ნატო-ს რიგით 28-ე სამიტი დღეს გაიხსნება. ეს ნატო-ს ისტორიაში პირველი სამიტია, რომელიც პოლონეთში გაიმართება.
სამიტში მონაწილეობას მიიღებს 58 ოფიციალური დელეგაცია, მათ შორის 28 წევრი სახელმწიფო და მონტენეგრო, ასევე 26 პარტნიორი ქვეყანა და გაერო-ს, ევროკავშირის, მსოფლიო ბანკისა ნატო-ს საპარლამენტო ასამბლეის დელეგაციები.
საქართველოს დელეგაცია, საქართველოს პრეზიდენტის გიორგი მარგველაშვილის ხელმძღვანელობით, NATO -ს სამიტზე დასასწრებად ვარშავას დღეს ეწვევა.
საქართველოს პრეზიდენტი სიტყვით გამოვა NATO -ს წევრი და პარტნიორი ქვეყნების სახელმწიფო და მთავრობის მეთაურების შეხვედრაზე, რომელიც ავღანეთის თემაზე – ",მტკიცე მხარდაჭერის მისია" იმართება.
ქვეყნის პირველი პირი NATO -ს პარტნიორი ქვეყნების დელეგაციათა ხელმძღვანელების პატივსაცემად გამართულ სამუშაო სადილსაც დაესწრება.
სამიტის ფარგლებში პირველად იმართება NATO -საქართველოს კომისიის სხდომა, სადაც დაგეგმილია საქართველოს საგარეო საქმეთა მინისტრის მონაწილეობა, მიხეილ ჯანელიძე ასევე დაესწრება სამუშაო ვახშამს, რომელიც NATO -ს წევრი და პარტნიორი ქვეყნების საგარეო საქმეთა მინისტრების პატივსაცემად იმართება.
ხოლო საქართველოს თავდაცვის მინისტრი თინათინ ხიდაშელი მონაწილეობას მიიღებს ურთიერთთავსებადობის პლატფორმის შეხვედრაში, რომელიც NATO -ს წევრი და პარტნიორი ქვეყნების თავდაცვის მინისტრების დონეზე იმართება.
NATO -ს სამიტის ფარგლებში, დაგეგმილია საქართველოს პრეზიდენტის, საგარეო საქმეთა მინისტრის და თავდაცვის მინისტრის ორმხრივი შეხვედრებიც.
საქართველოს დელეგაციის შემადგენლობაში არიან საქართველოს პრეზიდენტი, საქართველოს საგარეო საქმეთა მინისტრი, თავდაცვის მინისტრი, საქართველოს სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში, საქართველოს ეროვნული უშიშროების საბჭოს მდივანი, საქართველოს პრეზიდენტის ადმინისტრაციის უფროსი და სხვა ოფიციალური პირები.
ჩრდიალოატლანტიკური ალიანსის მიერ გამოქვეყნებული დღის წესრიგის თანახმად, სამიტი ნატო-ს გენერალური მდივნის იენს სტოლტენბერგისა და პოლონეთის პრეზიდენტის ანჯეი დუდას მისასალმებელი სიტყვით გაიხსნება, რის შემდეგაც შეხვედრის მონაწილეები ერთობლივ ფოტოს გადაიღებენ.
ჩრდილოატლანტიკური საბჭოს შეხვედრას პირველად დაესწრება მონტენეგრო, რომელიც ალიანსში ჯერჯერობით დამკვირვებლის სტატუსით სარგებლობს.
ვარშავის სამიტის პირველ დღეს დაგეგმილია პარალელური შეხვედრების გამართვა, მათ შორის ნატო-საქართველოს კომისიის სხდომა საგარეო საქმეთა მინისტრების დონეზე.
სამიტის მეორე დღე დაიწყება ავღანეთის დელეგაციასთან შეხვედრით, რომელსაც ავღანეთის პრეზიდენტიც დაესწრება. აღნიშნულ შეხვედრაში, საერთაშორისო ორგანიზაციების გარდა, მონაწილეობას მიიღებენ ის ქვეყნებიც, რომლებიც "მტკიცე მხარდაჭერის" მისიაში მონაწილეობენ.
სამიტი დასრულდება ნატო-უკრაინის კომისიის სხდომით და შეხვედრით უკრაინის პრეზიდენტ პეტრო პოროშენკოსთან.
გარდა ამისა, 9 ივლისს ნატო-ს წევრი ქვეყნების თავდაცვის მინისტრები შეხვდებიან კოლეგებს 25 ქვეყნიდან, მათ შორის საქართველოდან, სომხეთიდან და აზერბაიჯანიდან.
ნატო-ს ვარშავის სამიტზე მოსალოდნელია მნიშვნელოვანი გადაწყვეტილებების მიღება, ალიანსის შეკავებისა და თავდაცვის სტრატეგიის გაძლიერებისა და ალიანსის საზღვრებთან სტაბილურობის უზრუნველყოფის საკითხზე.
ნატო-ს წევრი ქვეყნები დაამტკიცებენ ესტონეთში, ლატვიაში, ლიტვასა და პოლონეთში 4 მრავალეროვნული ბატანლიონის განლაგების გეგმას, ასევე გადადგამენ ნაბიჯებს კიბერუსაფრთხოების სისტემის გაუმჯოსებების კუთხით.
ვარშავის სამიტზე მიიღებენ გადაწყვეტილებას ერაყში ნატო-ს საწვრთნელი მისიის გახანგრძლივებაზე და ხმელთაშუა ზღვის ცენტრალურ ნაწილში ალიანსის როლის გაფართოებაზე.
გარდა ამისა, ვარშავის სამიტზე ნატო მიიღებს გადაწყვეტილებას ავღანეთისთვის სამხედრო და ფინანსური დახმარების გაგრძელებასა და საქართველოსთან, უკრაინასა და მოლდოვასთან პოლიტიკური და პრაქტიკული თანამშრომლობის გაძლიერებაზე.
პირველად, ჩრდილოატლანტიკური ალიანსის სამიტი 1957 წელს გაიმართა.
