ოზურგეთის მუნიციპალიტეტის სოფელ ცხემლისხიდში მცხოვრები ამირან სალუქვაძე С ჰეპატიტით დაავადებულია. გარდა ამისა, სხვა ავადმყოფობაც აწუხებს. 47 წლის მამაკაცი, როგორც მისი ოჯახის წევრები ამბობენ, ლოგინადაა ჩავარდნილი და ფიზიკურად შრომისუუნაროა.
ამირან სალუქვაძის მეუღლე სოფია ერქვანია "გურია ნიუსთან" ოჯახის უმძიმეს პირობებზე საუბრობს და ამბობს, რომ მისი მეუღლე არც სოციალურ დახმარებას იღებს და არც С ჰეპატიტით მკურნალობის პროგრამაშია. მისივე თქმით, სოციალური დახმარება ოჯახს იმ მიზეზით მოეხსნა, რომ მისი შვილი თურქეთში იყო გადასული სამუშაოდ, ხოლო მკურნალობის პროგრამაში იმის გამო ვერ მოხვდა, რომ ოჯახი არ მიეკუთვნებოდა სოციალურად შეჭირვებული ოჯახების სიას.
სოფია ერქვანია: "ჩემი მეუღლე უმძიმესი ავადმყოფია, ლოგინად არის ჩაწოლილი, მყავს ორი შვილი, ასევე, პენსიონერი დედამთილი. ძალიან გვიჭირს, ვცხოვრობთ გაუსაძლის პირობებში, არ გვაქვს არანაირი შემოსავალი, არც _ სამუშაო, არც _ სოციალური დახმარება, რატომ წავიდა თქვენი შვილი თურქეთში სამუშაოდო, _ მითხრეს და სოციალური დახმარება მომიხსნეს. სამუშაოდ იყო წასული, სასეირნოდ ხომ არა? დაასაქმონ მაშინ აქეთ?! ჩაის და თხილის საკრეფად იყო წასული. ხელი გადაიჭრა დაზგაზე და ოპერაცია გაუკეთდა, ამის გამო დროულად აქეთ ვერ ჩამოვიდა და საზღვრის გადაკვეთის უფლებაც აუკრძალეს.
დეკემბერში სოციალური დახმარება დაგვინიშნეს, ექვს თვეში კი უკვე მომიხსნეს, იმის გამო, რომ თურქეთში იყო ჩემი შვილი. მეუღლე იმის გამო არ ჩასვეს პროგრამაში, რომ არ მქონდა სოციალური დახმარება. როცა მივედი სოციალურ სააგენტოში, მითხრეს, "შავ სიაში" ხარო. ეს სამართალია? ოჯახის ერთი წევრის "დანაშაულის" გამო, "დანაშაული" თუ ჰქვია ამას, უნდა ვისჯებოდეთ ჩვენ, სხვა დანარჩენები, ან შვილის გამო, მამამ პასუხი როგორ უნდა აგოს?! კაცი ლოგინადაა ჩავარდნილი და ფაქტობრივად, ვუყურებთ, როდის მოკვდება უწამლოდ, უსახსრობით, მკურნალობის გარეშე".
სოფია ერქვანია ამბობს, რომ მან დახმარებისთვის ოზურგეთის მუნიციპალიტეტის გამგეობას რამდენჯერმე მიმართა, თუმცა, უარი მიიღო:
"ერთსართულიანი სახლში ყველა მხრიდან აწვიმს. წვიმისგან სულ დალპა ჭერი, იატაკი, ლოგინები. ძალიან რთულ ყოფაში ვართ. ჩვენი ოჯახის შემოსავალი 50 კილოგრამი კივი და მაქსიმუმ, 100 კილოგრამი თხილია, რომელსაც მოკრეფისთანავე ვყიდით და ვყიდულობთ საკვებს. უფროს შვილსაც ჯანმრთელობის პრობლემა აქვს წლებია, მაგრამ უსახსრობის გამო ვერაფერს ვახერხებთ.
