კრავეიშვილების წუხილი
დაბა ლაითურში მცხოვრები გიორგი კრავეიშვილისა და ფრიალა ხარჩილავას ოჯახი პრეზიდენტის შესახვედრად ყველაზე ადრე მოვიდა. მართალია, ისინი მიხეილ სააკაშვილს ვერ შეხვდნენ, მაგრამ პრობლემების შესახებ “გურია ნიუსთან” ისაუბრეს:
ფრიალა ხარჩილავა: _ ჩვენი პრობლემის შესახებ მინდა ვაცნობო მიხეილ სააკაშვილს, მაგრამ ვინ მიშვებს? ადგილობრივი პოლიცია არ გვიშვებს, მათ იციან ჩვენი ამბავი – აჩიკომ, პალიკომ… მაგრამ კაციშვილი არ გვაქცევს ყურადღებას. ხუთი წელიწადია განცხადება მაქვს შეტანილი გამგეობაში _ ბინა დანგრეული მაქვს, სახლ-კარი არ მაქვს, დახმარებას არ მაძლევენ. წერილები ჩვენს გამგეობას მივწერე. დახმარება მქონდა, მაგრამ მომიხსნეს. ორი შვილი მყავს, ტრაგედია დატრიალდა და ორივე ძმები ახლა პატიმრები არიან, ძლივს ვირჩენთ თავს, შვილიშვილებს ხომ უნდა პატრონობა? მოვიდნენ და ყველამ ნახოს როგორ ვცხოვრობთ. რა იქნება მოგვაქციონ ყურადღება?
გიორგი კრავეიშვილი: _ 7-8 თვეა ავად ვარ. 100 მეტრი ფეხით გავიარე და ცუდად ვარ. ლაითურში ვცხოვრობთ. ახლა ვეღარ ვმუშაობ. შვილებს ვფიცავარ, თუ დასაწოლი იყოს სახლში, ყველგან წვიმს. 1000 ლარი რომ მოეცათ, შიფერით გადავხურავდი სახლს და ფანჯარასაც გავაკეთებდი. სულით და გულით მინდა მუშაობა, მაგრამ სამკურნალო ვარ, 200-300 ლარით მაინც დამეხმარონ. ოჯახში წყალი ვერ შემაქვს. მოვიდეს ტელევიზია და გადაიღონ ჩვენი პრობლემები.
სტუდენტები…
მიხეილ სააკაშვილის მთავარი გმირები დღეს სტუდენტები იყვნენ. “გურია ნიუსის” ინფორმაციით, ისინი ბათუმის შოთა რუსთაველის სახელმწიფო უნივერსიტეტიდან და ქუთაისის აკაკი წერეთლის სახელმწიფო უნივერსიტეტიდან იყვნენ. ბევრი მათგანი ჟურნალისტებთან კომენტარს არ აკეთებდა.
_ გამარჯობათ, რომელი ქალაქიდან ბრძანდებით? _ შევეკითხე ერთ-ერთ ახალგაზრდა გოგონას.
_ ქუთაისიდან.
_ რატომ ჩამოხვედით.
_ ID ბარათები უნდა გადმოგვცენ.
_ როდის გახდა ცნობილი ეს ამბავი? _ აქ კითხვა ახალგაზრდა მამაკაცმა გაგვაწყვეტინა საუბარი, რომელიც სიას კითხულობდა და ამოწმებდა თუ ჩამოიყვანა იმ რაოდენობის სტუდენტი, რაც იყო ჩამოსაყვანი.
_ გვაინტერესებს, რა ხდება და რატომ ჩამოხვედით?
_ თქვენ არ იცით, რა ხდება?
_ იქნებ, გაგვეცნოთ…
_ ერთი წუთით მადროვე, _ გვითხრა მან.
კითხვაზე პასუხი ერთ-ერთმა სტუდენტმა ნინო გორგაძემ გაგვცა, რომელიც ბათუმის შოთა რუსთაველის სახელმწიფო უნივერსიტეტს წარმოადგენდა: _ პრეზიდენტს უნდა შევხვდეთ.
