ლანჩხუთისა და ჩოხატაურის მაჟორიტარი დეპუტატობის კანდიდატის, ნინო წილოსანის მამის წინააღმდეგ თბილისის საქალაქო სასამართლოში პროცესი გუშინ 2 საათის განმავლობაში მიმდინარეობდა.
დავა, რომელიც დაახლოებით 8 წლის წინ დაიწყო, დღესაც გრძელდება. საქმე 2008 წლის 17 სექტემბერს, “ელექტროვაგონშემკეთებელი ქარხნის” წილის 52.63%-ის 3 მილიონ ლარად წილოსანის კომპანიისთვის გადაცემას ეხება, რომელიც “ელექტროვაგონშემკეთებელი ქარხნის” ყოფილი მეწილეების მტკიცებით, იძულებით დაათმობინეს.
შპს “თ. ჯ. თრეიდის” გენერალური დირექტორი დავით აბრამიშვილი, პროკურატურისთვის მიცემულ ჩვენებაში აღნიშნავს, რომ კომპანიის თანამშრომლებსა და მფლობელებზე, 2008 წელს, ფინანსური პოლიციის მაღალი და დაბალი რგოლის თანამშრომლების მხრიდან ხდებოდა ზეწოლა, რომ “თ. ჯ. თრეიდს” თავისი წილი უნდა გადაეცა “ელექტროვაგონშემკეთებელი ქარხნის” კიდევ ერთ მეწილე ბადრი წილოსანზე.
წილის იძულებით გადაფორმებაზე საუბრობს “ელექტროვაგონშემკეთებელი ქარხნის” სამეთვალყურეო საბჭოს ყოფილი თავმჯდომარე ავთანდილ საყვარელიძეც, რომლის მტკიცებით, “ბადრი წილოსანის ვაჟი, ირაკლი წილოსანი დავით კეზერაშვილის ახლო მეგობარია და სწორედ ამ მეგობრობის დამსახურებით მოხდა მისთვის ქონების წართმევა”.
“ფინანსური პოლიციის თანამშრომლებმა, ღამის 8 საათიდან 12 საათამდე როგორ წაგვიყვანეს ნოტარიუსის ოფისში და იძულებით გადამაფორმებინეს ბადრი წილოსანისთვის ქონება. აქვე აღსანიშნავია ისიც, რომ ფიქტიური გადარიცხვა “თი ბი სი ბანკში“ არასამუშაო საათებში განხორციელდა”, _ იხსენებს საყვარელიძე “გურია ნიუსთან” საუბრისას.
გუშინ, აღნიშნულ საქმესთან დაკავშირებით, სასამართლოში დაიკითხა ნინო წილოსანის მეუღლე, ვლადიმერ აბულაძე, რომელიც 2008 წელს შპს “ვაგონშემკეთებელი ქარხნის” ფინანსური დირექტორი იყო.
როგორც აბულაძემ დაკითხვისას განაცხადა, 2008 წლის აგვისტოში, ქარხნის აქციების შესყიდვამდე ერთი თვით ადრე, მისი სიმამრისგან, ბადრი წილოსანისგან შეიტყო, რომ ის ავთანდილ საყვარელიძისგან აქციების შესყიდვას აპირებდა. ამავე წლის 17 სექტემბერს კი, წილოსანმა სთხოვა მისულიყო თი-ბი-სი ბანკში და მეთვალყურეობა გაეწია გადარიცხვაზე.
“ბანკთან ახლოს შევხვდი მამუკა დოლიძეს, გურამ რატიანს და ბადრი წილოსანს. ბადრიმ მთხოვა ბანკში გადავსულიყავი და მომემზადებინა ყველაფერი… ცოტა დიდი თანხა იყო გადასარიცხი. დაახლოებით, საათნახევრის შემდეგ ბადრი გადმოვიდა და გაკეთდა საგადასახადო დავალება… პირველი ტრანზაქციის შემდეგ, ერთ–ორ საათში ბადრი წილოსანი, დავით აბრამიშვილი, ბადრი ნიაური და ავთანდილ საყვარელიძე მოვიდნენ ბანკში და ამის შემდეგ გაკეთდა მეორე ტრანზაქცია“, _ განაცხადა აბულაძემ.
