საქართველოს ყოფილი პრეზიდენტი მიხეილ სააკაშვილი ეგზიტპოლის შედეგებთან დაკავშირებით პირველ კომენტარს აკეთებს.
მიხეილ სააკაშვილმა ამომრჩევლებსა და მხარდამჭერებს მიმართა და განაცხადა, რომ მნიშვნელოვანია თითოეული ოქმის და ხმის დაცვა, რადგან შედეგები, რომელიც ეგზიტპოლების მიხედვით გამოჩნდა, მისთვისაც მოულოდნელი იყო.
ექსპრეზიდენტის თქმით, ეგზიტპოლის მიხედვით, ნაციონალურ მოძრაობას ოლქების უმეტესობაში მმართველ გუნდთან შედარებით დიდი უპირატესობა აქვს.
"რაც შეეხება არჩევნების შედეგებს, ძალიან მნიშვნელოვანი ინფორმაციაა, რომ ფაშისტური ე.წ. ალიანსი ვერ ლახავს და ამ მომენტში პროპორციული სიით მანდატებს შორის, ორ დარჩენილ პარტიებს შორის, ჩვენი ერთიანი ნაციონალური მოძრაობა და ქართული ოცნება, არის სულ რამდენიმე მანდატი და შემოსული ოქმებით, მაჟორიტარული ოლქების აბსოლუტური უმრავლესობისთვის, მე ვამბობ ამ მომენტისთვის, ნაციონალური მოძრაობა ლიდერობს. ეს ნიშნავს იმას, რომ ახლა კომისიებში უნდა ვიმუშაოთ ძალიან მაგრად. არავინ არ უნდა მიატოვოს პოსტი კომისიებში, მით უმეტეს უნდა გვესმოდეს, რომ ყველაფერი წინ გვაქვს და ძალიან მნიშვნელოვანია ახლა თითოეული მანდატის დაცვა იმიტომ, რომ სიტუაცია არ არის ის, რაც თავიდან გამოჩნდა. აშკარად ყოველ წუთიერად იცვლება უკეთესობისკენ. ამიტომ ახლა, როგორც არასდროს, საჭიროა, რომ ხელები არა მხოლოდ არავინ არ ჩამოუშვას, არამედ ბოლომდე მივიყვანოთ დაწყებული საქმე. ყოველი ოქმი უნდა იყოს დაცული და მე დარწმუნებული ვარ, რომ ბევრად უკეთეს შედეგს მივიღებთ, ვიდრე წარმოგვედგინა. ვადევნებ თვალს სიტუაციას, მე თვითონაც გაოგნებული ვარ იმდენ ოლქში გვაქვს ახლა უპირატესობა. არავითარ შემთხვევაში არ მოეშვათ, თქვენს იმედზე ვარ,“ _ განაცხადა სააკაშვილმა.
შეგახსენებთ, რომ საარჩევნო უბნების დახურვისთანავე ორი სხვადასხვა ეგზიტპოლის შედეგი გამოქვეყნდა.
"რუსთავი2"-ის დაკვეთით კომპანია GFK-ს მიერ ჩატარებული ეგზიტპოლის შედეგები ასეთია:
39.9 „ქართული ოცნება“, 32 74 „ნაციონალური მოძრაობა“ და 5.76 „პატრიოტთა ალიანსი- გაერთიანებული ოპოზიცია“.
პაატა ბურჭულაძე – სახელმწიფო ხალხისთვის – 3,25%;
ნინო ბურჯანაძე – დემოკრატიული მოძრაობა – 2,81%;
სხვა პარტიები – 8,12%.
ხოლო, კომპანია TNS-ის ეგზიტპოლის მიხედვით:
“ქართული ოცნება-დემოკრატიული საქართველო“ – 53,8%
„დავით თარხან-მოურავი, ირმა ინაშვილი-საქართველოს პატრიოტთა ალიანსი, გაერთიანებული ოპოზიცია“ – 5,0%
„შალვა ნათელაშვილი ლეიბორისტული პარტია“ – 3,1%
„უსუფაშვილი-რესპუბლიკელები“ – 2,7%
„ეროვნული ფორუმი“ – 0,8%
სხვა პარტიები ერთად – 5,5%
კომპანია TNS-მა ეგზიტპოლები ტელეკოპანიების GDS-ის, „მაესტროს“, „იმედისა“ და საზოგადოებრივი მაუწყებლის დაკვეთით ჩაატარა, საველე სამუშაოები შეასრულა კომპანია "გორბიმ".
