”დღეს გვაშინებენ რეიტინგით. ციხის, იატაკქვეშეთის და ციმბირის არ შეგვეშინდა და რეიტინგით შეშინებული პარტია მე არ მინახავს”, _ განაცხადა ლევან ბერძენიშვილმა ”რუსთავი 2”-ის ეთერში.
ბერძენიშვილი მიიჩნევს, რომ ერთ-ერთი ბედნიერი ადამიანია დედამიწის ზურგზე, რადგან მეგობრებთან ერთად ძალიან ნაყოფიერი პროექტი წამოიწყო.
”როდესაც ხარ ახალგაზრდა, ხანდახან ძალიან სწორად ვერ ხედავ პერსპექტივას და შეიძლება ისეთი რამ წამოიწყო, რასაც შემდეგ მთელი ცხოვრება ინანებ. მე გამიმართლა და მეგობრებთან ერთად ისეთი რამ წამოვიწყე, რასაც ამდენი ხალხი, ამდენი იდეა, ამდენი მეტოქე და ლაპარაკი მოყვა. ჩემი თვალსაზრისით, მე ერთ-ერთი ბედნიერი ადამიანი ვარ დედამიწის ზურგზე, ძალიან ნაყოფიერი პროექტი წამოვიწყე ჩემს მეგობრებთან ერთად. მაშინ ჩვენ იატაკქვეშეთში ვარსებობდით, ძალიან მალე გვიპოვეს, დაგვაკავეს და გამომძიებელმა მითხრა დაკითხვაზე _ ”ჭკვიანი ხალხი ჩანხართ, არ ჩანხართ სულელი, იცოდით რომ დაგაპატიმრებდით და რატომ წამოიწყეთ ასეთი რამეო?”. ჩვენ ვიცოდით, რომ ეს გზა არ იყო იოლი, მაგრამ გვქონდა შესანიშნავი, ძალიან კარგი ენთუზიაზმი, თავი უნდა დაგვეღწია იმ ქვეყნისგან, რომლისთვისაც ბევრს დღესაც არ დაუღწევია თავი.
ვოცნებობდით იმაზე, თუ როგორ შევაღებდით ევროპის კარს, როგორ გახდებოდა საქართველო ნატო-ს წევრი, როგორ დაინგრეოდა 10 წელიწადში საბჭოთა კავშირი. ვიღაცები მოდიოდნენ და გვეუბნებოდნენ: იდიოტები ხართ, რა დაშლის საბჭოთა კავშირსო. ჩვენ ეს ყველაფერი გვჯეროდა და ეს დრო დადგა”, _ განაცხადა ლევან ბერძენიშვილმა და დასძინა, რომ მაშინ ვერ იფიქრებდა, თუკი ქართველი უვიზოდ შეძლებდა ევროპაში წასვლას.
