პარლამენტის დღევანდელი სხდომა მუშაობას „საქართველოს 2017 წლის სახელმწიფო ბიუჯეტის შესახებ“ საქართველოს კანონის პროექტის თანმდევი კანონპროექტების მეორე მოსმენით განხილვით შეუდგა.
წარმოდგენილი პროექტების მიხედვით, ცვლილებები შედის საგადასახადო და საბიუჯეტო კოდექსებში, სათამაშო ბიზნესის მოსაკრებლის შესახებ კანონსა და ორგანულ კანონში „ადგილობრივი თვითმმართველობის კოდექსი“.
კანონპროექტები ფინანსთა მინისტრის მოადგილეებმა ლაშა ხუციშვილმა და გიორგი კაკაურიძემ წარადგინეს. მათი განცხადებით, კანონპროექტების პლენარულ სხდომაზე პირველი მოსმენით განხილვისას გამოთქმული შენიშვნები და წინადადებები, ძირითადად, გათვალისწინებულია.
პარლამენტმა ასევე მეორე მოსმენით, მუხლობრივად განიხილა პარლამენტის წევრების ეკა ბესელიასა და გიორგი კახიანის საკანონმდებლო ინიციატივა – ორგანული კანონის პროექტი „საქართველოს ეროვნული ბანკის შესახებ“ საქართველოს ორგანულ კანონში ცვლილების შეტანის თაობაზე“. კანონპროექტი პლენარულ სხდომაზე პარლამენტის წევრმა გიორგი კახიანმა წარადგინა. კანონპროექტის მიხედვით, „საქართველოს ეროვნული ბანკის შესახებ“ კანონი კონსტიტუციასთან შესაბამისობაში მოდის. საფინანსო-საბიუჯეტო კომიტეტის თავმჯდომარის ირაკლი კოვზანაძის განცხადებით, კანონპროექტს კომიტეტისგან სრული მხარდაჭერა აქვს.
პლენარულ სხდომაზე მეორე მოსმენით განიხილეს ასევე დაჩქარებული წესით განსახილველ კანონპროექტთა პაკეტი, რომელიც განათლების საკითხს მოიცავს. ამ პაკეტის მიხედვით, ცვლილებები შედის ზოგადი განათლების, გრანტების, უმაღლესი განათლებისა და მეცნიერების, ტექნოლოგიებისა და მათი განვითარების შესახებ კანონებში. განათლების, მეცნიერებისა და კულტურის კომიტეტის თავმჯდომარის, მარიამ ჯაშის განცხადებით, კანონპროექტების ზოგიერთ მუხლთან დაკავშირებით კომიტეტში განხილვისას გამოთქმული შენიშვნები შეჯერებული და მხარდაჭერილია.
ამის შემდეგ, პარლამენტმა კენჭი უყარა მეორე მოსმენით განხილულ კანონპროექტებს და მხარი დაუჭირა.
საქართველოს პრეზიდენტის საპარლამენტო მდივანმა ანა დოლიძემ პარლამენტს წარუდგინა პარლამენტის დადგენილების პროექტი – „საქართველოს სამხედრო ძალების რაოდენობის დამტკიცების შესახებ“. მისი განცხადებით, 2017 წლისთვის სამხედრო ძალების რაოდენობა არ იცვლება და რჩება იმდენივე, რამდენიც იყო 2016 წელს – ანუ არაუმეტეს 37 ათასი კაცისა. აღნიშნული შეზღუდვა არ გავრცელდება საომარი მდგომარეობის დროს, აგრეთვე სამხედრო ძალების სარეზერვო სამსახურში გასაწვევი პირების რაოდენობასა და თავდაცვის სამინისტროში არსებულ დროებით შტატებზე.
პარლამენტის წევრმა რომან კაკულიამ პარლამენტს პირველი მოსმენით განსახილველად წარუდგინა კანონპროექტი – „საქართველოს საგადასახადო კოდექსში ცვლილების შეტანის შესახებ“. ამ ინიციატივის მიხედვით, კანონპროექტის ძირითადი არსი ისაა, რომ ერთობლივ შემოსავლად არ ჩაითვალოს მეწარმეობის განვითარების სააგენტოს მიერ „აწარმოე საქართველოში“ სახელმწიფო პროგრამის დამტკიცების შესახებ“ მთავრობის დადგენილებით დამტკიცებული სახელმწიფო პროგრამის „აწარმოე საქართველოში“ მიკრო და მცირე მეწარმეობის ნაწილის ფარგლებში მეწარმე სუბიექტებზე გაცემული თანადაფინანსების სახსრები.
შესაბამისად, ბენეფიციარისთვის გათვალისწინებული თანადაფინანსების თანხების 20%-ით დაბეგვრა ისევე არ მოხდება, როგორც ფიზიკური პირის შემთხვევაში. დეპუტატის აზრით, ამ კანონპროექტის მიღება პროგრამის წარმატებულ და ეფექტურ განხორციელებას შეუწყობს ხელს.
