გავრცელებული ინფორმაციით, ოზურგეთის მუნიციპალიტეტის სოფელ ნატანებში, საქმის გარჩევა, ე.წ. „რაზბორკა“, ახლი წლის წინა დღეებში მოხდა.
სოფელ წვერმაღალაში, ციტრუსოვანთა ბაღებში მომუშავე მუშების ჯგუფსა და დავით სიხარულიძეს შორის, რომელიც ოზურგეთის მუნიციპალიტეტის საკრებულოს დეპუტატია სოფელ ნატანებიდან და ამავე დროს ხელმძღვანელობს სოფელ ნატანების „სუბტროპიკული ხილის კომპანიას“, დაპირისპირება ნამუშევარი თანხის გადახდის დაგვიანების გამო დაიწყო.
"გურია ნიუსის" წყაროს ინფორმაციით, დავით სიხარულიძის კუთვნილ ციტრუსოვანთა პლანტაციაში, რომელიც წვერმაღალაში მდებარებს, მუშებმა (წყაროს თქმით, ეს არის აჭარის და სვანეთის მთიანეთიდან ჩამოსული ადამიანების ჯგუფი, რომლებიც აქ ხშირად სეზონურად მუშაობენ) კუთვნილი ნამუშევარის ანაზღაურება მოითხოვეს. წყაროსავე მტკიცებით, რაკი ნამუშევარის დროულად ანაზღაურება ვერ მოახერხა სიხარულიძემ, შეხლა-შემოხლაც სწორედ ამის გამო დაიწყო. თავდაპირველად, სიხარულიძის „მოწინააღმდეგეებმა“ სცემეს მისი თანამშრომელი ილია თავაძე (რომელიც გასულ წლებში ნატანების გამგებელი იყო). შემდეგ თავაძის "მომხრეებმა“ სცემეს „მომხდურები“, რაც, საბოლოოდ, იმით დასრულდა, რომ სიხარულიძის პლანტაციაში, წვერმაღალაში, „ვიღაცეებმა“ დაწვეს ფართობში, შესვენების თუ უამინდობის დროს თავშესაფრად სახელდახელოდ ჩადგმული სახლი.
ჩვენი წყაროს მიერ მოწოდებულ ამ ინფორმაციას არ ადასტურებს თვითონ დავით სიხარულიძე.
დავით სიხარულიძე აღნიშნულ ფაქტს "გურია ნიუსთან" ჭორს უწოდებს.
_ რას ამბობთ, ეს ჭორია. სადღაც ტყეში მთვრალმა დარაჯმა დაანთო ღუმელი და მიუხედავად იმისა, რომ ბრიგადირმა გააფრთხილა, მთვრალი იყო და არ დაემორჩილა. გაჩნდა ხანძარი, მოედო შიფერსაც. დარეკა ბრიგადირმა სახანძროში, მოვიდნენ და ჩააქრეს. სულ ეს იყო.
_ ბრიგადირი კიდევ გყავთ?
_ კი და მან დარეკა სახანძროში. ჩააქრეს ცეცხლი. დარაჯი იყო მთვრალი, ვერ მოუარა დანთებულ ცეცხლს.
_ ეს საგუშაგო სახლი და პლანტაციის ფართობი თქვენია?
_ სახლი არაა, ეს არის უბრალო ფიცრული, თავშესაფარი. არაა ჩემი, ჩემი მეგობრისაა, ახლობლის. მე ყოველთვის არ ვარ აქეთ. არც მაშინ ვიყავი, როცა ხანძარი გაჩნდა. თუმცა, ეს დარაჯის სიმთვრალით მოხდა. თქვენ კი ჭორის დონეზე არ უნდა ისაუბროთ.
_ ჩვენი წყაროს თქმით, იმ ადამიანებმა დარეკეს და მოიბოდიშეს კიდეც, გითხრეს ეს ცუდი საქმე ვქენით, არ უნდა წაგვეკიდებინა ცეცხლი, "ცხელ გულზე" მოხდაო.
_ გეუბნებით, ეს არის ჭორის დონეზე საუბარი. თქვენ იცით, რა უნდა დაწეროთ? ჩვენი წარმოება რომ მუშაობს, ჩავიბარეთ 2500 ტონა მანდარინი მოსახლეობისგან, გადავიხადეთ თანხა და მოვახდინეთ ექსპორტი. აი, ასეთ საქმეებზე უნდა დაწეროთ!
_ "გურია ნიუსი“ წერდა თქვენი "სუბტროპიკული ხილის კომპანიის" მუშაობის შესახებ, შპს "კიდობანის“ მიერ დამზადებულ მანდარინის ყუთებზეც, რომელმაც ხალხის მოწონება დაიმსახურა…
_ ჰო, ასეთ რაღაცეებზე უნდა წეროთ და არა ჭორებზე, _ მიგვითითა სიხარულიძემ.
კითხვაზე, თუ რატომ უკავშირებენ ასეთ „ჭორებს“ მას, რომლის მსგავს ფაქტს გასულ წელს, სხვა დროსაც ჰქონდა ადგილი, დავით სიხარულიძემ გვიპასუხა:
_ ეს იმიტომ ხდება, რომ აქ, დასავლეთ ზოლში რახან მე ვმუშაობ, ყველაფერს მე მიკავშირებენ და ჭორაობენ. რამდენი აბდალი იქნება და მთვრალი ტყეში ცეცხლს გააჩენს, მე რა ვუყო? რა ვქნა მე? ასეა ეს ამბავი, _ გვითხრა მან.
