„25 ოქტომბერს გამგებელს, ზაზა ურუშაძეს განცხადებით მივმართე და მოვთხოვე სასამართლო გადაწყვეტილების აღსრულება. თუმცა, სამი კვირა გადის და გამგეობიდან პასუხი არ ისმის“, _ ამბობს ლანჩხუთის მუნიციპალიტეტის გამგებლის ყოფილი პირველი მოადგილე ვახტანგ ზენაიშვილი, რომელსაც სასამართლო დავა აქვს ლანჩხუთის გამგეობასთან.
ცნობისთვის, ვახტანგ ზენაიშვილი გამგებელ ზაზა ურუშაძის ბრძანების საფუძველზე გასული წლის 21 მაისს გათავისუფლდა დაკავებული თანამდებობიდან. ზენაიშვილი იმთავითვე უკანონოდ და დაუსაბუთებლად მიიჩნევდა გამგებლის ამ გადაწყვეტილებას და სიმართლის დასადგენად სასამართლოს მიმართა.
საქმემ ყველა სასამართლო ინსტანცია გაიარა და ყველა ინსტანციამ გამგებლის ბრძანება მოადგილის სამსახურიდან გათავისუფლების თაობაზე არაკანონიერად ცნო და მოითხოვა გათავისუფლების საფუძვლის დასაბუთება.
ბოლოს, გამგეობამ დავის გადატანა უზენაეს სასამართლოში სცადა. თუმცა, როგორც მოსალოდნელი იყო, უზენაესმა სასამართლომ მიიჩნია, რომ ქვედა ინსტანციებში გადაწყვეტილებები კანონიერად იქნა მიღებული და არ არსებობს გასაჩივრების საფუძვლები:
„საკასაციო სასამართლო გასაჩივრებული გადაწყვეტილების გაცნობის, საკასაციო საჩივრის საფუძვლიანობის შემოწმების შედეგად მიიჩნევს, რომ ლანჩხუთის მუნიციპალიტეტის გამგეობის საკასაციო საჩივარი დაუშვებლად უნდა იქნას ცნობილი შემდეგ გარემოებათა გამო: საკასაციო სასამართლოს მიაჩნია, რომ მოცემულ შემთხვევაში არ არსებობს სააპელაციო სასამართლოს მიერ გამოყენებული საპროცესო და მატერიალური სამართლის ნორმების განმარტებისა და სამართლის განვითარების მიზნით, საკასაციო სასამართლოს მიერ ზოგადი მნიშვნელობის მქონე სახელმძღვანელო და სარეკომენდაციო გადაწყვეტილების გამოტანის ფაქტობრივი საჭიროება. საკასაციო სასამართლოს მოსაზრებით, აღნიშნულ საქმეს არ გააჩნია პრინციპული მნიშვნელობა სასამართლო პრაქტიკისთვის, ხოლო საკასაციო საჩივარს _ წარმატების პერსპექტივა. საკასაციო სასამართლოს მიაჩნია, რომ სააპელაციო სასამართლომ საქმე განიხილა არსებითი პროცესუალური დარღვევების გარეშე და საქმეზე არსებითად სწორი გადაწყვეტილებაა მიღებული“, _ აღნიშნულია უზენაესი სასამართლოს განჩინების სამოტივაციო ნაწილში, რომელიც 22 სექტემბრით თარიღდება.
ბუნებრივია, ჯერი აღსრულების პროცესამდე მივიდა, თუმცა, ჯერ კიდევ ბუნდოვანია, თუ როდის და როგორ დაკმაყოფილდება მომჩივანის სარჩელი, რომელიც მის თანამდებობაზე აღდგენასა და 17 თვის ხელფასის ანაზღაურებას ითხოვს, რაც, ჯამში, 23 800 ლარს შეადგენს.
„როგორც ცნობილია, უზენაესმა სასამართლომაც უკანონოდ მიიჩნია ჩემი თანამდებობიდან გათავისუფლება და ძალაში დატოვა სააპელაციო სასამართლოს გადაწყვეტილება გამგებლის #314 ბრძანების ბათილად ცნობის შესახებ, რაც იმას ნიშნავს, რომ აღდგა გათავისუფლებამდელი ვითარება. 25 ოქტომბერს ზაზა ურუშაძეს განცხადებით მივმართე და მოვთხოვე სასამართლო გადაწყვეტილების შესრულება. თუმცა, მესამე კვირა გადის და გამგეობიდან პასუხი არ ისმის. ვინაიდან ბატონი გამგებელი არც საკუთარ თავს სცემს პატივს და არც სასამართლოს. ამდენად, იძულებული ვარ, სხვა სამართლებრივ საშუალებებსაც მივმართო, თვით სისხლის სამართლის პასუხისმგებლობის ჩათვლით“, _ ამბობს ზენაიშვილი.
უზენაესი სასამართლოს გადაწყვეტილებასთან დაკავშირებით განსხვავებული შეხედულება აქვთ მუნიციპალიტეტის გამგეობაში.
„სასამართლოს გადაწყვეტილებას მუნიციპალიტეტი აღასრულებს კანონმდებლობით დადგენილი წესით. გადაწყვეტილება მიღებული იქნება კანონმდებლობით გათვალისწინებულ ვადებში, რაც არც თანამდებობაზე აღდგენას და არც თანხის ანაზღაურებას არ გულისხმობს“, _ ნათქვამია გამგეობის პრესასთან და საზოგადოებასთან ურთიერთობის განყოფილებიდან მიღებულ პასუხში.
