ექსპერტის განცხადებით, გარდაცვლილ პატიმარს წამების კვალი არ აღენიშნება

_ ბატონო ალეკო, რა იყო გარეგანი დათვალიერების მიზანი?

_ გარეგანი დათვალიერების მიზანი იყო, დაგვეფიქსირებინა იყო თუ არა სხეულზე რამე ფიზიკური დაზიანება. ძალადობის კვალი და ა.შ. თუ იყო _ რა ხანდაზმულობის, ექნებოდა თუ არა ამ დაზიანებებს მიზეზ-შედეგობრივ დამოკიდებულებაში დამდგარ შედეგთან – სიკვდილთან.

_ რა ნახეთ გარეგანი დათვალიერებით?

_ სხეულის გარეგანი დათვალიერებით, ლუპის ქვეშ, რამე სიცოცხლისთვის სახიფათო ან მიზეზთან მიზეზ-შედეგობრივ დამოკიდებულებაში მყოფი გარეგანი დაზიანება მე ვერ ვნახე. ერთადერთი, გარეგანი დათვალიერებით, ვნახეთ ცხვირის ზურგზე მოწითალო სუსტი მოლურჯო ელფერის დაზიანება სისხლნაჟღენთის სახით და ასევე ნაჭდევი მარცხენა ხელის მტევნის ზურგის ზედაპირზე.

ეს დაზიანებები ხანდაზმულობით განვითარებული არის სიკვდილამდე ახლო დროის პერიოდში. კონკრეტულად, განვითარებულია ორივე რაიმე მკვრივი ბლაგვი საგნის მოქმედებით და არ არის გამორიცხული შესაძლო ასეთ მკვრივ ბლაგვ საგანზე დაცემითაც.

იმის გამიჯვნა, მკვრივი ბლაგვი საგანი ცხვირში ჩაარტყეს, მოხვდა თუ დაეცა და მაშინ მიიღო ეს დაზიანებები, არის საგამოძიებო ორგანოების გამოკვლევის და ძიების პრეროგატივა. მე, როგორც სპეციალისტი, ვაფიქსირებ მხოლოდ დაზიანების ფაქტს, მათ ხასიათს, ხანდაზმულობას და ლეტალიზაციას. კიდევ ვიმეორებ, სულ ჰქონდა ორად ორი დაზიანება.

გარეგანი დაზიანებებიდან გამომდინარე, საუბარი იმაზე, რომ აქ ადგილი ჰქონდა ცემას, წამებას და ა. შ. საფუძველს მოკლებულად მიმაჩნია. მაგრამ ანგარიშგასაწევია შემდეგი გარემოება: ჭირისუფლების, ნათესავების გადმოცემით, ისინი დაუკავშირდნენ პატიმარს დაახლოებით ორი თვის წინ. ორი თვის წინ პატიმარმა გამოთქვა ჩივილები იმ მხრივ, რომ მას ჰქონდა ფილტვების ანთება, მკურნალობდნენ ქსნის დაწესებულების სამედიცინო ნაწილში ფილტვების ანთების გამო. ნათესავები გარდაცვალებამდე ორი კვირით ადრე, კვლავ შეეხმიანნენ მას, უთხრა, რომ მკურნალობის პროცესი მიმდინარეობს და თავს უკეთესად გრძნობს. ანუ მთლად ბოლომდე გამოჯანმრთელებული არ იყო.

გვამი გამოკვლეულია სასამართლო სამედიცინო ექსპერტიზის მიერ. დაველოდოთ სასამართლო სამედიცინო ექსპერტიზის პასუხს. გავეცნოთ იმ სამედიცინო დოკუმენტაციას, თუ რა დახმარება აღმოუჩინეს ამ ორი თვის მანძილზე, რით მკურნალობდნენ. რატომ მკურნალობდნენ, თუ იყო ადეკვატური მკურნალობა და ხომ არ გართულდა რამე გაუთვალისწინებელი პრობლემატიკით და ამიტომ დადგა სიკვდილი. თუ ადგილი ჰქონდა არაჯეროვან სამკურნალო ღონისძიების ჩატარებას, ეს ყველაფერი გამოჩნდება მას შემდეგ, როდესაც ჩვენ ხელთ გვექნება სახელმწიფოს საექსპერტო დაწესებულების მიერ გაცემული გვამის გამოკვლევის დეტალური მონაცემები.

