ევროპის ადამიანის უფლებათადამცველი სასამართლო საქართველო-რუსეთს შორის 2008 წლის აგვისტოში მომხდარი კონფლიქტის საქმის განხილვას აგრძელებს.
სასამართლოს ვებ-გვერდზე გამოქვეყნებული დოკუმენტის თანახმად, 6 ივნისიდან 17 ივნისის ჩათვლით 33 მოწმის მოსმენა შედგა, რომელთაგან 16 საქართველოს მთავრობის, 11 რუსეთის მთავრობის, ხოლო 6 სასამართლოს მიერ იყო დაბარებული.
როგორც ცნობილია, 2008 წლის 11 აგვისტოს საქართველომ ადამიანის უფლებათა ევროპულ სასამართლოში შეიტანა სახელმწიფოთაშორისი საჩივარი 2008 წლის აგვისტოს ომის და შემდგომი ოკუპაციის დროს რუსეთის ფედერაციის მიერ ადამიანის უფლებათა დარღვევების შესახებ.
საქართველოს მთავრობის მოთხოვნით და მის მიერ მიწოდებული ინფორმაციის საფუძველზე, 2008 წლის 12 აგვისტოს სასამართლომ დაადგინა, რომ არსებობდა კონვენციის სერიოზული დარღვევების რეალური და განგრძობადი საფრთხე და მიიღო გადაწყვეტილება რუსეთისა და საქართველოსათვის დროებითი ღონისძიებების დაკისრების შესახებ.
როგორც ცნობილია, საჩივარი ემყარება ევროპული კონვენციისა და მისი დამატებითი ოქმების შემდეგ მუხლებს: მე-2 მუხლი (სიცოცხლის უფლება), მე-3 მუხლი (წამების აკრძალვა), მე-5 მუხლი (თავისუფლებისა და უსაფრთხოების უფლება), მე-8 მუხლი (პირადი და ოჯახური ცხოვრების დაცულობის უფლება), მე-13 მუხლი (სამართლებრივი დაცვის ქმედითი საშუალების უფლება), 1-ლი დამატებითი ოქმის 1-ლი მუხლი (საკუთრების დაცვა), 1-ლი დამატებითი ოქმის მე-2 მუხლი (განათლების უფლება) და მე-4 დამატებითი ოქმის მე-2 მუხლი (მიმოსვლის თავისუფლება).
გავრცელებული ინფორმაციით, 2011 წლის 22 სექტემბერს ადამიანის უფლებათა ევროპულ სასამართლოში გაიმართა ზეპირი განხილვა საჩივრის მისაღებობასთან დაკავშირები, ხოლო 2011 წლის 13 დეკემბრის გადაწყვეტილებით, სასამართლომ საჩივარი მისაღებად ცნო. 2012 წლის 3 აპრილს კი საქმე განსახილველად სასამართლოს დიდ პალატას გადაეცა.
როგორც ცნობილია, სასამართლოში საქმის განხილვა გრძელდება.
