წინა წლებთან შედარებით, რაც ადამიანს მოხვდება თვალში, დასუფთავებული პლაჟია. როგორც ურეკის მცხოვრებლებმა გვითხრეს, მის დასასუფთავებლად სპეციალური მანქანა შეუძენია ხელისუფლებას. აქ კვლავ ნახავთ პლაჟზე ძველმანებით მოვაჭრეებს, დაზიანებულ საპირფარეშოებს… დამსვენებლებს რაც შეეხება, არც ისე ხალხმრავლობაა. ზოგი დამსვენებელს და ტურისტს ამ დღეებში ელოდება. უფრო მეტად ურეკში სომხეთიდან, აზერბაიჯანიდან, რუსეთიდან და უკრაინიდან ჩამოსულ ტურისტებს შეხვდებით.
ადგილობრივი მოსახლეობა ნაკლებად საუბრობს კამერების წინ. ერთ-ერთმა ქალბატონმა გვითხრა, რომ ცოტა ოპოზიცია ვარ და არ მინდა ახლა ვინმეს “გავეჩხირო ყელშიო.”
ადგილობრივი მცხოვრები შორენა შალამბერიძე ჩვენთან საუბრისას ამბობს: _ ხალხი არ იყო ამ დრომდე. ახლა შემოვიდნენ, ორი დღეა. ბაღად იყო ეს ნაწილი გადაქცეული და ახლა განადგურებულია, საქონლის და ცხენების სადგომია. ცოტა თუ არ შეგვიწყვეს ხელი, ბანკის ვალები გვაქვს და როგორ წავა ჩვენი საქმე, არ ვიცით. სახლები გავარემონტეთ, მეტი კომფორტი შევთავაზეთ დამსვენებლებს, მაგრამ სეზონი დაგვიანდა.
ზაქარია ჭიაურელი: _ ძვირფასი ხალხი ცხოვრობს ურეკში. მეათე სეზონია, აქ, რესტორანში ვმუშაობ, მწვადზე და ქაბაბზე. კახეთიდან ჩამოვდივარ. წინსვლა არის, მაგრამ ეს ბოლო სამი წელია, როგორც იყო, ისევ ისეა ყველაფერი. სომხეთიდან, აზერბაიჯანიდან მოდიან სტუმრები, ქართველებიც არიან.
ლიანა ჩხაიძე, ხილ-ბოსტნეულით მოვაჭრე: _ წინსვლა არის, დამსვენებლებსაც ველოდები, შევსება იქნება. იმედით ცოცხლობს ეს ხალხი. გამოცდები დასრულდა და ხალხი აწი ჩამოვა, ალბათ. იმედია, ვაჭრობაშიც გაგვიმართლებს. წყლის პრობლემა არის _ საქაჩავებიდან ვიღებთ და ბოთლებით ვეზიდებით.
სოფიკო იაღლალაშვილი, დამსვენებელი: _ კომფორტულად ვგრძნობ თავს. მატერიალური მდგომარეობა თუ გიშვებს, მით უმეტეს. მე, მაგალითად, კარგ სასტუმროში ვცხოვრობ. დაცულად ვგრძნობ თავს, სიმშვიდეა, თბილი ხალხია. ინფრასტრუქტურაზე ვიტყოდი, რომ აქ სეირნობა ცოტათი უხერხულ სიტუაციას ქმნის _ ტროტუარი არ არის ადამიანებისთვის განკუთვნილი. ძალიან მინდა ღამით გასეირნება, მაგრამ ვერ ვახერხებ, პატარა ბავშვი მყავს.
ლალი თავართქილაძე: _ რამდენიმე დღის წინ გავხდი ძალიან ცუდად. სასწრაფო გამოვიძახეთ და დღემდე ველოდებით. პოლიცია დამეხმარა. ურეკს სასწრაფო არ ჰყავს. ჩემს შემდეგ, რუსეთის მოქალაქე გახდა ცუდად, არც მაშინ მოვიდა.