_ გვამს გარეგნული დათვალიერებით აღენიშნება ჭრილობები თავის არეში, კისრის არეში…

_ გვამს აღენიშნება ორივე მხრების წინა ზედაპირებზე უწყვეტი გვამური ნაკერით ნაკერი ჭრილობა, რომელიც მიედინება მარცხნიდან მარჯვნივ და მარჯვნიდან მარცხნივ, ერთდებიან სადღაც ეპიგასტრიუმის არეში, ვგულისხმობ მუცლის წინა ზედაპირს. ამის მერე, ერთიანი უწყვეტი გვამურად გაკერილი ჭრილობა მთავრდება ბოქვენთან.

სამივე ჭრილობა, გულმკერდზე, მუცელზე და ბოქვენის არეში ლოკალიზებული, არის სექციის კვალი ანუ გვამის სასამართლო მედიკური გამოკვლევის შედეგად დარჩენილი კვალი და ეს სავსებით ნორმალურია. მაგრამ, ერთი უწყვეტი გვამური ნაკერით ასევე გაკერილი ჭრილობაა კისრის წინა ზედაპირზე ქვემო მესამედში. შესაბამისად, ეს ჭრილობა ბუნებრივია სექციის, ანუ გვამის გამოკვლევისას არ არის განვითარებული… ეს ჭრილობა, მაღალი ალბათობით შესაძლებელია თუ კი ის უცბად დამძიმდა, საჭირო გახდა სასწრაფო სამედიცინო დახმარების ბრიგადის მიერ მისი სწრაფი გადაყვანა ქსნის დაწესებულებიდან #18 დაწესებულებაში, მანქანით ტრანსპორტირების დროს განვითარდა სუნთქვის მწვავე უკმარისობა და ამის გამო მოხდა ტრაქეოსტომიული მილის ჩადება ან მილის ჩადების მცდელობა. აქედან გამომდინარე, ჭრილობა გაკერილი უწყვეტი გვამური ნაკერით კისრის არეში შეიძლება განვითარებული იყოს და მაღალი ალბათობით მიმაჩნია ტრაქეოსტომიული მილის ჩადების მცდელობის დროს. თუმცაღა, მე კატეგორიულად ვერცერთ სხვა ვერსიას ვერ გამოვრიცხავ, რამეთუ ჭრილობა არის გაკერილი, დამუშავებული და მისი მორფოლოგიური საწყისი სურათი წაშლილია.

_ თავის არეშიც არის ჭრილობა…

_ ანალოგიურად. ეს არის უწვეტი გვამური ნაკერით გაკერილი ჭრილობა. ეს არის შედეგი იმისა რომ, გვამის გამოკვლევის დროს, როგორც წესი, გამოკვლეული უნდა იყოს სამი ღრუ: თავის ქალას ღრუ, მუცლის და გულ-მკერდის ღრუ. ანუ ეს ჭრილობები არ არის დაზიანებები. ეს ჭრილობები არის სექციის, ანუ გვამის გამოკვლევის შედეგი.

_ რა გახდა სიკვდილის მიზეზი?

_ ბუნებრივია, გარეგანი დათვალიერებით ჩვენ სიკვდილის მიზეზზე ვერ ვიმსჯელებთ. რადგან გვამი ჩემს მიერ გამოკვლეული არ არის.

ჭირისუფლის თქმით, მათ 5 ივლისს, დაახლოებით ღამის 12 საათზე, დაუკავშირდნენ #18 დაწესებულებიდან, სამედიცინო დაწესებულების პერსონალად გაეცნენ და უთხრეს: გარდაიცვალა ეს და ეს პატიმარი, გაიკვეთა სასამართლო სამედიცინო ექსპერტიზის კუთხით. შეგიძლიათ წაიყვანოთ მიცვალებული სახლში; ხოლო საექსპერტო დაწესებულების და ჩვენი ვერსიით და ვარაუდით, სიკვდილის მიზეზი გული არისო. გულია სიკვდილის მიზეზი თუ ფილტვების ანთებით განვითარებული რამე გართულება ან სხვა რამე, ამაზე გარეგანი დათვალიერებით მსჯელობა შეუძლებელია.

ჩვენ, დამოუკიდებელი სასამართლო ექსპერტიზა “ემპათია”, ცენტრი “ვექტორი” მზად ვართ ვითანამშრომლოთ სახელმწიფო საექსპერტო დაწესებულებასთან თუ მათ და ჭირისუფალს სურვილი იქნება, ერთად გადავწყვიტოთ სამომავლოდ, რისგან დაიღუპა კაცი _ არაჯეროვანი მკურნალობის თუ რამე გართულებების ფონზე, რომელიც ავადმყოფობის დროს ვითარდება, _ ამბობს ალეკო გეჯაძე.