იზოლდა ვასაძე-თავართქილაძე დაბა ჩოხატაურში, რამიშვილის ქუჩაზე ცხოვრობს. რამდენიმე დღის წინ იგი რედაქციაში გვესტუმრა და დახმარება გვთხოვა, თან ვითარებაში უკეთ გასარკვევად, მის მიერ დაწერილი წერილი გადმოგვცა, რომელშიც ოჯახის მძიმე ყოფის შესახებ წერდა.
"ვარ 78 წლის, ვცხოვრობ ხელვიწროდ. არ გამაჩნია არავითარი ფინანსური საშუალება. რძალი უმუშევარია, შვილი _ ავადმყოფი. ჩემი პენსია არ კმარა _ გაზის განვადება, მისი დანახარჯი, დენის და წყლის გადასახადი… ჩემი პენსია რას უნდა ეყოს?!
გამგეობამ ერთჯერადი დახმარება _ 150 ლარი მომცა, 100 ლარი წამლებისთვის გადამირიცხა. სახურავი ვთხოვე და ასე მიპასუხეს, ჩვენ ვეხმარებით სოციალურად დაუცველ ოჯახებსო. მე, როგორც ხელვიწრო მცხოვრებს, არ მომცეს სოციალური დახმარება _ მაღალი ქულა გაქვსო. ვერ გავიგე, ეს ქულა რას წარმოადგენს.
რძალს ვერანაირი სამსახური ვერ ვუშოვე. გამგეობაში ორჯერ დავწერე განცხადება, მაგრამ პასუხი არავინ გამცა. რაცხა სახლი მაქვს, იმასაც სახურავი არ უვარგა _ ზამთარში თოვლი დამიმტვრევს და მევირაგვებით შიგ. მაგენის ქულა მეისპოს, ვინც ეს დააწესა, გაუჭირდა ჩემსავით და მერე მიხვდება, რა არის გასაჭირი", _ წერს ყოველდღიური მძიმე ყოფისგან დაღლილი იზოლდა ვასაძე.
"გურია ნიუსი" ქალბატონ იზოლდას სახლში ესტუმრა. სიტუაცია იმაზე გაცილებით მძიმე აღმოჩნდა, ვიდრე გარედან ერთი შეხედვით ჩანდა _ სახლი ჭერის გარეშე და ცა, რომელიც სახლიდანაც ისე ჩანს, როგორც გარედან.
"საბავშვო ბაღს სახურავი შეუცვალეს და მომცეს ძველი, მაგრამ ვერ გამოვიყენეთ _ არ ვარგა", _ გვიყვება იზოლდა ვასაძე და სიძველისგან დაცრეცილ შიფერს გვაჩვენებს.
"რა ვქნა, ვის ვთხოვო დახმარება, როგორ მოვიქცე?! ხსნას ვერსად ვხედავ. ჩემს შვილს რომ ფიზიკური შრომა შეეძლოს, ან რძალს რაიმე სამუშაო ჰქონდეს, ასე მათხოვრად არ დავვარდებოდი. ახლა კი რა ვქნა, იმის საშუალებასაც რომ ვერ ვნახულობ, წამლები ვუყიდო შვილს?" _ ამბობს იზოლდა ვასაძე და კითხვაზე, რატომ არ დაწერა განცხადება 2016 წელს სოციალური დახმარების მიღების თაობაზე, გვპასუხობს, რომ დახმარების მიღების იმედი აღარ აქვს:
"აზრი არ აქვს. რამდენჯერ დავწერე, რამდენჯერ მქონდა იმედი, რომ მივიღებდი, მაგრამ მას შემდეგ, რაც მომეხსნა უმწეოთა დახმარება, სულ მაღალი ქულები მომდის, თუმცა, როგორ ადგენენ ამ ქულებს, ვერ გავიგე, მას შემდეგ უკან-უკან თუ წავიდა ჩემი ოჯახის მდგომარეობა, თორემ წინ არ წაწეულა", _ ამბობს იზოლდა ვასაძე.