მოწმემ დღეს ვერ გაიხსენა თუ რა თანხა გადაუხადა აქციებში ავთანდილ საყვარელიძეს მისმა სიმამრმა და გაკეთდა თუ არა ორივე ტრანზაქცია ავთანდილ საყვარელიძის კუთვნილი შპს-ს “TG ტრეიდის” ანგარიშზე.
“3 მილიონ ლარამდე იყო გადარიცხვა. აქციების შესყიდვის თანხა ზუსტად არ მახსოვს“, _ განაცხადა აბულაძემ და დასძინა, რომ უშუალოდ პროცესში ის არ მონაწილეობდა. რაც შეეხება საყვარელიძის მიერ გაცხადებულს, რომ წილი იძულებით დაათმობინეს, აბულაძემ აღნიშნა: “იძულებით ნასყიდობა არ ყოფილა, არა მგონია. არც უცხო ხალხი, ან იარაღიანი ხალხი ყოფილა ბანკთან, არ შემინიშნავს”.
აბულაძემ დაადასტურა, რომ თი-ბი-სი ბანკში ტრანზაქციები არასამუშაო საათებში, საღამოს გაკეთდა, თუმცა რატომ დაუშვა ბანკმა გამონაკლისი, ამაზე ვერ ისაუბრა. აბულაძემ დღეს ვერც ის გაიხსენა, ვინ მოემსახურა ბანკში მათ, ეს იყო რიგითი ოპერატორი თუ ბანკის უფრო მაღალი თანამდებობის პირი. თუმცა აღნიშნა: “თი–ბი–სი ბანკის თანამშრომლებს ყველას ვიცნობ სახელებით და გვარებით. ნაცნობი რომ ყოფილიყო, გავიხსენებდი“.
აბულაძის დაკითხვისას ბადრი წილოსანის დაცვის მხარის მოთხოვნით მოსამართლემ მხოლოდ ერთი შეკითხვა მოხსნა – რა ანგარიშიდან გადაირიცხა “TG ტრეიდის” ანგარიშზე თანხა? ამაზე წილოსანის ადვოკატმა აღნიშნა, რომ საქმესთან კითხვას კავშირი არ აქვს.
კითხვაზე: რატომ მოხდა გადარიცხვა ორ ეპიზოდად? აბულაძემ განაცხადა, რომ მან ამის შესახებ არ იცის. ხოლო რა მიეთითა გადარიცხვის დანიშნულებაში, არ ახსოვს.
აბულაძის დაკითხვის შემდეგ სასამართლო პროცესი ავთანდილ საყვარელიძის მხარის მიერ გამოძახებული მოწმის, ადვოკატ გიორგი ყავლაშვილის დაკითხვით გაგრძელდა. ყავლაშვილი გარკვეული პერიოდის განმავლობაში საყვარელიძის ინტერესების დამცველი იყო, მათ შორის რამდენიმე საქმეში, რომელზეც საყვარელიძეს დავები ჰქონდა წამოწყებული.
თუმცა, მოგვიანებით ავთანდილ საყვარელიძემ განაცხადა, რომ ყავლაშვილი სახელმწიფოსგან “მიმაგრებული ადვოკატი” იყო.
ყავლაშვილის დაკითხვა დაახლოებით 35 წუთს გაგრძელდა. დაკითხვის დასაწყისშივე მოწმემ აღნიშნა, რომ დავა რას ეხებოდა მას არ ახსოვდა და მოსამართლეს სთხოვა თავისი ახსნა განმარტება ეჩვენებინა, რომელიც საქმის მასალებში დევს.