გათბობაც არ გვაქვს, პლასტმასის ბოთლებს ვწვავთ, რომ გავთბეთ. სახლის თაობაზე გამგეობას მივმართე დახმარებისთვის, ჩვენს დეპუტატთანაც ვიყავით, არავინ მოსულა შესამოწმებლად. სხვა ფინანსური დახმარებისთვის არ მიმიმართავს _ ფულის ნაცვლად, წამლები უნდა მიგვეღო და მითხრეს, რომ არ ხართ სოციალურად დაუცველის სტატუსის მქონე, ვერ მოგცემთო," _ ამბობს სოფია ერქვანია.
ოზურგეთის მუნიციპალიტეტის გამგეობაში C ჰეპატიტით დაავადებულ პირებში მკურნალობის ტაქტიკის განსაზღვრისთვის საჭირო კვლევების დაფინანსება ხორციელდება:
_ ოზურგეთის მუნიციპალიტეტის ტერიტორიაზე რეგისტრირებული მოქალაქეების, რომელთა სარეიტინგო ქულა "სოციალურად დაუცველი ოჯახების მონაცემთა ერთიანი ბაზის" მიხედვით არ აღემატება 100 001-ს და საჭიროებენ დიაგნოსტიკური კვლევების ჩატარებას, მკურნალობის ტაქტიკის განსაზღვრისთვის, ტარდება C ჰეპატიტის ელიმინაციის პროგრამა. პროგრამის ფარგლებში, დაფინანსება გახორციელდება საბიუჯეტო წლის განმავლობაში ერთჯერადად, სამედიცინო დაწესებულებაში თანხის გადარიცხვით, კვლევების ღირებულების სრული ოდენობა არა უმეტეს 400 ლარის, _ ამბობენ გამგეობაში.
ოზურგეთის მუნიციპალიტეტის გამგეობის განათლების, ახალგაზრდობის საქმეთა და სოციალური დაცვის სამსახურის უფროსი მაიზერ ცელაძე ამირან სალუქვაძესთან დაკავშირებით კომენტარს აკეთებს. მისი თქმით, მიუხედავად იმისა, რომ აღნიშნულ პიროვნებას აღნიშნული სამსახურისთვის ოფიციალურად არ მიუმართავს, გამგეობა მას განცხადების დაწერისთანავე გაუწევს სათანადო დახმარებას:
"ამირან სალუქვაძეს ჩვენთვის არ მოუმართავს _ სამსახურში ოფიციალური განცხადება არ ფიქსირდება. კარგი იქნება, თუ ის დაწერს ადგილობრივ თემში განცხადებას. იქედან გამოგვიგზავნიან ამ განცხადებას და დავეხმარებით. ჩვენ პირველად დახმარებას ვუწევთ ყველა იმ პიროვნებას, ვისაც აღენიშნება C ჰეპატიტის ვირუსი და ესაჭიროებათ გამოკვლევები. გამოკვლევები მოქმედებს იმ ოჯახებზე, რომელთა სარეიტინგო ქულები არ აღემატება 100 000-ს, მაგრამ ვითვალისწინებთ იმ ადამიანების მდგომარეობასაც, რომლებსაც სოციალურად ძალიან უჭირთ და არიან კრიტიკულ მდგომარეობაში. განცხადებას განიხილავს კომისია და შესაძლებლობების ფარგლებში დავეხმარებით", _ ამბობს ცელაძე.
ოზურგეთის მუნიციპალიტეტის გამგებლის წარმომადგენელი სოფელ ცხემლისხიდში, დავით ჭანუყვაძე "გურია ნიუსთან" ამბობს, რომ მუნიციპალიტეტმა რამდენიმე წლის წინ ამირან სალუქვაძეს დახმარება გაუწია:
"გამგეობიდან დახმარება მიღებული აქვს _ ახლა მოვიძიე ძველი საბუთები, დაახლოებით, 300 ლარი გვაქვს ჩარიცხული. სახლის მასალებზეც დახმარება გაწეული აქვს ყოფილი გამგებლის, კოტე შარაშენიძის დროს. ახლაც უარი არავის უთქვამს დახმარებაზე", _ ამბობს ჭანუყვაძე.
