გასულ წელს არჩეულმა ოზურგეთის მუნიციპალიტეტის საკრებულომ, ახალი 2011 დაწყების შემდეგ, პირველი სხდომა 20 იანვარს ჩაატარა. დღის წესრიგით 11 საკითხის განხილვა იყო გათვალისწინებული. დარბაზში თავიდან 28 მაჟორიტარი დეპუტატი აღირიცხა, საკითხების მსვლელობისას კი თანდათან გამეჩხერდნენ. თუმცა, ეს ფაქტი, ჩვენს ქვეყანაში ყურადღების გამახვილების ღირსად არც მიიჩნევა, რადგან პარლამენტშიც ასე იქცევიან დეპუტატები, არათუ საკრებულოში.
საკრებულოს თავმჯდომარე ალეკო მამეშვილი კოლეგებისადმი მისალმებითა და ახალი წლის კიდევ ერთხელ მილოცვით შემოიფარგლა და მათ დღის წესრიგი გააცნო. თერთმეტი საკითხიდან პირველზე ანუ ოზურგეთის მუნიციპალიტეტის საკრებულოს 2010 წლის 29 დეკემბრის “ოზურგეთის მუნიციპალიტეტის 2011 წლის ბიუჯეტის დამტკიცების შესახებ” დადგენილებაში ცვლილებებისა და დამატებების შეტანის შესახებ, ოზურგეთის მუნიციპალიტეტის საკრებულოს დადგენილების დამტკიცების თაობაზე, გამგეობის საფინანსო საბიუჯეტო სამსახურის უფროსმა ლია ქათამიძემ ისაუბრა.
მომდევნო საკითხებიც, ძირითადად, დამტკიცებებსა თუ ცვლილებებს შეეხებოდა და ვიდრე თითოეულის შესახებ მოისმენდნენ, სულ ერთი საათის განმავლობაში, დეპუტატებიც სათითაოდ გაიკრიფნენ დარბაზიდან. ასე თუ ისე, შესრულდა საპროცედურო მინიმუმი, რაც დარბაზში დარჩენილი დეპუტატების ხელის აწევ-დაწევით გამოიხატა საკითხების განხილვის თუ მცირე მიმოხილვის შემდეგ.
11 საკითხის ერთ საათში განხილვა და მათ ირგვლივ “კამათის მოსწრება”, ალბათ, გინესის წიგნში შესატანი, “დახვეწილი” და “უნაკლო” მუნიციპალური სისტემის შედეგად უნდა ჩავთვალოთ.
