მე პირადად დიდ პატივს ვცემ და ძალიან მიყვარს ქალბატონი თეა. ცოტა უხერხულია ჩემი მხრიდან მისი დახასიათება. ის გახლავთ კვალიფიციური იურისტი. წლების განმავლობაში მუშაობდა სტრასბურგის ადამიანის უფლებათა სასამართლოში. სადაც გაჩნდა ახალი ჩანაწერები გირგვლიანის, ასანიძისა და კუზნინის საქმესთან დაკავშირებით, რაშიც თეას დიდი წვლილი მიუძღვის.
იგი სტრასბურგში ძალიან კარგად და თბილად გრძნობდა თავს. ითვლებოდა კარგ სპეციალისტად, მაგრამ საკუთარი ნებით გადადგა, დაანება თავი სტრასბურგში მუშაობას. თეა მხოლოდ იმიტომ გადადგა, რომ აქტიური მიონაწილეობა მიეღო თავისი ქვეყნის პოლიტიკურ ცხოვრებაში. ეს უნდა დავუფასოთ. მე პირადად, ძალიან მადლიერი ვარ ამისთვის. ძალიან აქტიურია, ძალიან ბევრს გვეხმარება. შიგნით გუნდში აქვს გამორჩეული ადგილი. იურიდიულ დეპარტამენტს ხელმძღვანელობს.
მოკლედ, თეა რომ გაიმარჯვებს, ეჭვი არავის ეპარება, ჟურნალისტებსაც კი…” _ ასე შეაფასა თეა წულუკიანის აქტიური მუშაობა სტრასბურგში ბიძინა ივანიშვილმა
რამდენად კარგად იცნობს ნაძალადევის რაიონში მცხოვრებლების პრობლემებსა და აქვს თუ არა მათი მხარდაჭერის იმედი, “გურია ნიუსი” ამასთან დაკავშირებით თეა წულუკიანს ესაუბრა.
_ ქალბატონო თეა, რამდენად კარგად იცნობთ ნაძალადევის რაიონს და რამდენად გაქვთ იქ მცხოვრებლების მხარდაჭერის იმედი?
_ მე ძალიან კარგად ვიცნობ ნაძალადევის რაიონის პრობლემებს და ზოგადად თბილისის პრობლემებს, რადგან თბილისში დავიბადე და გავიზარდე. მართალია, 16 წლის ასაკიდან საფრანგეთში ვცხოვრობდი, ვსწავლობდი და ვმუშაობდი, მაგრამ ეს ხელს არ მიშლის, რადგან ვიცოდი ჩემს ქალაქში რა ხდება და ვის რა ტკივა. სწორედ ამ ტკივილის გამო დავბრუნდი. ჩემი ნებით გადავდექი იმ თანამდებობიდან, რომელიც შეიძლებოდა 65 წლის ასაკამდე მქონოდა.
ნაძალადევის რაიონში მაჟორიტარობა ჩემთვის ძალიან დიდი პატივია. იმიტომ რომ იქ ცხოვრობენ ის ადამიანები, ვისი უფლებების დაცვისთვის მე მართლა 10 წელი ვმუშაობდი სტრასბურგში. ეს გახლავთ უსამართლოდ დასჯილი ადამიანები, ვისაც ამ ხელისუფლებამ და სწორედ ამჟამინდელმა ნაძალადევის მაჟორიტარმა პატივი და ღირსება აყარა. პრაქტიკულად, არაერთი ოჯახი, რომელსაც შემთხვევით აღმოუჩნდა ოჯახის წევრი საპატიმროში, ხელისუფლებისგან არის მიტოვებული. ამჟამინდელი მაჟორიტარობის კანდიდატი, მრავალი წლის მანძილზე მრავალი პარლამენტის წევრი ყოფილა მაგრამ ერთხელ არ გამოსულა პარლამენტში ნაძალადევის მოსახლეობის და მათი უფლელების დარღვევის წინააღმდეგ. არ მაინტერესებს არანაირი ბიზნესი, არანაირი სხვა ინტერესი, გარდა ნაძალადევის რაიონში მცხოვრები ამომრჩეველის ინტერესებისა.
_ ბოლო პერიოდში, სკმაოდ ხშირად იყავით სამგრელოში. იბრძოდით იქ არსებული უსამართლობის და ადამიანის უფლებების დარღვევისთვის. როგორ ფიქრობთ დააკლდება თუ არა თქვენი ხელი სამეგრელოს?
_ არ დააკლდება. მე ჩემი შესაძლებლობების ფარგლებში, რა თქმა უნდა, იმ პროცესებს თვალს მივადევნებ და ჩავალ აუცილებლად. მომავალში შეიტყობთ ახალ ამბებს. ჩვენი კოალიციის აქტივობა სამეგრელოში გააქტიურდება, მითუმეტეს ზუგდიდში.
იქ ის ადამიანები იქნებიან, ვისაც მე დიდი ხანია გვერდში ვუდგავარ. ჩვენი კოალიციის არაერთი წევრია ზუგდიდიდან. გვყავს სენაკელები, დევნილები, ვინც სამეგრელოში ცხოვრობენ. მე მათ ბრძოლაში არ მივატოვებ, თუ დასჭირდებათ ჩემი გვერდით ყოფნა. როცა მე აქ, შტაბში, მოვიხსნი ყველა უფლებამოსილებას და აღარ ვუხელმძღვანელებ იურიდიული საკითხების სამსახურს, სამუშაოდ მთლიანად გადავდივარ ნაძალადევის რაიონში. მაგრამ თვის ბოლოს ქუთაისში უნდა წავიდე, სადაც 21 წლის ნინო ყურუას პროცესია, რომელის ვითომ ამომრჩევლის მოსყიდვის ბრალდებით არის პასუხისგებაში მიცემული. პროცესებს, რომელზე დაწყებული მქონდა მუშაობას ვერ მივატოვებ.