სოციალური მომსახურების სააგენტოში ამ საკითხზე ასეთ კომენტარს აკეთებენ: "სალუქვაძეების ოჯახი სოციალურად დაუცველთა ბაზაში რეგისტრირებული იყო 2010 წლიდან, მაგრამ საარსებო შემწეობის მიმღებები გახდნენ 2014 წელს. მანამდე ოჯახს ყოველთვის მაღალი სარეიტინგო ქულა ჰქონდა. იმ დროისთვის ოჯახში ერთი ასაკოვანი ქალბატონი ფიქსირდებოდა, რომელსაც სიცოცხლისთვის საშიში დაავადება ჰქონდა. ოჯახის არც ერთ წევრს ჯანმრთელობის რაიმე პრობლემა აღნიშნული არ ჰქონდა. ოჯახს ბაზაში რეგისტრაცია გაუქმებული აქვს 2016 წლის იანვრიდან _ ამის მიზეზი გახდა ოჯახის ერთ-ერთი წევრის მიერ საზღვრის გადაკვეთა 3 თვეზე მეტი ხნით, რაც არ უცნობებიათ სააგენტოსთვის. ოჯახთან დამატებითი ვიზიტიც გახორციელდა და შრომისუნარიან წევრებს შესთავაზეს დასაქმება. ჯერჯერობით, შეთავაზებაზე მათ პასუხი არ გაუციათ. თუკი ოჯახში მართლაც მძიმე მდგომარეობაა, მათ შეუძლიათ, მიმართონ სააგენტოს და მოითხოვონ ბაზაში რეგისტრაციის აღდგენა. სპეციალური კომისიის დადებითი გადაწყვეტილების შემდეგ, შესაძლებელი იქნება ოჯახის ხელახალი გადამოწმება. სააგენტო აგრძელებს ოჯახთან მუშაობას და მზად არის შეთავაზებულ ვაკანსიებზე რეკომენდაცია გაუწიოს ოჯახის წევრებს. მათ, ასევე, განემარტათ, როგორ შეუძლიათ C ჰეპატიტის პროგრამაში ჩართვა. სარეიტინგო ქულას არავითარი მნიშვნელობა არ აქვს ამ პროგრამაში ჩართვისთვის _ ის ხელმისაწვდომია საქართველოს ყველა მოქალაქისთვის, რომელიც საქართველოს ტერიტორიაზე იმყოფება. გარდა სოციალური დახმარებისა, არსებობს სხვა სოციალური პაკეტებიც. თუ ოჯახის წევრები შრომისუუნარონი არიან მათი ჯანმრთელობის მდგომარეობიდან გამომდინარე, მათ შეუძლიათ, დაიდგინონ შესაბამისი ჯგუფი და მიიღონ სოციალური პაკეტი, ანუ შშმ პირის პენსია", _ აცხადებენ სააგენტოში.
კითხვაზე, მიმართა თუ არა ამირან სალუქვაძის ოჯახმა ოზურგეთის მუნიციპალიტეტის გამგეობას დახმარებისთვის და გაეწია თუ არა რამე სახის დახმარება, გამგეობაში ასე გვპასუხობენ:
"სოფელ ცხემლისხიდში მცხოვრებ ამირან სალუქვაძის ოჯახს, დედის _ ოლია სალუქვაძის განცხადების საფუძველზე, მიმდინარე წელს, ოზურგეთის მუნიციპალიტეტის გამგებლის სარეზერვო ფონდიდან ოპერაციული მკურნალობის დასაფინანსებლად გადაერიცხა 304 ლარი. 2013 წელს სალუქვაძეების ოჯახმა დახმარების სახით მიიღო სამშენებლო მასალები _ თუნუქი და შიფერი. ხოლო, მას შემდეგ, რაც 2014 წელს ახლადარჩეული თვითმმართველობა თავისი უფლებამოსილების გახორციელებას შეუდგა, სალუქვაძის ოჯახს ოზურგეთის მუნიციპალიტეტის გამგეობისთვის სახლის გადასახური მასალით უზრუნველყოფის მოთხოვნით არ მოუმართავს. თუკი ისინი წარმოადგენენ შესაბამის განაცხადს, მუნიციპალიტეტი ადგილზე მიავლენს სპეციალისტებს, რომლებიც მდგომარეობას შეისწავლიან და შესაძლებლობის ფარგლებში, მათ შესაბამისი დახმარება გაეწევა".
.jpg_22925.jpg)