ჩოხატაურის მუნიციპალიტეტის გამგეობის პრესსამსახურში იზოლდა ვასაძის დახმარების თაობაზე გვეუბნებიან, რომ აღნიშნული პიროვნება დახმარების მიმღებ არც ერთ კატეგორიას არ განეკუთვნება, ამიტომ ეთქვა სახურავით დახმარებაზე უარი:
"იზოლდა ვასაძე არც სოციალურად დაუცველია და მისი სახლის სახურავი არც სტიქიის მიერაა დაზიანებული. ეს არის სიძველისგან გაფუჭებული სახურავი. ასეთ დროს გამგეობა სახლის სახურავს, დახმარების მიზნით, არ გასცემს, ამიტომ ოჯახს მეორადი სახურავით დავეხმარეთ. გარდა ამისა, იზოლდა ვასაძეს მიმდინარე წლის მაისში მიღებული აქვს ერჯერადი ფულადი დახმარება 150 ლარი და 150-ლარიანი დახმარება წამლების შესაძენად", _ გვითხრეს მუნიციპალიტეტის გამგეობის პრესსამსახურში.
ჩოხატაურის მუნიციპალიტეტის სოციალური სააგენტოს უფროსის ზურაბ კალანდაძის თქმით, იზოლდა ვასაძე-თავართქილაძისთვის სოციალური დახმარების შეწყვეტა ოჯახის წევრის ცვლილებამ გამოიწვია, კერძოდ, შვილიშვილის გათხოვებამ.
_ ოჯახი 2012 წლამდე იყო სოციალური დახმარების მიმღები. 2012 წელს ოჯახის ერთ-ერთი წევრი, თავართქილაძე თეონა გათხოვდა ხარაგაულში ქურდაძეების ოჯახში, რომელიც, ასევე, სოციალური დახმარების მიმღები იყო. ბუნებრივია, თეონა შეიყვანეს თავიანთი ოჯახის წევრად, შეივსო ახალი დეკლარაცია, მოხდა პიროვნების დუბლირება _ თეონა თავართქილაძე დაფიქსირდა, როგორც ხარაგაულში, ასევე, ჩოხატაურში, ამან გამოიწვია დახმარების გაცემის შეწყვეტა ორივე ოჯახზე. შემდეგ მოხდა იდენტიფიცირება, სად ცხოვრობს თეონა რეალურად, შეივსო ახალი დეკლარაცია _ თეონა თავართქილაძე წევრად შეიყვანეს ხარაგაულში, ჩოხატაურში კი შეივსო მის გარეშე 2012 წლის 11 დეკემბერს, სარეიტინგო ქულა მოვიდა _ 62 000, რაც იმ პერიოდისთვის ფულადი დახმარების მისაღებად საკმარისი არ იყო. 2013 წლის 10 თებერვალს, მოხდა ოჯახის ხელახალი გადამოწმება _ ოჯახმა მიიღო 70 030 ქულა, 2014 წელს 4 აპრილს ისევ გადამოწმდა ოჯახი, ამჯერად 79 590 ქულა მიიღო. ბოლოს, 2015 წლის 30 ივნისს მოუვიდა 90 570 ქულა.
ქალბატონ იზოლდას შეუძლია, ხვალვე მოვიდეს და შემოიტანოს განცხადება ოჯახის ხელახალ გადამოწმებაზე. თავიდან შეივსება დეკლარაცია, გაიგზავნება და ერთ თვეში მივიღებთ პასუხს, დაენიშნება თუ არა ფულადი დახმარება. მე, პირადად, კარგად ვიცნობ მაგ ოჯახს და ვიცი მათი გასაჭირის შესახებ, მაგრამ, სამწუხაროდ, დახმარებას ვერ შევძლებ, რადგან, მოგეხსენებათ, სარეიტინგო ქულა დგება პროგრამულად და ამას კომპიუტერი აკეთებს, _ გვითხრა ზურაბ კალანდაძემ.