დაკითხვის განმავლობაში ყავლაშვილმა რამდენჯერმე გაიმეორა, რომ ავთანდილ საყვარელიძეს აქციები იძულებით დაათმობინეს, თუმცა ვერ გაიხსენა, კონკრეტულად ვისგან იყო ეს იძულება და ესწრებოდა თუ არა ის შეხვედრებს, სადაც საყვარელიძე მისი ნების საწინააღმდეგოდ რაიმე ქმედებას ჩადიოდა.
დაკითხვისას ყავლაშვილმა ასევე აღნიშნა, რომ საყვარელიძეს იმ პერიოდში რამდენიმე საქმეზე დავა ჰქონდა, მათ შორის “საქართველოს რკინიგზის” წინააღმდეგ. მისივე თქმით, რკინიგზის წინააღმდეგ სასამართლოში შეტანილი სარჩელის უკან გამოტანას საყვარელიძეს “სავარაუდოდ” ფინანსური პოლიციიდან სთხოვდნენ.
“სხვა გზა და გამოსავალი არ იყო, სახელმწიფოს მხრიდან ზეწოლა განხორციელდა. არ იყო ჩემი მარწმუნებლის სურვილი საქართველოს რკინიგზის წინააღმდეგ შეტანილი სარჩელი გამოეტანა, მაგრამ… არ გამოვრიცხავ საგამოძიებო ორგანოებიდან ყოფილიყო ჩემთან დაკავშირება, ან მე დავკავშირებოდი მათ და მორიგება შემეთავაზებინა. თუმცა კონკრეტულად ვერ ვიხსენებ”, _ განაცხადა ყავლაშვილმა.
საყვარელიძის ინტერესების მაშინდელმა დამცველმა დაკითხვისას ვერც ის გაიხსენა, გაფორმდა თუ არა რაიმე შეთანხმება საყვარელიძესა და “საქართველოს რკინიგზას” შორის. მოგვიანებით, ბადრი წილოსანის ადვოკატმა დათო სამხარაშვილმა აღნიშნა, რომ საყვარელიძესა და რკინიგზას შორის მორიგების ხელშეკრულება გაფორმდა და ავანსად რკინიგზამ 5 მილიონი ლარი გადაიხადა.
“დედას ვფიცავარ არ მახსოვს იყო თუ არა საქართველოს რკინიგზისთვის ქარხნიდან მიწერილი წერილები. არ მახსოვს, ტყუილს ვერ ვიტყვი”, _ განაცხადა ადვოკატმა.
ყავლაშვილმა სასამართლო პროცესზე ვერც ის გაიხსენა დასწრებია თუ არა ავთანდილ საყვარელიძის რომელიმე დაკითხვას საგამოძიებო ორგანოში.
რაც შეეხება “TG ტრეიდის” აქციების გასხვისებას, ყავლაშვილის აზრით, აქციების გასხვისების სურვილი მფლობელებს არ უნდა ჰქონოდათ, თუმცა აღნიშნა, რომ ის ამ დროს მათ ინტერესებს არ იცავდა.
ყავლაშვილმა ასევე აღნიშნა, რომ საყვარელიძის ოჯახს საქართველოში არ დაედგომებოდა.
“ჯოჯოხეთი გამოიარეს და საზღვარგარეთ იყვნენ წასულები. მათზე ზეწოლას ვადასტურებ”, _ აღნიშნა ყავლაშვილმა.
სასამართლო პროცესზე აბულაძისა და საყვარელიძის გარდა დაკითხეს შპს “ვაგონმშენებელი ქარხნის” ტექნიკური დირექტორი მამუკა დოლიძეც.
დოლიძემ დაკითხვისას აღნიშნა, რომ დაახლოებით ერთი თვით ადრე იცოდა, ბადრი წილოსანი ავთანდილ საყვარელიძისგან აქციების ყიდვას რომ აპირებდა.
