კონტროლის პალატის სადამსჯელო ეკზეკუციის შესახებ გურიაში, მაშინ მთელმა საქართველომ გაიგო. “საშვთა სისტემის” იდეოლოგია ნაციონალურმა ხელისუფლებამ სათავეში სასწრაფოდ გაიზიარა და სხვადასხვა რაიონში, მეტ-ნაკლები სიმკაცრით დღესაც მოქმედებს. თუმცა არის რაიონები, სადაც საერთოდ არ არსებობს ეს წესი.
2012 წლის 11 მაისიდან ხარაგაულის მუნიციპალიტეტის ადმინისტრაციულ შენობაში, სადაც მუნიციპალიტეტის საკრებულო და გამგეობაა განთავსებული, საშვთა სისტემა შემოიღეს. გაზეთ “ჩემი ხარაგაულის” რედაქტორის ლაურა გოგოლაძის ინფორმაციით, ჟურნალისტურ საქმიანობაში რომ ხელი არ შეშლოდათ, საკრებულოს თავმჯდომარეს მიმართეს თხოვნით, სამ ჟურნალისტზე გაცემულიყო აკრედიტაცია. საკრებულომ კი მხოლოდ საჯარო სხდომებზე დასწრების უფლებით ერთ ჟურნალისტს, რედაქტორს ლაურა გოგოლაძეს გაუფორმა საშვი.
ლაურა გოგოლაძე სვამს კითხვას: რა ქნან დანარჩენმა ჟურნალისტებმა?
არადა, საჯარო სხდომებზე თავისუფლად შესვლის უფლება არათუ ჟურნალისტს, ნებისმიერ მოქალაქეს აქვს კანონით მინიჭებული (?!).
_ გვირჩიეთ, რა ვქნათ, რა გზას დავადგეთ. 28 ივნისს მეზობელ რაიონს, ზესტაფონს ვეწვიეთ და ვნახეთ, რომ იქ ასეთი წესები დადგენილი არ არის და ჟურნალისტები თავისუფლად საქმიანობენ, _ ამბობს “გურია ნიუსთან” ლაურა გოგოლაძე.
ლაურა გოგოლაძე: საშვთა სისტემა არის იქ, სადაც ხელისუფლება თავისი გავლენის ქვეშ ვერ აქცევს მედიას და თვითონაც არ ჰყოფნის კომპეტენცია ჩვენთან სათანამშრომლოდ. მკითხველი ტენდენციურობას არასოდეს გაპატიებს. ჩვენ ამ გზას არ ვადგავართ. სასაცილოა, როცა საკრებულო მხოლოდ მე მაძლევს საშვს, რომელსაც უკან აწერია, რომ მხოლოდ სხდომებზე შესვლის უფლება მაქვს”
ასეთი “წყალობის” იმედად, რასაკვირველია, ვერც ლაურა გოგოლაძე და ვერც სხვა ჟურნალისტები ვერ იქნებიან.
აღსანიშნავია, რომ საშვთა სისტემა ჩოხატაურსა და ოზურგეთში საკრებულოს თავმჯდომარეების ბრძანებებით (ჩოხატაურში #55, ოზურგეთში _ #52) იქნა შემოღებული. თუმცა, ბრძანებები კანონის დარღვევით იყო გამოცემული. ამის გამო, ”გურია ნიუსმა” ჯერ კიდევ აპრილს თვეში შეიტანა ოზურგეთის სასამართლოში სარჩელი და ჩოხატაურისა და ოზურგეთის საკრებულოს თავმჯდომარეების მიერ ზემოთ აღნიშნული ბრძანებების გაუქმება მოითხოვა.
