ჩოხატაურის მუნიციპალიტეტის საკრებულოს სოციალურ საკითხთა კომისიამ მუნიციპალიტეტში არსებული სანიტარულ-ჰიგიენური მდგომარეობა შეისწავლა.
"მუნიციპალიტეტის ტერიტორიის დასუფთავება და სანიტარული წესრიგის დაცვა, საყოფაცხოვრებო ნარჩენების გატანის მენეჯმენტის ორგანიზება, წარმოადგენს მუნიციპალიტეტის ცხოვრების განუყოფელ ნაწილს. საკითხი აქტუალურია, რადგან საქმე ეხება ადამიანის ჯანმრთელობას, ჩვენი მომავალი თაობის ჯანსაღ გარემოში ყოფაცხოვრებას, მათი ჩვევების გამომუშავებას ამ მხრივ. ამასთანავე, უნდა შეიქმნას ესთეტიკურად მიმზიდველი გარემო, როგორც ჩვენი მოსახლეობისთვის, ასევე, სტუმრებისთვის!" _ აღნიშნულია კომისიის თავმდჯომარის დავით შარაშიძის დასკვნაში.
ამავე დასკვნაში ხაზგასმულია, რომ შემოწმების დროს დაბის და მიმდებარე სოფლების ტერიტორიაზე "გაცლილი იყო ყველა ბუნკერი, არ იყო გადავსებული და არ იყო დაბინძურებული უბნების მიმდებარე ტერიტორიები".
რაც შეეხება კონკრეტულ დარღვევებს _ სოციალურ საკითხთა კომისიის ინფორმაციით, "უმეტეს შემთხვევაში, ნაგვის ურნები კუსტარულად დამზადებული რკინის ყუთებია, რაც ვერ შეესაბამება რეცხვა-დეზინფექციის მოთხოვნებს დაცლის შემდეგ; ყველა სოფელში ურნები არ არის განლაგებული _ მხოლოდ ახლო-მახლო სოფლებშია და ისიც მცირე რაოდენობით, რაც ქმნის იმის საშიშროებას, რომ ნაგავს მოსახლეობა ყრის ისეთ ადგილებში, რომ, იქმნება ინფექციურ და პარაზიტული დაავადებების გავრცელების ყველა პირობა; ხშირ შემთხვევაში, ურნებშივე ხდება ნაგვის დაწვა, რაც დაუშვებელია; დასასუფთავებელია ბაზარი და მისი მიმდებარე ტერიტორია, არასასიამოვნო სუნი შეიგრძნობა და მოსაწესრიგებელია ბაზრის ტუალეტი; გასაწმენდია სანიაღვრე არხები ნაგვისა და მცენარეებისგან, რაც აფერხებს ატმოსფერული წყლების გატარებას არხებში; სარეველებითაა სავსე გზების მიმდებარე ტერიტორიები, მშენებარე ობიექტების გარშემო ყრია სამშენებლო ნაგავი; დაბის ცენტრალურ ადგილებში არ არის აკრძალული პირუტყვის მოძრაობა. მომრავლებულია მაწანწალა ძაღლები, რის შედეგადაც ძალიან მომატებულია მომართვიანობა სამედიცინო დაწესებულებების ანტირაბიულ კაბინეტში".
_ არ ვიცი, რამდენად დროულია დასასუფთავებელ ტექნიკაზე საუბარი, მაგრამ აუცილებელია ქუჩების მექანიკური დაგვისა და მოსარეცხი აღჭურვილობის მქონე ტექნიკის შეძენა. აუცილებლადაა ზომების მიღება მდგომარეობის გამოსასწორებლად, რომ ჩვენმა მუნიციპალიტეტმა მიიღოს სუფთა, ჯანსაღი სახე, _ აღნიშნავს დავით შარაშიძე და მიიჩნევს, რომ უნდა შეიქმნას მუნიციპალიტეტის ტერიტორიის დასუფთავებისა და სანიტარული წესრიგის, საყოფაცხოვრებო ნარჩენების გატანისა და დასუფთავების პროგრამა, რომელზეც გასულ კვირას საკრებულოს სხდომაზეც იმსჯელეს.
დეპუტატებმა ჩოხატაურის მუნიციპალიტეტის ტერიტორიაზე არსებული სანიტარულ-ჰიგიენური მდგომარეობისა და გასატარებელ ღონისძიებათა შესახებ ინფორმაცია ცნობად მიიღეს და მუნიციპალიტეტის გამგეობას შემოწმების მომენტისთვის გამოვლენილ გარემოებებზე სათანადო რეაგირებაც დაავალეს.
