ოზურგეთის მუნიციპალიტეტის დაბა ნარუჯაში 520 ოჯახი, 740 კომლი და 3200 მცხოვრებია. დაბაში 2100 ამომრჩეველია; ნარუჯაში ერთი სკოლა და ერთი საბავშვო ბაღია.
"Post ალიონის" და "გურია ნიუსის" ერთობლივი პროექტის _ "მონოლოგიდან _ დიალოგამდე" ფარგლებში, აქ მცხოვრებ ქალბატონებს შევხვდით. როგორც ისინი ამბობენ, რომ უმეტესობას ძალიან უჭირს, არის მძიმე სოციალური ფონი, დაბაში არც გზაა და არც _ გაზი.
როგორც ქალები "გურია ნიუსთან" ამბობენ, მრავალბინიანი სახლების უმეტესობა გადახურეს, მაგრამ ნაწილი დატოვეს და მოსახლეობას ცუდი ამინდები უდიდეს პრობლემებს შეუქმნის.
"არც გზა გაუკეთებიათ და არც ცენტრში მდებარე სახლები გადაუხურავთ. თუ წამოხვალთ, ნახავთ, რა გაჭირვება მაქვს, ნახავთ ჩემს სახლს და კარს. დიდი თუ პატარა ყველა თურქეთშია გადახვეწილი ლუკმა-პურის საშოვნელად. არჩევნები აღარ იქნება?!"
თავდაპირველად დაბა ნარუჯის ცენტრში მდებარე მრავალბინიანი მოსახლეობას შევხვდით.
ზოია იერღალაშვილი, ლეილა ხიმშიაშვილი, ჟენია ტონოიანი "გურია ნიუსთან" პრობლემებზე საუბრობენ:
"ერთადერთი, რაც გვაქვს, წყალია. სამუშაო არაა _ მხოლოდ ჩაის ვკრეფთ და კილოგრამში 22 თეთრს გვიხდიან. აქაურების 90 პროცენტი თურქეთში მუშაობს _ კაცია თუ ქალი, ყველა იქ მიდის სამუშაოდ. სამი წელია გზას აკეთებენ, ვითომ გააკეთეს, მაგრამ ვიხრჩობით მტვერში, ტალახში. დავწერეთ განცხადება, ვიდავეთ, გზებიც გადავკეტეთ, მაინც არაფერი გამოგვივიდა. გაზი არ გვაქვს. ნარუჯის ცენტრში მდებარე სამი მრავალბინიანი სახლის სახურავი არ შეუცვლიათ, დანარჩენი გადახურეს, ჩვენ დაგვტოვეს. ჭერიდან წყალი ჩამოდის, ლამისაა, ჩამოინგრეს.
დილა იმაზე ფიქრით იწყება, სად ვიშოვოთ პურის ფული. 5-5 დღით გადავდივართ თურქეთში. ხუთ დღეში რამდენი უნდა იშოვო? პენსია არ გვაქვს და სოციალური დახმარება. რით ვირჩინოთ თავი?"
ლეილა ხიმშიაშვილი: "სამი შვილი მყავს, ორ ოთხში ვცხოვრობ. აი, აქ მცხოვრებს მომიხსნეს სოციალური დახმარება".
დაბა ნარუჯის მეოთხე რაიონში მცხოვრები ნინა ეგიზარიანი და მზია სურმანიძე ხელისუფლებას უყურადღებობაში ადანაშაულებენ. ისინიც მთავარ პრობლემად სახლების ავარიულობას მიიჩნევენ:
"რამდენიმეჯერ იყვნენ მოსული, შეგვამოწმეს. გვითხრეს, რომ დამთავრდება ეს ზამთარი, დავიწყებთ გადახურვასო, მაგრამ ზაფხულიც იწურება და არაფერი გაკეთებულა. ყურადღებას არავინ გვაქცევს _ გაზი არ არის, გზა არ არის. პირადულ პრობლემებს რაც შეეხება, გაუსაძლისად უჭირს ხალხს. ეს თურქეთი რომ არ იყოს, ხალხი მშიერი მოკვდება. იქ წასვლაც აღარ შეუძლიათ, ისე დაავადმყოფდნენ, მაგრამ იძულებულნი არიან_ შვილებს საჭმელი, ტანსაცმელი, სწავლა ხომ უნდათ?! ჩაის საკრეფად დადიან. ფაქტობრივად, უცხოელების მონები ვართ!" _ ამბობენ ისინი.
ოზურგეთის მუნიციპალიტეტის გამგებლის წარმომადგენელი დაბა ნარუჯაში ზვიად მიქელაძე სოფლის პრობლემების შესახებ ასეთ კომენტარს აკეთებს:
"ნარუჯაში მრავალბინიანი სახურავების პრობლემა მოგვარებულია _ წელს დაიწყო და გრძელდება, გადაიხურა 15 ბინა. ეტაპობრივად მიმდინარეობს სამუშაოები. ამდენი ბინა ერთად არასდროს დახურულა. შიდა გზები დავაგრეიდერეთ და გავასწორეთ", _ ამბობს ზვიად მიქელაძე.
