(გურია ნიუსი, ლანჩხუთი) _ წინასაახალწლოდ, “საქართველოს ბანკმა” გამოაცხადა რამდენიმე კონკურსი, რომელთაგან ერთ-ერთში _ ფოტო-კონკურს გრეატესტ.ლოვე.ბოგ.გე მონაწილეობას, მთელი საქართველოს მასშტაბით, “საქართველოს ბანკის” თანამშრომლები იღებდნენ. ამ კონკურსში გამარჯვება ლანჩხუთელმა ნატო სიხარულიძემ მოიპოვა. ლანჩხუთის სერვისცენტრის თანამშრომლის მიერ გადაღებულმა ფოტომ, რომელზეც მისივე პატარა ლევანიკო ჩხაიძეა, პირველობა არავის დაუთმო. ბანკმა გამარჯვებულს 2011 ლარიანი საბავშვო ანაბარი გაუხსნა.
იმის შესახებ, თუ როგორ მოხვდა ლანჩხუთელი პატარა კონკურსში, ფოტოს ავტორი, ლევანიკოს დედა, ნატო სიხარულიძე გვესაუბრება: _ კონკურსი რომ ტარდებოდა, წინასწარ ვიცოდი. “საქართველოს ბანკის” ლანჩხუთის სერვის-ცენტრის თანამშრომელი ვარ და უფლება მქონდა, მიმეღო მონაწილეობა. კონკურსის პირობა იყო, ფოტო, რაც შეიძლება, ორიგინალური ყოფილიყო. თანაც მხოლოდ ერთი ფოტოს გაგზავნის უფლება მქონდა. საერთო ჯამში, ასზე მეტი ფოტო აღმოჩნდა კონკურსზე. ცოტა ხანში ბანკიდან დამირეკეს და მითხრეს, რომ ეს ფოტომონტაჟი იყო თუ ნამდვილად ჩემს მიერ გახლდათ გადაღებული. როცა ვუთხარი, რომ მონტაჟი არ იყო, ისევ დამიკავშირდნენ და მითხრეს, რომ 10 საუკეთესოს შორის ვიყავი.
იდეა, რომ ასეთი ფოტო გადამეღო, სრულიად შემთხვევით გამიჩნდა. ყველაფერი თავად მოვიფიქრე, თუმცა, ოჯახის წევრები და ერთი მეზობელი დამეხმარნენ. საქართველოს ბანკის ფერი ავირჩიე, თან გავითვალისწინე ისიც, რომ კურდღლის წელი მოდიოდა. რამდენიმე ფოტოდან ერთ-ერთი შევარჩიე და საიტზე დავდე.
6 იანვარს კიდევ ერთხელ დამიკავშირდნენ “საქართველოს ბანკიდან” და მითხრეს, რომ ჩემი ფოტო ხუთეულში იყო და საღამოს 6 საათისთვის საიტზე დადებდნენ, თუ ვინ გაიმარჯვებდა. ძალიან დავიძაბე, ვფიქრობდი, ჩემსავით სხვებსაც დაუკავშირდებოდნენ და ყველა გამარჯვების მოლოდინში იქნებოდა. ცოტა ხანში მირეკავენ და მეუბნებიან, რომ გაიმარჯვა ჩემმა ფოტომ. ჩემი ბიჭუნა 7 თვის არის და უკვე 2011 ლარის მოპოვება შეძლო. ეს ძალიან ლამაზი საახალწლო სიუტპრიზი აღმოჩნდა ჩემთვის, _ ამბობს ნატო სიხარულიძე.
