6 170 812 დოლარი, 725 878 ევრო და 2 600 860 ლარი _ ეს მინისტრთა კაბინეტის წევრების ვალებია. საქართველოს მინისტრთა კაბინეტში პრემიერ-მინისტრის ჩათვლით სულ 19 მინისტრია, მათი სასესხო ხელშეკრულებები კი, ქონებრივი დეკლარაციების მიხედვით, რამდენიმე მილიონს აჭარბებს.
მინისტრების უმრავლესობის სასესხო ვალდებულებები 2018-2033 წლებშია დასაფარი. ყველაზე დიდი რაოდენობით ვალი კახა კალაძეს და ტარიელ ხეჩიკაშვილს აქვს.
აღსანიშნავია ისიც, რომ მინისტრთა კაბინეტის 6 წევრს ვალი არ აქვს.
საქართველოს პრემიერ-მინისტის, გიორგი კვირიკაშვილის სახელზე 2016 წელს შევსებული დეკლარაციის მიხედვით, 173500-დოლარიანი იპოთეკური სესხია, რომელიც მას 2015 წლის 9 ივლისს აუღია და ვადა 2030 წელს ეწურება. გასულ წელს კი, “ქართუ” ბანკს 8545.00 დოლარი გადაუხადა.
120000-დოლარიანი იპოთეკური სესხი კი, რომელიც კვირიკაშვილმა 2012 წლის 1 ნოემბერს აიღო ბანკი ქართუდან, 2015 წელს დაფარა, ბოლო წელს კი, ბანკს სესხის დასაფარად 109482.00 დოლარი გადაუხადა.
გაცილებით დიდი ვალები აქვს ვიცე-პრემიერ კახა კალაძეს.
2016 წელს შევსებული დეკლარაციიდან ირკვევა, რომ მხოლოდ “ქართუ” ბანკიდან კალაძეს 1 637 000 დოლარი აქვს აღებული. ხოლო, 1 541000.00 -დოლარიანი სესხი კალაძეს “ქართუ” ბანკიდან 2012 წლის 29 მაისს აუღია და ვადა 2022 წლის მაისში ეწურება. გასულ წელს კი, სესხის დასაფარად 268463.84 დოლარი აქვს გადახდილი.
96000.00-დოლარიანი სესხი კი, წინა სესხის აღებიდან რამდენიმე დღეში, 2012 წლის 4 ივნისს აუღია და მისი დაფარვის ვადაც 2022 წელს იწურება. 16708.38 დოლარი კი გასულ წელს გადაიხადა.
გარდა ამისა, კალაძის სახელზეა (საკრედიტო ბარათით მომსახურება) –75 000– ევროიანი სესხიც, რომელიც მას 2008 წლის 7 ივლისს აქვს აღებული და ვადა 2016 წლის 31 მაისს ეწურება. გასავლის სახით კი, ამ სესხის დასაფარად ,,საქართველოს ბანკში‘‘ 30 8045.00 ევრო აქვს დაფიქსირებული.
ამასთანავე, კალაძის დეკლარაციაში ვკითხულობთ, რომ 120 000-ევროიანი სესხი მან 2013 წლის 17 სექტემბერს “პროგრეს ბანკიდან” აიღო და ვადა 2015 წლის 15 დეკემბერს ამოეწურა, გასავლის გრაფაში კი ამ სესხის დასაფარად 136120.00 ევრო აქვს მითითებული.
ამას გარდა, კალაძეს კიდევ ერთი სესხი ჰქონდა აღებული პროგრეს ბანკიდან, რომლის გადახდის ვადაც 2015 წელს ამოეწურა. სესხის ოდენობა 20 000 დოლარი იყო, ხოლო ბანკს მის დასაფარად 24 265 დოლარი გადაუხადა.
რაც შეეხება 1 150 000-დოლარიან სესხს, კალაძემ ის 2015 წლის 15 დეკემბერს საქართველოს ბანკიდან აიღო, ვადა 2025 წლის 15 დეკემბერს ეწურება.
2014 წლის 31 ოქტომბრიდან, 410 000 – დოლარიანი სესხი აქვს აღებული თიბისი ბანკიდან კალაძის მეუღლეს, ანა არეშიძესაც. სესხის დაფარვის ვადა 2024 წელს იწურება, ბანკს კი გასულ წელს 61200 დოლარი გადაუხადა.
