უეცრად? გამოცდილება რეგიონებში არ იყო, მაგრამ თუ გვინდა, რომ იყოს მომავალში, აი ამ უბედურებასაც ვიტანთ დღეს."- ეს განცხადება საქართველოს ყოფილმა პრემიერ-მინისტრმა ბიძინა ივანიშვილმა ჟურნალისტებთან შეხვედრის დროს გააკეთა.
"პრემიერობის დროს რამდენიმე გამგებელთან შეხვედრა მქონდა. ვერ გაუცნობიერებიათ, რომ ფართო უფლებამოსილება აქვთ, ეხლა ამის გაცნობიერების პროცესი მიდის. ზოგმა კი ეს ზედმეტად გამოიყენა. რა თქმა უნდა, აკლიათ კვალიფიკაცია. უმრავლესობას მართვის გამოცდილება არ აქვს და მითუმეტეს ეკონომიკა არ იციან კარგად", – განაცხადა ივანიშვილმა.
ბიძინა ივანიშვილის განცხადებაზე კომენტარს არ აკეთებს ლანჩხუთის მუნიციპალიტეტის გამგებელი, ზაზა ურუშაძე. ჩვენ მასთან დაკავშირება პრესსამსახურის საშუალებით ვცადეთ.
ოზურგეთის მუნიციპალიტეტის გამგებელი მერაბ ჭანუყვაძე ამბობს: "რა თქმა უნდა, ბატონ ბიძინას აქვს მეტი ინფორმაცია და საფუძველი, შეაფასოს კონკრეტული ადამიანები. მე ვერ ვიქნები შემფასებელი. მე თვითონ გამგებელი ვარ და უმჯობესია სხვამ შეაფასოს ჩვენი საქმიანობა. პირადად მე, თვითკმაყოფილი ნამდვილად არ ვარ, თუმცა ვმუშაობთ, ჩვენი კომპეტენციის ფარგლებში ვაკეთებთ მაქსიმუმს, იმისთვის, რომ მუნიციპალიტეტის მოსახლეობის ყოფა უკეთესი გახდეს და ის პრობლემები, რომელიც ჩვენს მთავრობას დახვდა, ეტაპობრივად მოვაგვაროთ. იმედია შესრულებული სამუშაოები უკეთ გამოჩნდება და შემდეგ შეფასებაც შესაბამისი იქნება," გვითხრა მერაბ ჭანუყვაძემ.
"მე ბატონ ბიძინასთან, მისი პრემიერობის დროს შეხვედრა არ მქონია და ვერც მექნებოდა რადგან იმ დროისათვის გამგებელი არ ვიყავი, შესაბამისად ამ განცხადების ადრესატი მე ვერ ვიქნები, მით უმეტეს რომ მართვის გამოცდილება საკმაოდ გამაჩნია."- ამბობს ჩოხატაურის მუნიციპალიტეტის გამგებელი, ირაკლი კუჭავა.
მისივე თქმით, ზოგადად პროვინციაში , არა მხოლოდ ჩვენს ქვეყანაში, წარმატებული ადამიანების დეფიციტია, მით უმეტეს პოლიტიკაში, რადგან წარმატებულები დედაქალაქებისკენ მიისწრაფიან.
"მე ყველასთან დაკავშირებით ვერ ვისაუბრებ, თუმცა ბევრ ჩემს კოლეგას ვიცნობ, რომლებიც კარგად უძღვებიან საქმეს." – თქვა ჩვენთან საუბრის დროს ირაკლი კუჭავამ.
