ჩვენს ვებგვერდზე გამოქვეყნებულ წერილზე _ "აქვს თუ არა ადგილი „გადაცდომებს“ _ რას ფიქრობენ იურისტები" ლანჩხუთის მუნიციპალიტეტის გამგეობის პრესსამსახურმა შემდეგი სახის კომენტარი მოგვაწოდა:
"გურია ნიუსის" ვებგვერდზე გამოქვეყნდა სოფო წილოსანის სტატია სათაურით: "აქვს თუ არა ადგილი "გადაცდომებს" _ რას ფიქრობენ იურისტები", სადაც იურისტები _ ლევან ხინთიბიძე და თამაზ ტრაპაიძე აცხადებენ, რომ ზაზა ურუშაძის ყოფნა ჯურუყვეთის ბაღის გახსნის ცერემონიაზე და მის მიერ საზეიმო ლენტის გაჭრა ადმინისტრაციული რესურსის გამოყენებაა, რადგან, მათივე განმარტებით, ბატონი ზაზა იმყოფება შვებულებაში.
გვინდა ხაზგასმით განვმარტოთ, რომ ზაზა ურუშაძე ჯურუყვეთის ბაღის გახსნის ზეიმზე მიწვეული იყო, როგორც ადამიანი, რომელმაც ხელი შეუწყო ამ ბაღის მშენებლობას სოფელში. მას სააგიტაციოდ ადგილი და გარემოება არ გამოუყენებია და მის მიერ არ გავრცელებულა რაიმე სახის სააგიტაციო მასალა, რასაც ადასტურებენ არა მხოლოდ ამ ცერემონიაზე მყოფი პირები, არამედ ვიდეო მასალაც, რომელიც ჩვენთან ინახება და მისი გაცნობა ნებისმიერ დაინტერესებულ პირს შეუძლია.
ამასთან, გამგეობის იურიდიული სამსახურის უფროსის, შოთა ჩაგუნავას განმარტებით, საქართველოს საარჩევნო კოდექსის 47-ე მუხლში სრულადაა ჩამოთვლილი, თუ რა ითვლება ადმინისტრაციულ რესურსად. მსგავს ფაქტებს კი ადგილი ჯურუყვეთის ბაღის გახსნისას არ ჰქონია."