ფინანსთა მინისტრის, დიმიტრი ქუმსიშვილის სახელზე ორი სესხია. 2016 წელს, მის მიერ შევსებული დეკლარაციიდან ირკვევა, რომ დიმიტრი ქუმსიშვილს უძრავი ქონების შესაძენად 59000-დოლარიანი იპოთეკური სესხი ბანკი “ქართუდან” 2014 წლის 29 დეკემბერს აუღია და ვადა 2024 წლის დეკემბრის ბოლოს ეწურება. გასულ წელს კი ბანკს 41563.00 დოლარი გადაუხადა. მეორე იპოთეკური სესხიც, ქუმსიშვილს “ქართუდან” 2015 წელს აქვს აღებული. თანხის ოდენობა – 20 000 დოლარია და დაფარვის ვადა 2025 წელს იწურება. გასულ წელს კი, ბანკს 2735.00 დოლარი გადაუხადა.
2016 წელს შევსებული დეკლარაციიდან ირკვევა, რომ იუსტიციის მინისტრის, თეა წულუკიანის სახელზე 4 სესხია. 248500-ევროიანი სესხი მას ბანკი კრედი ლიონესგან 2008 წელს აუღია და ვადა 2029 წლის მაისში ეწურება. წულუკიანს თავდაპირველი სესხიდან მხოლოდ 80878 ევრო აქვს დარჩენილი გადასახდელი, გასულ წელს კი ბანკს 8009 ევრო გადაუხადა.
რაც შეეხება 39840-დოლარიან იპოთეკურ სესხს ის წულუკიანმა 2013 წლის 4 ივლისს სოფელ დიღომში მიწის ნაკვეთის შესაძენად აიღო საქართველოს ბანკიდან და ვადა 2018 წლის 2 ივლისს ეწურება. გასულ წელს კი ბანკს 10356 დოლარი გადაუხადა. გარდა ამისა, წულუკიანის სახელზე 15610-ლარიანი სამომხმარებლო სესხია, რომელიც მან 2015 წელს აიღო და ვადა 2017 წელს ეწურება. გასულ წელს კი, საქართველოს ბანკს 3710 ლარი გადაუხადა.
მეორე სამომხმარებლო სესხი – 10 000 ლარის ოდენობით, წულუკიანმა 2015 წლის 4 ნოემბერს აიღო და ვადა 2018 წლის 1 ნოემბერს ეწურება. საქართველოს ბანკს ამ სესხის დასაფარად გასულ წელს 730 ლარი გადაუხადა.
განათლების მინისტრის, ალექსანდრე ჯეჯელავას სახელზე, 2016 წელს შევსებული დეკლარაციის მიხედვით რამდენიმე სესხია. კერძოდ, დეკლარაციიდან ირკვევა, 2015 წლის 18 აგვისტოს, თიბისი ბანკიდან აღებული იპოთეკური სესხის ლარში გადატანით ჯეჯელავას, ბანკის 65 000 ლარი მართებს. სესხის ვადა კი, 2018 წლის მარტში იწურება. გასულ წელს ვალის დასაფარად მან 13732.07 ლარი გადაიხადა.
ამავე ბანკიდან მინისტრს 13000-დოლარიანი სამომხმარებლო სესხი აქვს აღებული, 2016 წლის 7 აპრილს, დაფარვის ვადა 2017 წელს ეწურება.
გარდა ამისა, მინისტრის დეკლარაციაში ვკითხულობთ, რომ 46300-დოლარიანი იპოთეკური სესხი, რომელიც წარმოიქმნა ორი იპოთეკური სესხის გაერთიანებით, ჯეჯელავამ 2015 წლის 18 აგვისტოს დაფარა. თიბისი ბანკს კი, გასულ წელს 35802.10 დოლარი გადაუხადა.
საგარეო საქმეთა მინისტრს, მიხეილ ჯანელიძეს, 2016 წელს შევსებულ დეკლარაციაში მხოლოდ ერთი სესხი აქვს დაფიქსირებული, რომელიც მან 2013 წლის 26 ნოემბერს თიბისი ბანკისგან აიღო და ვადა 2028 წელს ეწურება. სესხის ოდენობა – 260 000 ლარია და მის დასაფარად ბანკს გასულ წელს 27765 ლარი გადაუხადა.
2016 წელს შევსებული ქონებრივი დეკლარაციიდან ირკვევა, რომ ეკონომიკისა და მდგრადი განვითარების მინისტრს, გიორგი გახარიას ორი სესხი აქვს, საკრედიტო ხელშეკრულება ავტოგანვადებისათვის ბანკ “რესპუბლიკასთან” 2015 წლის 24 ივლისს გაუფორმებია და ვადა 2017 წელს ეწურება. სესხის ოდენობა 11370 დოლარია და მის დასაფარად გასულ წელს გახარიას 2120 დოლარი გადაუხდია. ამავე დღეს აქვს ბანკ “რესპუბლიკასთან” გაფორმებული 2102.41-დოლარიან სადაზღვევო სესხის ხელშეკრულებაც, რომლის ვადაც წინა ხელშეკრულების მსგავსად 2017 წლის 24 ივლისს იწურება. გასულ წელს კი ბანკს 422 დოლარი გადაუხადა.