მისივე თქმით, წილოსანი მას 17 სექტემბერს, აქციების შესყიდვის დღეს დაუკავშირდა და სთხოვა თბილისში, მარჯანიშვილის ქუჩაზე, თი-ბი-სი ბანკთან მისულიყო.
“კარგად მახსოვს ის დღე, ჩემი დაბადების დღე იყო. ბანკში იმდენ ხანს გაგრძელდა პროცედურები, დაბადების დღე ჩამეშალა… გურამ რატიანთან ერთად ჩამოვედი მარჯანიშვილის ქუჩაზე და შევხვდი ბადრი წილოსანს. თუმცა ბანკში ჩვენ არ შევსულვართ. ბადრიმ გვითხრა აქ დამელოდეთო. ვიდექით გარეთ და ველოდებოდით. ბანკში პროცედურები საკმაოდ დიდხანს გაგრძელდა, რის გამოც დაბადების დღე ვერ აღვნიშნე”, _ აღნიშნა დოლიძემ.
მისივე თქმით, დაინახა როგორ შევიდა ბანკის შენობაში ჯერ “TG ტრეიდის” დირექტორი დავით აბრამიშვილი, შემდეგ კი, ბადრი ნიაური და ავთანდილ საყვარელიძე. მხარეების მიერ დასმულ კითხვაზე, ხომ არ შეუნიშნავს უცხო, იარაღიანი პირები ბანკის შენობასთან ან ნოტარიუსთან, ხომ არ შეუყვანიათ ნოტარიუსთან ნახევრადშიშველი, საცვლებიანი მამაკაცი, დოლიძემ განაცხადა, რომ მსგავსი არაფერი დაუნახავს.
სასამართლო პროცესის შემდეგ, “გურია ნიუსთან” საუბრისას ავთანდილ საყვარელიძემ განაცხადა, რომ დავა, რომელსაც სასამართლო განიხილავს უპრეცენდენტოა.
“საგულისხმოა ერთი რამ, ხელისუფლებამ, რომელმაც გააგდო “ნაციონალური მოძრაობა”, ჩვენ იძულებითი ემიგრაციიდან დაბრუნების უფლება მოგვცა, დღეს ლანჩხუთში მაჟორიტარი დეპუტატობის კანდიდატად წარადგინა იმ ბანდიტური ჯგუფის წევრი, რასაც თქვენ დღეს აქ ისმენდით. ვითომ ეს ყველაფერი არ არსებობს. დღეს პროცესზე დაკითხული მოწმეები არიან წილოსანთან ერთად ბრალდებულები და გირაოთი გათავისუფლებულები. გარდა ამ პროცესისა, სახელმწიფო მათ 65 მილიონი ლარის მოპარვას ედავება. სწორედ, იმ კომპანიის ფინანსური მენეჯერი გახლდათ ნინო წილოსანი, რომლის მამა და მეუღლე დააპატიმრეს და მას, როგორც ქალს პატივი სცეს და ერთი ოჯახიდან მესამე ადამიანიც არ დაიჭირეს. ასეთ ცხვრის ქურქში წარმოდგენილი მგელი ჰყავთ ლანჩხუთელებს მაჟორიტარი დეპუტატობის კანდიდატად”, _ აღნიშნა საყვარელიძემ.
“გურია ნიუსთან” საუბრისას საყვარელიძემ ასევე აღნიშნა, რომ ზეწოლა, წილების დასათმობად მოდიოდა როგორც პროკურატურიდან, ასევე ხელისუფლების სხვა შტოებისგანაც.
