ჩოხატაურისა და ლანჩხუთის გაერთიანებულ საარჩევნო ოლქს კიდევ ერთი დამოუკიდებელი დეპუტატი ჰყავს _ კაკო ჩხაიძის შემდეგ პოლიტიკაში დაბრუნება გადაწყვიტა დავით ჟღენტმა, რომელიც ორჯერ (1995-1999-2003 წწ.)იყო არჩეული ჩოხატაურის რაიონიდან საქართველოს პარლამენტის მაჟორიტარად.
" 2004 წლიდან დღემდე არ გამჩენია სურვილი მონაწილეობა მიმეღო რომელიმე არჩევნებში პარტიული კუთვნილებით ან დამოუკიდებლად. ვთვლიდი, რომ ხალხს არ უნდა მოაბეზრო თავი, წყნარად აკეთო ქვეყნის და შენი მოწოდების საქმე და დაეხმარო მოყვასს რითიც შეგიძლია (ამ პრინციპით ვცხოვრობდი და ვცხოვრობ უფლის ნებით).
ბუნებრივია, როგორც პოლიტიკასთან არც თუ შორს მდგომი მოქალაქე, რამოდენიმე მიმართულებით დარგის პროფესიონალი, ყურადღებით ვაკვირდები და ვხედავ წლების მანძილზე ქვეყნის მართვაში დაშვებულ სერიოზულ შეცდომებს, რომელთა გაანალიზება და გამოსწორება სამწუხაროდ სრულად ვერ ხერხდება.
ჩვენი ქვეყანა იმყოფება რთულ გეოპოლიტიკურ და დაპირისპირებული რელიგიური მიმართულებების გარემოცვაში, სადაც არასწორად გატარებული პოლიტიკის შედეგად ნებისმიერ დროს შეიძლება აღმოვჩნდეთ გამოუსწორებელ სიტუაციაში.
მსოფლიოში და ქვეყანაში მიმდინარე პროცესებიდან გამომდინარე, ამ მოწვევის პარლამენტის შემადგენლობაზე, მის იმიჯზე და გატარებულ საგარეო, სამეზობლო და საშინაო კურსზე სასიცოცხლოდ იქნება დამოკიდებული ქვეყნის და მოსახლეობის მომავალი.
ამიტომაც განსაკუთრებული მნიშვნელობა ენიჭება როგორი შეხედულების და კურსის მქონე პოლიტიკური ძალები და დამოუკიდებელი კანდიდატები დააკომპლექტებენ პარლამენტს.
ხაზგასმით ვაფიქსირებ: რომ არა საკონსტიტუციო სასამართლოს გაუგებარი და გაუაზრებელი გადაწყვეტილება საპარლამენტო არჩევნებისთვის ქვეყნის ტერიტორიული ერთეულების ხელოვნურ დაყოფაზე, არასოდეს აღარ მივიღებდი მონაწილეობას საპარლამენტო არჩევნებში (რომც დაეტოვებინათ ჩოხატაურის საარჩევნო ოქლი)" _ აღნიშნულია განცხადებაში, რომელიც ჟღენტმა გაავრცელა.
დავით ჟღენტის განცხადებით აღნიშნული გადაწყვეტილებით "ქვეყნის მრავალ საარჩევნო ოლქში, მათ შორის: ლანჩხუთის, ჩოხატაურის და ოზურგეთის მუნიციპალიტეტის ექვსი სოფლის ამომრჩევლები აღმოჩნდნენ ღირსებაშელახულები".
"ჩემი გადაწყვეტილება გარკვეული პროტესტიცაა ასეთ გაუგებარ სიტუაციაში მყოფი ტერიტორიული ერთეულების და მათი მოსახლეობის მხარდასაჭერად. უნდა დაინახოს ხელისუფლებამაც და ოპოზიციამ, რომ დასაფიქრებელია ასეთ ფაქიზ თემებთან გაუთვლელად, გაუაზრებლად შეხება. ორივე მხარემ არჩევნების შემდეგ გაცილებით მეტი უკმაყოფილო ამომრჩეველი შეიძლება მიიღოს, ვიდრე დღეს არის.
კიდევ ერთი მოტივი თუ რატომ უნდა მივიღო საპარლამენტო არჩევნებში მონაწილეობა არის პარტიული სიებით წარმოდგენილი და დამოუკიდებელი პარლამენტის წევრობის უმეტესი კანდიდატების ბიოგრაფიები, პარტიული კუთვნილობები, პოლიტიკური და სამეურნეო პროფესიული გამოცდილებები, საზოგადოებრივი ავტორიტეტი და რეალური შესაძლებლობები.
უმეტეს მათგანს პირადად ვიცნობ წლების მანძილზე და პატივს ვცემ მათ პიროვნებებს, ვიცი მათი როგორც შეხედულებები, ასევე შესაძლებლობები. მოკრძალებით გეტყვით, რომ არანაკლები (შეიძლება მეტიც) გამიკეთებია და შემიძლია გავაკეთო გურიის მხარის და ქვეყნისთვის, _ აღნიშნავს დეპუტატობის კანდიდატი.
