გარდაცვლილი პატიმრის ოჯახს, სამინისტროს ვერსიის არ სჯერა

_ როცა სახლში მოვასვენეთ, გარდაცვლილს თეთრი ფერი ჰქონდა, რაც, როგორც წესი, გულით გარდაცვლილებს არ ახასიათებთ. რამდენიმე წუთში, დავუკავშირდით უბნის ინსპექტორს და მოსვლა ვთხოვეთ, თუმცა, არ მოვიდა. თუ რამე გნებავთ, პოლიციაში მოდით და განცხადება დაწერეთო, _ ამბობს “გურია ნიუსთან” საუბრისას გარდაცვლილის ბიძა, ლევან ბაზაზიანი.

იგი იხსენებს, რომ 5 ივნისს, დაახლოებით 7 საათზე, რუსთავის საპატრულო პოლიციიდან მოაკითხეს:

_ ეზოში ვიდექი, როცა პოლიცია მოვიდა. მანამდე დამირეკეს და მითხრეს, რომ ჩემი ნახვა უნდოდათ. მანქანაში ჩამსვეს და პოლიციაში წამიყვანეს. იქ მეკითხებოდნენ, ჰყავდა თუ არა ოჯახის წევრები მიხეილს _ რამდენი დედმაშვილის ჰყავდა, ვინ იყო მისი პატრონი. ავუხსენი, რომ მამა ადრე გარდაეცვალა. ჰყავდა 4 დედმამიშვილი და დედა. ამის შემდეგ ისე გამომიშვეს, რომ არაფერი უთქვამთ, _ ამბობს ლევან ბაზაზიანი.

იმავე დღეს, ღამის 12 საათზე კი გარდაცვლილის მამიდას, ლელა ბაზაზიანს, რომელთანაც მიხეილ ბაზაზიანი იზრდებოდა,  ტელეფონით სასჯელაღსრულების დეპარტამენტიდან დაუკავშირდნენ და უთხრეს, რომ მიხეილი გარდაიცვალა:

_ დამირეკეს და მითხრეს, რომ ციხის საავადმყოფოში გულის შეტევის შედეგად გარდაიცვალა. მითხრეს ისიც, რომ რადგან პატარა ბიჭი იყო, სასახლის, მანქანით სახლამდე ჩამოსვენების და ექსპერტიზის ხარჯებს თავად გაიღებდნენ, _ გვითხრა ლელა ბაზაზიანმა.

6 ივნისს, გვამის წამოსასვენებლად ჩასულ ბიძას, ციხის ადმინისიტრაციამ გარდაცვალების დოკუმენტის მიცემაზე უარი უთხრა და ორთაჭალაში, საგამოძიებო დეპარტამენტში გააგზავნა. დეპარტამენტიდან ლევან ბაზაზიანი იუსტიციის სამინისტროში გადაამისამართეს, სადაც უთხრეს, რომ თუ საბუთები მზად იქნებოდა, ორშაბათს მისცემდნენ.

ლევან ბაზაზიანი ამბობს, რომ რუსთავში, გარდაცვლილი ისე ჩამოასვენა, რომ გარდაცვალების დოკუმენტი არ ჰქონია. ოჯახი ეჭვობს, რომ სამინისტროს ინფორმაცია სიმართლეს არ შეესაბამება. ამ ეჭვებს მამიდას ისიც უმყარებს, რომ 6 ივლისს, ქსნის საპატიმროს პატიმრები, სადაც მიხეილ ბაზაზიანი სასჯელს იხდიდა, თითქმის მთელი დღის განმავლობაში, ერთმანეთის ანალოგიური ტექსტით ურეკავდნენ:

_ მიშას გარდაცვალების ამბავი ახალი გაგებული მქონდა, ქსნის საპატიმროდან ტელეფონზე დარეკვა რომ დაიწყეს. მეუბნებოდნენ, მიშიკო 5 ივლისს, 1 საათისთვის, ტუალეტში ცუდად გახდა, რაც ციხის ადმინისტრაციას შეატყობინეს და შემდეგ მოხდა მისი საავადმყოფოში გადაყვანაო. იმდენად ხშირად და გამალებით რეკავდნენ ერთი და იგივე ტექსტით, რომ შევწუხდი. ვკითხე კიდეც, გავალებენ რომ დამირეკოთ, თუ რა ხდება,-მეთქი. დამიდასტურეს, რომ მათ ჩემთან დარეკვა და ამ ამბავის მოყოლა დაავალეს. მეტს ვერაფერს გეტყვითო, დასძინეს, _ ამბობს ლელა ბაზაზიანი “გურია ნიუსთან” საუბრისას.

აღსანიშნავია, რომ გვამს, გარეგნული დათვალიერების შედეგად დაზიანებები აღენიშნება.