იუსტიციის მინისტრის მოადგილე ალექსანდრე ბარამიძე, რომლის კანდიდატურაც სტრასბურგში მოსამართლედ იყო წარდგენილი, თუმცა ვერ გავიდა, მის მიმართ გამოთქმულ ბრალდებებზე განმარტებებს აკეთებს:
"მინდა პასუხი გავცე გარკვეული პოლიტიკოსების, არასამთავრობო ორგანიზაციების წარმომადგენლების და სხვათა განცხადებებს იმის თაობაზე, რომ მე თურმე „დამიწუნეს არაკომპეტენტურობის და არაკვალიფიცურობის გამო“.
მინდა შევახსენო ყველას, რომ სამთავრობო კომისიამ, რომელშიც სახელისუფლო შტოების წარმომადგენლებთან ერთად სახალხო დამცველი, ადვოკატთა ასოციაციის თავმჯდომარე, არასამთავრობო ორგანიზაციების კოალიციის წარმომადგენელი და თბილისის სახელმწიფო უნივერსიტეტის იურიდიული ფაკულტეტის დეკანი შედიოდნენ, მე შემარჩია ერთ-ერთ იმ თავდაპირველ ხუთ კანდიდატს შორის, რომლებიც, შემდგომში, სამი კანდიდატის შესარჩევად მთავრობას წარედგინა.
კომისიის 11 წევრიდან რვამ მე უმაღლესი ქულით – 5-იანით შემაფასა. მხოლოდ სამმა წევრმა მომცა მაქსიმუმზე ნაკლები შეფასება. კერძოდ, კომისიის წევრმა უზენაესი სასამართლოს მოსამართლემ მომცა შეფასება 4.5, სახალხო დამცველმა – 4, არასამთავრობო ორგანიზაციების კოალიციის წარმომადგენელმა – 3. ამ ქულების საშუალო არითმეტიკულმა შეადგინა 4.68 ქულა, რომელიც ყველაზე მაღალი საშუალო მაჩვენებელი იყო სხვა კანდიდატებთან შედარებით.
ამის შემდეგ მთავრობამ შეარჩია 3 კანდიდატურა, რომელთა მონაცემები გადაეგზავნა ევროპის საბჭოს მრჩეველთა საბჭოს (Advisory Panel). ამ საბჭოში შედიან საერთაშორისო მასშტაბის უმაღლესი კვალიფიკაციის ექსპერტები, მათ შორის, ადამიანის უფლებათა ევროპული სასამართლოს ყოფილი თავმჯდომარე ჟან-პოლ კოსტა, ვენეციის კომისიის ამჟამინდელი ვიცე-პრეზიდენტი კრისტოფ გრაბენვარტერი და სხვები. ჩემთვის განსაკუთრებული პატივია, რომ ამ საბჭომ ევროპული სასამართლოს მოსამართლისთვის საჭირო პროფესიული კვალიფიკაციისა და ზნეობრივი მოთხოვნებისთვის შესაფერის კანდიდატად მიმიჩნია.
რაც შეეხება ევროსაჭოს საპარლამენტო ასამბლეას და მის კომიტეტებს, მათ შორის, ევროპული სასამართლოს მოსამართლეთა შერჩევის კომიტეტს, ეს ორგანოები პოლიტიკოსებისგან შედგება. თითოეულ მათგანს თავისი პოლიტიკური შეხედულებები, პოლიტიკური აფილიაცია, პოლიტიკური სიმპათია-ანტიპათიები და სხვა ამგვარი გააჩნია. მე არ ვიცი, ვინ რითი იხელმძღვანელა, მაგრამ ჩემთვის ახლა ამას არავითარი მნიშვნელობა არა აქვს. არცერთი თანამდებობა, მათ შორის, არც სტრასბურგის სასამართლოს მოსამართლის თანამდებობა, ჩემთვის თვითმიზანი არ არის და არც ყოფილა. ამიტომ არ ვნანობ არაფერზე.
რაც შეეხება ე.წ. „ინტერესთა კონფლიქტს“, რომელიც თურმე მქონია, მიმითითონ ნორმატიული აქტი, რომელიც კონკურსში მონაწილეობას მიკრძალავდა და გაიხსენონ აქამდე სტრასბურგის სასამართლოს მოსამართლედ წარდგენილ კანდიდატებს და სულაც არჩეულ მოსამართლეებს შორის ვინმე ხომ არ იყო მსგავსი თანამდებობის პირი" _ წერს ბარამიძე ფეისბუქის საკუთარ გვერდზე.
