ცენტრალური საარჩევნო კომისია "საერთაშორისო გამჭვირავლობა – საქართველოს" მიერ გამოქვეყნებულ ინფორმაციას პასუხობს, რომლის მიხედვითაც, ცესკოს 2016 წლის 24 აგვისტოს მიღებული დადგენილება კანონთან შეუსაბამოა.
როგორც ცესკოში განმარტავენ, ორი დღის წინ მიღებული დადგენილება კანონშეუსაბამო არ არის.
"საერთაშორისო გამჭვირვალობა – საქართველოში" კი მიაჩნიათ, რომ "ცესკომ აღნიშნულ დადგენილებაში ცვლილება უნდა შეიტანოს, ან გამოსცეს ახალი დადგენილება, რომელიც შესაბამისობაში იქნება საარჩევნო კოდექსთან".
"ჩვენი აზრით, წინა საპარლამენტო არჩევნებში პირველ სამ ადგილზე გასული პოლიტიკური გაერთიანებების გარდა, ყველა პარტიისთვის ნომრების მინიჭება უნდა მოხდეს ერთხელ ჩატარებული წილისყრით, ხოლო ცესკოს დადგენილებით პოლიტიკურ გაერთიანებებს/საარჩევნო სუბიექტებს უნდა მიეცეთ იმის უფლება, რომ ამ წილისყრით მინიჭებული ნომერი გამოიყენონ 8 ოქტომბერს გასამართი, როგორც მორიგი საპარლამენტო, ისე თვითმმართველობის შუალედური არჩევნებისთვის", _ აცხადებენ "საერთაშორისო გამჭვირვალობა – საქართველოში".
აღნიშნულის საპასუხოდ, ცესკოს სპიკერმა ანა მიქელაძემ "გურია ნიუსთან" საუბრისას განმარტა, რომ:
"2016 წლის 8 ოქტომბერს პირველად ტარდება ერთდროულად საქართველოს პარლამენტის, ადგილობრივი თვითმმართველობის შუალედური და რიგგარეშე არჩევნები. კანონმდებლობაში არსებული რეგულაციის მიხედვით, შესაძლოა, შექმნილიყო ისეთი ვითარება, როდესაც ერთი და იგივე საარჩევნო სუბიექტს ექნებოდა სხვადასხვა რიგითი ნომერი. ეს ერთის მხრივ, ამომჩევლებისთვის გარკვეულ უხერხულობას გამოიწვევდა და მეორე მხრივ, რა თქმა უნდა, პარტიებსაც შეუქმნიდა გარკვეულ დაბრკოლებებს წინასაარჩევნო კამპანიის წარმოებისას. ამიტომაც ცესკომ დაადგინა, რომ პარტია ან საარჩევნო ბლოკი, რომელიც მონაწილეობას იღებს საქართველოს პარლამენტის არჩევნების გარდა ასევე შუალედურ და რიგგარეშე არჩევნებში, შეუძლია ისარგებლოს იმ რიგითი ნომრით, რომელიც მას წილისყრით ენიჭება საქართველოს პარლამენტის არჩევნებისთვის ან მას ექნება შესაძლებლობა სამივე სახის არჩევნებში გამოიყენოს ის რიგითი ნომერი, რომელიც მას ბოლო ადგილობრივი თვითმმართველობის არჩევნებისთვის მიენიჭა", _ აღნიშნავს მიქელაძე.
რაც შეეხება თანაბრობის პრინციპის უზრუნველყოფას, ანა მიქელაძე ამბობს:
"ცესკომ დაადგინა, რომ მანამ, სანამ წილისყრით განისაზღვრება ნომრები ეს არის არჩევნებამდე არაუადრეს 30 და არაუგვიანეს 36-ე დღისა, ვერცერთი პარტია, გარდა კანონით უკვე განსაზღვრული 3 საუკეთესო შედეგის მქონე პარტიისა ("ერთიანი ნაციონალური მოძრაობა", "ქართული ოცნება – დემოკრატიული საქართველო", ეს "ნინო ბურჯანაძე- დემოკრატიული მოძრაობა") ვერ გამოიყენებს სასურველ საარჩევნო ნომრებს წინასაარჩევნო კამპანიის წარმოების პროცესში.
ხვალ არის ჩანიშნული სასამართლო პროცესი ამ გადაწყვეტილებასთან დაკავშირებით. მოგეხსენებათ, "რესპუბლიკურმა პარტიამ" მიმართა სასამართლოს და გაასაჩივრა ცესკოს 24 აგვისტოს დადგენილება. რა თქმა უნდა, მას შემდეგ რაც სასამართლო მიიღებს გადაწყვეტილებას, ეს ინფორმაცია იქნება საჯარო ყველა დაინტერესებული მხარისთვის", _ უთხრა ცესკოს სპიკერმა "გურია ნიუსს".
