ერთ-ერთ კაბინეტში დგება სიები ვინ უნდა დატოვოს არხი, _ ამის შესახებ საზოგადოებრივი მაუწყებლის გადაცემა "რეალური სივრცის" ავტორმა და წამყვანმა ნინო ზაუტაშვილმა ტელეკომპანია "პირველის" პირდაპირ ეთერში განაცხადა, როგორც ზაუტაშვილმა აღნიშნა, მას აქვს ინფორმაცია, რომ გადაცემა უნდა დაუხურონ, თუმცა, დადასტურებული გადაწყვეტილება მისთვის ორშაბათს გახდება ცნობილი.
ზაუტაშვილმა ასევე აღნიშნა, რომ ტელევიზიაში უკვე საუბრობენ იმაზეც, რომ სხვა გადაცემები იხურება. რაც შეეხება გადაწყვეტილების მიმღებ პირებს, ზაუტაშვილის თქმით, ეს ხდება ტელევიზიაში და არა ტელევიზიის გარეთ.
"ტელევიზიის კაბინეტში წყდება, რა თქმა უნდა, ვერაფრით ვიტყვი რომ სადმე მიღმა წყდება. თუ ეს შესრულდება, ამას დასაბუთება დასჭირდება. რეორგანიზაციასაც აქვს თავისი წესები და კანონები და ამის მიზეზები და არგუმენტები უნდა იყოს წარმოდგენილი", _ აღნიშნა ზაუტაშვილმა.
ცნობისთვის, კოალიცია "მედიის ადვოკატირებისთვის" განცხადებით, საზოგადოებრივი მაუწყებლის მენეჯმენტმა მიიღო გადაწყვეტილება გადაცემა "რეალური სივრცის" დახურვის შესახებ. ასევე იგეგმება მაუწყებლის სხვა საზოგადოებრივ-პოლიტიკური გადაცემების დახურვა და თანამშრომლების მასობრივი დათხოვნა.
"რეალური სივრცე" თავისი არსით არის ჭეშმარიტად საზოგადოებრივი პლატფორმა, ქართულ მედია სივრცეში ერთ-ერთი წარმატებული თოქ-შოუ, რომელიც სიღრმისეულად, სხვადასხვა კუთხით განიხილავს აქტუალურ და მწვავე თემებს. ამისათვის პროექტს არა ერთი პროფესიული ჯილდო და აღიარება ერგო,
კოალიცია მიიჩნევს, რომ საზოგადოებრივი მაუწყებლის არც ერთი გადაცემა არ უნდა დაიხუროს მანამ, სანამ გადაწყვეტილების მიმღები პირები არ დაასაბუთებენ გადაცემების დახურვის გადაწყვეტილებას და არ წარმოადგენენ კონკრეტულ სამაუწყებლო ბადეს თუ რას სთავაზობენ მაყურებელს სანაცვლოდ. 2017 წელს ქვეყანაში ტარდება თვითმმართველოვის არჩვნები, მიმდინარეობს საკონსტიტუციო რეფორმა. საზოგადოებრივი მაუწყებელი ამ მნიშვნელოვან პროცესებს უნდა აშუქებდეს ინტენსიურად, უწყვეტ რეჟიმში.
კოალიცია კატეგორიულად ეწინააღმდეგება პროცესების ამგვარ განვითარებას და მოუწოდებს საზოგადოებრივი მაუწყებლის სამეურვეო საბჭოს საჯარო გახადოს დაგეგმილი შეხვედრა გენერალურ დირექტორთან და სხდომის ვიდეო განათავსოს მაუწყებლის ვებგვერდზე, რომ დაინტერესებულ საზოგადოებას ჰქონდეს საშუალება გაეცნოს გენერალური დირექტორის გეგმებს", _ აღნიშნულია კოალიციის განცხადებაში რომელსაც ხელს აწერენ მასში შემავალი ორგანიზაციები: საქართველოს ახალგაზრდა იურისტთა ასოციაცია , მედიაკლუბი, საქართველოს ჟურნალისტური ეთიკის ქარტია, ინფორმაციის თავისუფლების განვითარების ინსტიტუტი, ფონდი "ღია საზოგადოება – საქართველო", საქართველოს რეგიონულ მაუწყებელთა ასოციაცია, არასამთავრობო ორგანიზაცია "სამოქალაქო საზოგადოებისათვის", ლევან მიქელაძის სახელობის ფონდი, საქართველოს რეგიონული მედიის ასოციაცია, სატელევიზიო ქსელი, საქართველოს მცირე და საშუალო სატელეკომუნიკაციო ოპერატორების ასოციაცია, მედიის მხარდაჭერის ფონდი
