"გურია ნიუსის" მიერ, შეზღუდული შესაძლებლობების მქონე გიორგი ჩერქეზიშვილის პრობლემის გაშუქების შემდეგ, დღეს მასთან სოციალური მომსახურების სააგენტოს გურიის სამხარეო განყოფილების უფროსის მოადგილე და სოციალური მუშაკი ადგილზე იმყოფებოდნენ.
ამის შესახებ ინფორმაცია ინფორმაცია შრომის, ჯანმრთელობისა და სოციალური მომსახურების სამინისტროდან მოგვაწოდეს.
მათი ცნობით, სოციალურმა მუშაკმა ჩერქეზიშვილს შესთავაზა შშმ პირთა თავშესაფარში გადაყვანა, თუმცა ჯერჯერობით მას თანხმობა ან კატეგორიული უარი არ განუცხადებია და მოსაფიქრებლად დრო ითხოვა.
მათივე ცნობით, 2009, 2013 წლებში ჩერქეზიშვილს სოციალური მომსახურების სააგენტოდან დახმარება რამდენჯერმე გაეწია და მექანიკური ეტლი გადასცეს. მოგვიანებით, 2014 წელს კი, ელექტროეტლი მიიღო, რითაც ახლაც სარგებლობს.
"გიორგი ჩერქეზიშვილმა ცოტა ხნის წინ მოითხოვა იდაყვსზედა პროთეზი, რაზეც ასევე მიიღო ვაუჩერი და ახლა მზადდება მისთვის ეს პროთეზი. როგორც თავად გვითხრა, შვილი წასულია თბილისში რომ პროთეზი დაამზადებინოს.
გარდა ამისა, ბატონ გიორგის ასევე შევთავაზეთ შშმ პირთა თავშესაფარში გადაყვანა, სადაც ის უზრუნველყოფილი იქნება სამედიცინო მომსახურებით, კვებით და ყველა საჭირო სერვისით. სამწუხაროდ, თავშესაფარში გადასვლაზე ჯერჯერობით უარს ამბობს იმ მოტივით, რომ შვილებისთვის უხერხული იქნება მამის შშმ პირთა პანსიონში გადაყვანა", _ აცხადებენ სოციალური მომსახურების სააგენტოში.
შეგახსენებთ, რომ ეტლით მოსარგებლე 56 წლის მამაკაცი, რომელსაც არცერთი ხელი და ფეხი არ აქვს, მეზობლების დახმარების იმედადაა. ის ოზურგეთის მუნიციპალიტეტის სოფელ ნატანებში ე.წ. ახალშენის დასახლებაში ცხოვრობს. საცხოვრებელ ერთოთახიან სახლს არც კარ-ფანჯარა აქვს, არც იატაკი. ოთახში შესასვლელი იმდენად უსწორმასწოროა, ადამიანს გავლა გაუჭირდება. სახლის ჭერიდან წვიმა ჩამოდის და ჩერქეზიშვილის ისედაც გაუსაძლის ყოფას კიდევ უფრო ამძიმებს. საწოლი რაზეც მამაკაცს სძინავს, წვიმის წვეთებისგან მთლიანად სველია.
ჩერქეზიშვილი მარტო ცხოვრობს. ორი შვილი და რძალი ჰყავს, თუმცა, როგორც თვითონ ამბობს, ისინი იშვიათად აკითხავენ.
სტატიის მომზადებისას დავუკავშირდით სოციალური მომსახურების სააგენტოს, სადაც განგვიცხადეს, რომ ჩერქეზიშვილის მდგომარეობის შესახებ ინფორმირებულები არიან. თუმცა, იმის გამო, რომ მისი სარეიტინგო ქულა მაღალია, დახმარების საშუალებას არ აქვთ.
"გიორგი ჩერქეზიშვილს საარსებო შემწეობის გაცემა შეუწყდა 2014 წელს გეგმა- გრაფიკით გადამოწმების შემდეგ. წელს ოჯახი გადამოწმდა ორჯერ, ამჯერად მისი სარეიტინგო ქულა ოდნავ აღემატება სოციალურად დაუცველთა შეფასების მეთოდოლოგიით განსაზღვრულ ზედაზღვარს. ანუ მისი სარეიტინგო ქულა,სამწუხაროდ, არ ითვალისწინებსფულად საარსებო შემწეობას, თუმცა, ისსარგებლობს სოციალურად დაუცველთათვის განკუთვნილი საყოველთაო ჯანდაცვის პროგრამით,ასევე როგორც შშმ პირი ის იღებს სოციალურ პაკეტს – 180 ლარს.მოგეხსენებათ, როცა სოცაგენტის მიერ ივსება დეკლარაცია, მასში იწერება სხვადასხვა მონაცემი, რასაც ოჯახის წევრები უთითებენ. ყველაეს მონაცემი გარკვეულ გარკვეულ გავლენას ახდენს სარეიტინგო ქულის ფორმირებაზე. ამბენეფიციარს დაფიქსირებული აქვს პენსია, მიწის ნაკვეთი, მცირე ზომის სახლი, სასოფლო-სამეურნეო პროდუქტების გაყიდვიდან მიღებული შემოსავალი, მცირეოდენი არარეგულარული შემოსავალი მუნიციპალიტეტიდან და ასევე ორი მასთან არმცხოვრები შვილი, რომლებიც მის პოტენციურ დამხმარეებად ითვლებიან… ჩვენ გვესმის, რომ ამ ადამიანის მდგომარეობა ნამდვილად მძიმეა, მაგრამ, სამწუხაროდ, სარეიტინგო ქულის დათვლისას ყოველგვარი სუბიექტური ფაქტორები გამორიცხულია და პროგრამულად ამ მონაცემებზე დაყრდნობით გამოვიდა ეს სარეიტინგო ქულა, რაც როგორც ზემოთ აღვნიშნეთ დახმარების მისაღებად საკმარისი არ არის", _ განგვიცხადეს გუშინ სააგენტოში.
ამავე თემაზე:
“შეიძლება თავი მოვიკლა, ვერ გავუძლებ ზამთარს…“_ შშმ პირის ტრაგიკული ისტორია
