ქალაქ ოზურგეთში, დავით აღმაშენებლის ქუჩის დასაწყისში, ე. წ. "გმირთა მოედანზე" მდებარე, მუნიციპალიტეტის საკუთრებაში არსებული უძრავი ქონებები მერიის თანხმობით ერთიანდება.
"გურია ნიუსის" წყაროს ინფორმაციით, აღნიშნულ ფართზე მაღაზიებს და მგზავრთა მოსაცდელს ბიზნესმენი ავთო ღლონტი და ყოფილი მერი ლევან ურუშაძე აშენებენ, თუმცა, აქ მოვაჭრე ჯიხურის მეპატრონეები "გურია ნიუსთან" ამბობენ, რომ შემინულ მაღაზიებს ქალაქი მერი ბეგლარ სიორიძეც აშენებს.
აღნიშნული ტერიტორიის ნაწილი, სადაც ავტოსადგური ფუნქციონირებს, რამდენიმე წლის წინ, ბიზნესმენმა ავთანდილ ღლონტს იჯარით აიღო.
აღნიშნული საკითხი, რამდენიმე დღის წინ ქალაქ ოზურგეთის მუნიციპალიტეტის საკრებულოს სხდომაზე გავიდა და უძრავი ქონების გაერთიანებას დეპუტატების უმრავლესობამ მხარი დაუჭირა.
"მიეცეს თანხმობა ქალაქ ოზურგეთის მუნიციპალიტეტის მერს, განახორციელოს ქალაქ ოზურგეთის მუნიციპალიტეტის საკუთრებაში არსებული, დავით აღმაშენებლის ქუჩაზე მდებარე უძრავი ქონების 17 კვ.მ. ფართობის არასასოფლო-სამეურნეო დანიშნულების მიწის ნაკვეთისა და დავით აღმაშენებლის ქუჩაზე მდებარე 4 კვ.მ. ფართობის არასასოფლო-სამეურნეო დანიშნულების მიწის ნაკვეთის მათზე არსებული ვალდებულებების უცვლელად, ერთ უძრავ ქონებად, არასასოფლო-სამეურნეო დანიშნულების მიწის ნაკვეთებად გაერთიანება.
აღნიშნული უძრავი ქონება მდებარეობს სივრცობრივად ერთ ტერიტორიაზე და ნაკვეთების გაერთიანება არქიტექტურულ-დაგეგმარებითი თვალსაზრისით, მიზანშეწონილია ტერიტორიის ერთიანი სივრცულ-დაგეგმარებით პრობლემების გადასაწყვეტად".
პროექტის ინიციატორი ქალაქ ოზურგეთის მუნიციპალიტეტის მერიაა, პროექტის ავტორი მერიის ადმინისტრაციული სამსახურის იურიდიული განყოფილება და ასევე, მერიის ეკონომიკური განვითარების, ქონების, მართვის, ინფრასტრუქტურის, ტრანსპორტისა და კეთილმოწყობის სამსახურია.
"გურია ნიუსს" "გმირთა მოედანზე" მდებარე ჯიხურების მეპატრონეებმა მიმართეს და აღნიშნული საკითხით დაინტერესება სთხოვეს. მოვაჭრეების უმრავლესობას მიაჩნია, რომ საქმიანობის გახორციელებაში პრობლემები შეექმნებათ. მათივე თქმით, მათთან არავინ მოსულა და საქმის კურსში არავის ჩაუყენებიათ.
ნელი მელუა: "ჩვენ ვიცით, რომ მერია მაღაზიებს აკეთებს. ჯერჯერობით, სხვას არაფერს გვეუბნებიან. ალბათ, დარჩება ჩვენი მაღაზიებიც, რატომ უნდა წაგვართვან?! ისე, ჩვენთან არავინ მოსულა და არაფერი უთქვამს".
ლილი ფოცხიშვილი: "ბეგი სიორიძე და ავთანდილ ღლონტი აკეთებენ მაღაზიებს. რას გვიპირებენ, არ ვიცით. როგორც ღარიბ ხალხს, გაგვყრიან, ალბათ".
მანანა ბურჭულაძე: "კეთდება მაღაზიები და მოსაცდელები, ვის ეკუთვნის, როგორ არ ვიცით _ ლევან ურუშაძეს, ბეგი სიორიძეს და ავთო ღლონტს".
როგორც აქ მდებარე რამდენიმე უძრავი ქონების და მიწის ნაკვეთების მეპატრონე რამაზ ანდღულაძე ამბობს, მაღაზიებს თვითონ და ოზურგეთის ყოფილი მერი ლევან ურუშაძე აშენებენ:
"მიბრძანდით მერიაში და იქ გეტყვიან ყველაფერს, მე და ლევანი ვაშენებთ", _ ამბობს ანდღულაძე.
"გურია ნიუსი" დაუკავშირდა ბიზნესმენ ავთანდილ ღლონტს, რომელმაც აღნიშნული ინფორმაცია, იმის შესახებ, რომ ის ქალაქ ოზურგეთის მერთან ერთად შემინულ მაღაზიებს აშენებს, არ ადასტურებს: "ეგ ინფორმაცია მართალი არ არის. მე არაფერს არ ვაშენებ, ეს არ არის ავტოსადგურის ტერიტორია".
ქალაქ ოზურგეთის ყოფილი მერი ლევან ურუშაძე ამბობს, რომ აღნიშნული ტერიტორიაზე მრავალფუნქციურ შენობას აშენებს: "ტყუილი რომ დავწეროთ, ჩინ-მედლებს ჩამოგართმევენ, თუ რა მოხდება?! რას ვაშენებ და მრავალფუნქციურ შენობას. უფრო მეტი განმარტება და დაკონკრეტება არ ვიცი მე. ჩემი წილი მიწის ნაკვეთი აღებული მაქვს იჯარით რამდენიმე თვის წინ, მაგაზე წერდა კიდეც თქვენი "ძვირფასი" გაზეთი: "რა მიწერა ყოფილმა მერმა ახალ მერს" _ ასეთი სტატია გქონდათ, გადაავლეთ თვალი", _ "ზრდილობით სავსე" პასუხი არ დაიშურა ქალაქის ყოფილმა თავმა.
როგორც ურუშაძე ამბობს, რომ მრავალფუნქციურ მაღაზიას მარტო აშენებს: "არის პროექტი და მოიძიეთ. ყველაფერს ხომ არ მოგახსენებთ?!" _ გვითხრა ყოფილმა მერმა.
ქალაქ ოზურგეთის მუნიციპალიტეტის მერის ბეგლარ სიორიძის პოზიცია აღნიშნულთან დაკავშირებით ასეთია:
"მე, როგორც ქალაქის მერი, მივესალმები და შესაძლებლობების ფარგლებში ხელს შევუწყობ ყველა მშენებლობასა თუ ახალ პროექტს, რომელიც ჩვენი ქალაქისთვის სარგებლობას მოიტანს. აღნიშნულ ტერიტორიაზე კი რა შენდება და ვის მიერ, ამის შესახებ შესაბამის დოკუმენტაციაში შავით თეთრზე წერია და აბსოლუტურად გამჭვირვალე გახლავთ".