კანონმდებლებმა მეორე მოსმენით განიხილეს „შეტყობინებების პროცედურების შესახებ ბავშვის უფლებების შესახებ კონვენციის“ დამატებითი ოქმიდან გამომდინარე კანონპროექტები: „საქართველოს სისხლის სამართლის საპროცესო კოდექსში ცვლილების შეტანის შესახებ“, „საქართველოს სამოქალაქო საპროცესო კოდექსში ცვლილების შეტანის შესახებ“ და „საქართველოს ადმინისტრაციულ საპროცესო კოდექსში ცვლილების შეტანის შესახებ“.
კანონპროექტები პარლამენტს მთავრობის საპარლამენტო მდივანმა შალვა თადუმაძემ წარუდგინა. პროექტის მიხედვით, იცვლება როგორც ახლად გამოვლენილ გარემოებათა გამო განაჩენის გადასინჯვის ერთ-ერთი საფუძველი, ასევე კანონიერ ძალაში შესული გადაწყვეტილების ახლად აღმოჩენილ გარემოებათა გამო საქმის წარმოების განახლების მოთხოვნით გასაჩივრების ერთ-ერთი საფუძველი. იურიდიულ საკითხთა კომიტეტის თავმჯდომარის, ეკა ბესელიას განცხადებით, ამ კანონპროექტების მიღება მნიშვნელოვანია იმდენად, რამდენადაც ჩვენი კანონმდებლობა ბავშვის უფლებების დაცვის კუთხით საერთაშორისო სტანდარტების შესაბამისი ხდება.
პარლამენტმა ზოგადი პრინციპების დონეზე, პირველი მოსმენით, განიხილა შრომის, ჯანმრთელობისა და სოციალური დაცვის მინისტრის მოადგილის, ნინო ბერძულის მიერ წარმოდგენილი კანონპროექტი „საექიმო საქმიანობის შესახებ“ საქართველოს კანონში ცვლილების შეტანის თაობაზე“. პროექტის შესაბამისად, პროფესიული რეგულირების საბჭოს ნაცვლად, შემოდის პროფესიული განვითარების საბჭოს ცნება, რომელიც სახელმწიფო სერტიფიკატის მიმნიჭებელი საბჭოს და დიპლომისშემდგომი განათლებისა და უწყვეტი პროფესიული განვითარების საბჭოს უფლებამონაცვლეს წარმოადგენს. ამასთან, დგინდება შესაბამის პირთა სახელმწიფო სასერტიფიკაციო გამოცდაზე დაშვების გარდამავალი რეგულირება.
კანონმდებლებმა ასევე განიხილეს პარლამენტის დადგენილების პროექტი „2017-2019 წლების ფულად-საკრედიტო და სავალუტო პოლიტიკის ძირითადი მიმართულებების შესახებ“. ამ საკითხზე მოხსენება გააკეთა საქართველოს ეროვნული ბანკის პრეზიდენტმა კობა გვენეტაძემ. 2017 წლისათვის ინფლაციის მიზნობრივი მაჩვენებელი 4%-ს შეადგენს, 2018-2019 წლებისათვის კი – 3%-ს. კობა გვენეტაძემ პარლამენტართა კითხვებსაც უპასუხა.
თანამომხსენებელმა, საფინანსო-საბიუჯეტო კომიტეტის თავმჯდომარემ ირაკლი კოვზანაძემ განსახილველ საკითხთან დაკავშირებით, პარლამენტს წარუდგინა შენიშვნები და წინადადებები და იმედი გამოთქვა, რომ მათ გაითვალისწინებენ საქართველოს პარლამენტის და ეროვნული ბანკის შემდგომი ურთიერთობის პროცესში.
მისი თქმით, საქართველოს პარლამენტში განხილვები ხშირ შემთხვევაში ფორმალურ ხასიათს ატარებდა და რაც დამაკმაყოფილებელი იყო გუშინ, დღეს უკვე არადამაკმაყოფილებელია.
მისი განცხადებით, სასურველია, რომ სამომავლოდ ფულად-საკრედიტო და სავალუტო პოლიტიკის ძირითადი მიმართულებების წარმოდგენილ ერთგვერდიან დოკუმენტს ეროვნულმა ბანკმა დაურთოს ანალიტიკური მასალა, გათვლები, საკუთარი ხედვა, არგუმენტაცია, პოზიცია სხვადასხვა მიმართულებით, რაც დეპუტატებს საკითხის უკეთესად გარკვევის საშუალებას მისცემს. მან კოლეგებს მოუწოდა, ასეთი დათქმებით დაუჭირონ წარმოდგენილ დოკუმენტს მხარი.