მოგვიანებით, მამაკაცმა, რომელმაც ჩვენთან არ ისურვა ინტერვიუ, რამდენიმე წუთის შემდეგ მოკლედ გვითხრა, რომ იუსტიციის სახლის გახსნა და სტუდენტური ბარათის პრეზენტაცია იგეგმებოდა:
_ სპეციალური პროგრამით სტუდენტებს გადაეცემათ ID ბარათები, _ გვითხრა მინდია ბერეკაშვილმა, რომელიც აკაკი წერეთლის სახელობის სახელმწიფო უნივერსიტეტს წარმოადგენდა. მისივე თქმით, მან ის სტუდენტები ჩამოიყვანა, რომლებიც გურიიდან იყვნენ და ახლა ქუთაისში სწავლობდნენ.
_ შოთა რუსთაველის სახელმწიფო უნივერსიტეტის სტუდენტებს შეხვედრა გვაქვს პრეზიდენტთან; _ არ ვიცი, რა ხდება; _ იუსტიციის სახლის გახსნაა; _ არ ვაკეთებ კომენტარს; არანაირი ინტერვიუ; _ ეს სიტყვები იმ სტუდენტებს ეკუთვნით, რომლებმაც პრეზიდენტისგან ID ბარათები მიიღეს.
გიორგი ვაშაძე: ჩვენთვის არჩევნებს არანაირი მნიშვნელობა არ აქვს!
_ დავიჯეროთ ბატონო გიორგი, რომ თქვენთვის არჩევნებს არანაირი მნიშვნელობა აქვს?
_ ნამდვილად არა.
_ ძნელი დასაჯერებელია ნამდვილად…
_ დღევანდელი შეხვედრის მიზანი ძალიან მნიშვნელოვანი პროექტია, რომელსაც იწყებს განათლების სამინისტრო პრეზიდენტის ინიციატივით და ჩვენ ვერთვებით ამ პროექტში. 100 000 სტუდენტი მიიღებს ID ბარათებს, ეს იქნება სტუდენტური ფასდაკლების ბარათი.
_ ბატონო გიორგი, რა უჯდება სახელმწიფოს ეს პროექტი?
_ კონკრეტულად, ამ შემთხვევაში არ ვიცი, განათლებისა და მეცნიერების სამინისტროს უნდა ჰკითხოთ, მაგრამ ეს არის ძალიან მნიშვნელოვანი სოციალური პროექტი იქედან გამომდინარე, რომ ID ბარათს და ზოგადად სტუდენტურ ბარათს არ ექნება მხოლოდ ფასდაკლების ფუნქცია. ამას ექნება ძალიან მნიშვნელოვანი დატვირთვა.
_ უკავშირდება თუ არა ეს ახალი პროექტები არჩევნებს? ამ ბოლო დროს, ბევრი პროექტი დაიწყო სახელმწიფომ.
_ გასულ წელსაც ბევრი პროექტი დავიწყეთ, იუსტიციის სახლების გაკეთება გასული წლის მაისში დავიწყეთ. აგვისტოში ID ბარათების გამოშვება დავიწყეთ. ჩვენთვის არჩევნებს არანაირი მნიშვნელობა არ აქვს, ჩვენ დღე და ღამე ვმუშაობთ იმისთვის, რომ ის ფუნდამენტი რაც ავაშენეთ, ახლა ხელშესახები და ხელმისაწვდომი გავხადოთ ყველა ადამიანისთვის.
ჟურნალისტებთან სასაუბროდ განათლებისა და მეცნიერების მინისტრი დიმიტრი შაშკინი მოვიდა და მოკლედ ისაუბრა პროექტის შესახებ. დიმიტრი შაშკინი ვაშაძისნაირი ენაწყლიანი არ გამოდგა. ამას ზედ დაემატა ისიც, რომ მისთვის კითხვების დასმის საშუალება პრესსამსახურის თანამშრომელმა არ მოგვცა.