ბანკი “ქართუს” ვალი აქვს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრს, სოზარ სუბარსაც. 2016 წელს შევსებული ქონებრივი დეკლარაციიდან ირკვევა, რომ საცხოვრებელი ბინის შესაძენად, სუბარს 140000-დოლარიანი სესხი 2013 წლის 13 მარტს აუღია. სესხის დაფარვის ვადა 2023 წელს იწურება. გასულ წელს კი, 14761 დოლარი გადაუხდია.
კულტურისა და ძეგლთა დაცვის მინისტრის მიხეილ გიორგაძის ქონებრივი დეკლარაციიდან კი ირკვევა, რომ მის სახელზე 50000–დოლარიანი (შემოსავალი) იპოთეკური სესხია. სასასხეო ხელშეკრულება 2013 წლის 12 ნოემბერს არის გაფორმებული და ვადა 2023 წელს ეწურება.
სპორტისა და ახალგაზრდობის საქმეთა მინისტრის, ტარიელ ხეჩიკაშვილის, 2016 წელს შევსებული დეკლარაციიდან ირკვევა, რომ მის ოჯახს 9 სასესხო ხელშეკრულება აქვს დადებული. ჯამში სესხის ოდენობა 2 250 250 ლარი და 1 077 000 დოლარია.
სესხების პროცენტების დასაფარად კი, გასული წლის განმავლობაში ოჯახს 2 633 164 ლარი და 85 372.81 დოლარი აქვს გადახდილი.
შერიგებისა და სამოქალაქო თანასწორობის საკითხებში სახელმწიფო მინისტრის,
ქეთევან ციხელაშვილის 2016 წელს შევსებული ქონებრივი დეკლარტაციიდან ირკვევა, რომ მის სახელზე რაიმე სახის სესხი არ არის. თუმცა, ციხელაშვილის მეუღლეს, არმინ ჰუთენლოხერს, 2013 წელს, ING DIBA ბანკიდან, 450 000-ევროიანი სესხი აქვს არებული, რომლის გადახდის ვადა 2033 წლის 1 აპრილს იწურება. გასულ წელს კი, ბანკს 48000 ევრო გადაუხადა.
მინისტრები, რომლებსაც ვალები არ აქვთ
საქართველოს მინისტრთა კაბინეტში, 6 მინისტრს რაიმე სახის სასესხო ვალდებულება ბანკებთან არ აქვთ. კერძოდ, ვალი არ აქვს სასჯელაღსრულებისა და პრობაციის მინისტრს, კახა კახიშვილს, შრომის, ჯანმრთელობისა და სოციალური დაცვის მინისტრს, დავით სერგეენკოს, ასევე, შინაგან საქმეთა მინისტრს, გიორგი მღებრიშვილს, საქართველოს სოფლის მეურნეობის მინისტრს, ლევან დავითაშვილს, თავდაცვის მინისტრს, ლევან იზორიას და რეგიონული განვითარებისა და ინფრასტრუქტურის მინისტრ ზურაბ ალავიძეს.
რაც შეეხება ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინიტრს, ვიქტორ დოლიძეს, ბოლო დეკლარაცია 2014 წელს აქვს შევსებული მაშინ, როცა ის პარლამენტის წევრი იყო. დეკლარაციის მიხედვით, 10000-ლარიანი სესხი (საკრედოტო ბარათი) 2011 წლის 31 მარტს აუღია და ვადა 2016 წლის მარტში ამოეწურა. საქართველოს ბანკს კი, დეკლარაციის შევსების წელს, 12000 ლარი გადაუხადა. დოლიძეს 2016 წელს დელარაცია ჯერ შევსებული ა აქვს, ამიტომ უცნობია, აქვს თუ არა რაიმე ვალი ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინიტრს.
ქონებრივი დეკლარაცია 2016 წელს ჯერ არ შეუვსია გარემოსა და ბუნებრივი რესურსების დაცვის მინისტრს, გიგლა აგულაშვილს . 2015 წელს შევსებული დეკლარაციიდან კი ირკვევა, რომ მას 2007 წელს დაუდია იპოთეკის ხელშეკრულება პრივატიზების ფასის უზრუნველყოფის შესახებ. ხელშეკრულების თანხის ოდენობა 17600 ლარია და მისი დაფარვის ვადა 2016 წლის 12 ივნისს ამოიწურა. 2014 წელს კი, 3480 ლარი გადაიხადა.