“პროკურატურა, ჩემი მაშინდელი ვითომ ადვოკატი ყავლაშვილი, წილოსანის ოჯახი, ყველა თამაშობდა ერთ თამაშს, რომ დროზე დამეთმო ეს წილი, დროზე, თორემ ამოგხოცავთო… კეზერაშვილიც მათთან ერთად, მთავარი პირია. პირველი შეხვედრა აგვისტოს ომიდან ზუსტად ერთი თვის თავზე 8 სექტემბერს შედგა; კეზერაშვილს თავის კაბინეტში შევხვდი, მაშინ ის თავდაცვის მინისტრი იყო. მითხრა, რომ მისი მეგობრის ოჯახისთვის, ბადრი წილოსანისთვის უნდა დამეთმო აქციები, წინააღმდეგ შემთხვევაში მე და ჩემი პარტნიორის ოჯახებს ამოგვხოცავდენ. პირველ შეხვედრაზე მარტო ვიყავი, ამის შემდეგ ჩვენ მოგვივიდა ერთმანეთთან ძალიან სერიოზული დაპირისპირება. ეს გადაიზარდა ჩემი და მათი მხარის მუდმივ დავაში, თუმცა ჩვენ ვიყავით ცოტა და ის იყო სახელმწიფო მექანიზმი. ამას მოყვა 10-დღიანი 24-საათიანი მიყვანები ფინანსურ პოლიციაში და იქ ჩაკეტვები, ზეწოლები, ოჯახებში მივარდნები, ამის შემდეგ მოხდა წილის გადაფორმება. მეორე დღესვე კი დაიწყეს ისეთი მოქმედებების გაკეთება, რომ ჩვენ დავეპატიმრებინეთ დამატებით. რაც გაჟღერდა დილიდანვე მეორე დღეს. ბარემ ისიც ხეხეთო…”, _ აღნიშნა საყვარელიძემ.
“_ყველაზე საინტერესო კი ის არის, რომ ზუსტად ორი წლის შემდეგ, 2010 წელს, თვითონ მათვე გააკეთეს განცხადება, რომ ამ ქარხანას 400 მილიონ დოლარად ყიდდნენ; ამ ჩვენგან 3 მილიონად “სიხარულით” ნაყიდ ქარხანას. როცა ეს პაკეტი შევიძინეთ, ბიუჯეტში გადავიხადეთ, 6 მილიონი დოლარი. ჩავდეთ დაახლოებით 35 მილიონი დოლარის ინვესტიცია, დღეს ეს აღარ ახსოვთ. ეს არის პირველი საქმე და ძალიან პრეცედენტული იქნება ქართულ სამართლებრივ სივრცეში შედეგი. მესმის, რომ სამართლიანობის აღდგენის პროცესი სადღაც მიდის, ვიღაცას მანქანა დაუბრუნეს, ვიღაცას ველოსიპედი, ვიღაცას სავაჭრო ფართი, მაგრამ ასეთი მასშტაბური დავის განხილვა ჯერ საქართველოში არ მომხდარა.
ჩვენ არ გვინდოდა გაყიდვა. რას ჰქვია ქარხანას ვალი ჰქონდა? ვალი თუ ჰქონდა რა სხვისი საქმე იყო ეგ?- მაინცდამაინც ავტომატით უნდა მომივარდე, მითხრა მაგას თავი დაანებე, არ გაისტუმრო და მე გადმომაბარეო? ლოგიკაშიც კი აცდენილები არიან; თუ ვალი მქონდა, რატომ ყიდულობდნენ ამას!”_ აცხადებს საყვარელიძე.
მისივე თქმით, პროკურატურაში მიმდინარე გამოძიებისგან შედეგი ვერ მიიღო.
“შეიძლება პროცესი ჩვენგან დამოუკიდებლად მიდის. მაგრამ არ ვიცი, ჩვენ დაბარებულები არ ვყოფილვართ. 2013 წლის მაისიდან უდევთ ჩვენი საჩივარი”, _ აღნიშნა საყვარელიძემ.
ცნობისთვის, მხარეებს დღეს სამი მოწმის გარდა სასამართლოში სხვა მოწმეები არ წარმოუდგენიათ. ამის გამო, მოსამართლე ლია ავალიშვილის გადაწყვეტილებით, სასამართლო პროცესი 14 ნოემბერს, ისევ მოწმეების დაკითხვით გაგრძელდება.
ამავე თემაზე:
