კახეთში გუშინ მომხდარმა სტიქიამ, მთლიანად შეიწირა სასოფლო სავარგულები, განადგურებულია ვენახები, ერთწლიანი ნარგავები. ხელისუფლება გლეხებისთვის ზარალის ანაზღაურებაზე საუბრობს, თუმცა აგროდაზღევა, რომლის აუცილებლობაზეც ახალი მემარჯვენეები და ეროვნულ-დემოკრატები დიდი ხანია საუბრობენ და რომელიც სწორედ მსგავსი შემთხვევბისთვისაა გათვალისწინებული, არც ახალი პრემიერ-მინისტრის სოფლის აღორძინების პროგრამაში მოხვდა.
აგრარულ დაზღვევას დიდი ტრადიცია აქვს ამერიკასა და განსაკუთრებით ევროპულ ქვეყნებში, სადაც ეს პროგრამები სახელმწიფოს აქტიური მონაწილეობითa და სუბსიდირებით ხორციელდება . სტაბილურობის შექმნა გლეხისათვის, სოფლის მეურნეობის აღორძინების უმთავრესი კომპონენტია, აცხადებს „გურია ნიუსთან” საუბარში კალანდაძე, რომელიც ფიქრობს რომ აგროდაზღევას არა მხოლოდ ეკონომიკური, არამედ მნიშვნელოვანი სოციალური დატვირთვა აქვს .
ლევან კალანდაძე: “აგრობიზნესს დღეს სჭირდება პროტექციონისტური პოლიტიკა სახელმწიფოს მხრიდან, გასაგებია, რომ ეს არის ძალიან კაპიტალტევადი და ძალიან რისკტევადი მიმართულება. მაგრამ ამის გაკეთება აუცილებელია.გარკვეული პერიოდის შემდეგ, აგროდაზღვევა კლასიკური დაზღვევის ფორმით ჩამოყალიბდება საქართველოშიც და ფერმერსა და სადაზღევო კომპანიებს შორის დამოუკიდებელი ურთიერთობა ჩამოყალიბდება, მაგრამ საწყის ეტაპზე საჭიროა, გლეხს სახელმწიფომ გაუწიოს დახმარება , რაც შეიძლება გამოიხატებოდეს ზარალში თანამონაწილეობით ან სადაზღვევო პრემიაში თანამონაწილეობით”
სადაზღვევო კომპანიების უმრავლესობა აგროდაზღვევას რისკიან პროდუქტად თვლის და ამ სახის მომსახურებაზე უარს აცხადებს. მაგალითად სადაზღვევო ბაზრის ლიდერი “ალდაგი ბისიაი” დღემდე უარს ამბობს ამ პროდუქტზე, მაშინ როდესაც “ჯიპიაი ჰოლდინგი” არამარტო ვენახების, არამედ ხეხილის ბაღებისა და ერთწლიანი ნარგავების დაზღვევასაც კი ახდენს. აგროდაზღევას „ჯიპიაის” მთლიან სადაზღვევო პროდუქტებში ძალზე მცირე ადგილი უჭირავს, რაც ერთის მხრივ ინფორმაციის ნაკლებობით აიხსნება, მეორეს მხრივ კი სადაზღვევო ფასით. სადაზღევო კომპანია საკუთარ ვებ გვერდზე მომხმარებელს დაზღვევის თანხის გამოთვლის მეთოდსაც სთავაზობს:
“ამ კომპანიაში მოსავლის დაზღვევა ღირს სადაზღვევო თანხის 6%.
ვთქვათ, ნაკვეთის ფართობი არის 10 ჰა. ერთ ჰექტარზე დასაზღვევი მოსავალი არის 2 ტონა.
ერთი ტონა მოსავლის სადაზღვევო თანხა* განისაზღვრა 300$ ოდენობით. (* სადაზღვევო თანხა, ეს არის მაქსიმალური თანხა, რომელსაც ზარალის შემთხვევაში ჯიპიაი ჰოლდინგი აგინაზღაურებთ)
მთელი ნაკვეთის სადაზღვევო თანხა გამოითვლება შემდეგნაირად 10ჰაX2ტX300$ = 6 000 $
6 000 $ არის თანხის ის მაქსიმალური რაოდენობა, რომელსაც ზარალის შემთხვევაში ჯიპიაი ჰოლდინგი აგინაზღაურებთ.
რადგან მოსავლის დაზღვევა ღირს სადაზღვევო თანხის 6%, მაგალითში მოცემული მოსავლის დაზღვევის ღირებულება იქნება 6 000$ X 6%= 360$.”
„ჯიპიაის” კლიენტები ძირითადად ცნობილი ღვინის კომპანიები არიან, რომლებსაც ვენახები აქვთ დაზღვეული როგორც სეტყვაზე და ქარიშხალზე, ასევე გვალვაზეც.
მემარჯვენე ლევან კალანდაძე აცხადებს, რომ აგროდაზღვევაზე, სასუქსა და დიზელის საწვავზე შეღავათიანი ფასების დაწესებაზე უარის თქმით ნათლად იკვეთება ხელისუფლების პოზიცია _ მას სოფლის აღორძინება მხოლოდ დეკლარირების დონეზე სურს.კალანდაძე ვანო მერაბიშვილის მიერ წარმოდგენილ ახალ პროგარამას”message box”-ს უწოდებს, რომელსაც არაფერი აქვს საერთო არც სტრატეგიულ ხედვასთან, არც სახელმწიფოებრივ მიდგომასთან.
“სამწუხაროდ, ჩვენ არ უნდა გვქონდეს იმის მოლოდინი, რომ ხელისუფლების მესიჯები რეალური ქმედების სურვილს შეიცავს. ხელისუფლება არ იზრუნებს სოფელზე, რადგან მისი პრიორიტეტი ქართული ეკონომიკის უცხოურ პროდუქტზე დამოკიდებულებაა. აშკარაა, რომ გარკვეული მონოპოლისტური და კარტელური გარიგებების სტიმულირებით, ხელისუფლებას უცხოეთიდან შემოტანილ პროდუქტში საკუთარი ინტერესი აქვს” _ აცხადებს ლევან კალანდაძე “გურია ნიუსთან” საუბარში.