მე, მაგალითად, ჩემი ქვეყნის წარმატებებს, თუნდაც წარუმატებლობებს, მაგრამ წინ მიმართულ გზას, შევადარებდი ლაბორატორიას. ლაბორატორიაში თუ გინდა რაღაცას მიაღწიო, აუცილებლად უნდა ჩაატარო ცდები. ცდა ყოველთვის წარმატებული არ არის, მაგრამ მრავალი ცდის შედეგად, ბოლოს მიზანს მიაღწევს ადამიანი. უამრავი ცდების ფონზე, ძალიან დიდი წარმატებული ნაბიჯი იდგმება ჩვენს ქვეყანაში _ ურეკში, მიუხედავად იმისა, რომ ინფრასტრუქტურა არ არის, რომ ძალიან ბევრი რაღაცა გასაკეთებელია (როგორც წლების წინ ამბობდნენ “ერთიანი ნაციონალური მოძრაობის” წარმომადგენლები. ავტ), ბევრმა ადამიანმა დაინახა, ურეკის ძალიან დიდი პოტენციალი.
_ მხარეში ჰქონდეს ორი უძვირფასესი განძი, ამას პატრონობა და მოვლა უნდა. ამ მაგნიტურ ქვიშას ღმერთი ყველას არ აძლევს, არც უნიკალურ ბახმაროს, ამის იგნორირება მინიმუმ, არის დანაშაული, _ ეს ურეკში დამსვენებელმა გვითხრა, რომელმაც ამ ეტაპზე თავი შეიკავა ვინაობის გამხელისგან, _ ურეკი არ არის ჩვეულებრივი საზღვაო კურორტი, ურეკის სამკურნალო თვისებები შეიძლება იქცეს იმ მაგნიტად, რომელიც მოიზიდავს პირველ ეტაპზე ყოფილ პოსტსაბჭოთა სივრცეს. ხუთი წელია ვუყურებ სიტუაციას _ სულ იზრდება უცხოელი დამსვენებლების რიცხვი. ურეკი აინტერესებთ, უმთავრესად მისი სამკურნალო თვისებების გამო. დამსვენებლები, ძირითადად, არიან პოსტსაბჭოთა ქვეყნების წარმომადგენლები, რომელთა მშობლების მახსოვრობაში ურეკი ამ ფუნქციით იყო სახელგანთქმული. თუ შევძლებთ და ურეკის ეს სამკურნალო თვისებები ისევ გახდება რეკლამირებადი პოსტსაბჭოთა სივრცეში, მე შემიძლია დაგარწმუნოთ, რომ პირველ ეტაპზე, მინიმუმ, ხუთი თვის განმავლობაში, ურეკი იქნება განუწყვეტლივ ფუნქციონირებადი კურორტი. ამ ეტაპზე აქვს პოტენციალი, რომ იყოს მუდმივმოქმედი კურორტი, სამკურნალო კურორტი, შემდეგ ეტაპზე, თუ ინფრასტრუქტურა დაიხვეწა და აქ სამედიცინო კლინიკები განთავსდა, ურეკს შეუძლია, მთელი წელი იმუშაოს.
რამდენად ადრე მიექცევა ყურადღება ურეკს, იმდენად ჩქარ ტემპში მოხდება ბიუჯეტის შევსება. როგორც აჭარის რეკლამირება ხდება სახელმწიფო დონეზე, ასევე კარგი იქნება მოხდეს ურეკის რეკლამირებაც. რა უშლის ხელს ამას? წელს მოვიდა ერთი დამსვენებელი, რომელმაც მამამისისგან იცოდა ამ კურორტის შესახებ. კითხვა-კითხვით მოაღწია ურეკამდე. ტრასაზე პატარა ტრაფარეტი შენიშნა და ისე მოაგნო. ესეც ერთგვარი პრობლემაა _ დიდი ტრაფარეტი უნდა იყოს. შემდეგ მან ხუთი ოჯახი ჩამოიყვანა.
ბათუმი, კვარიათი და გონიო გადაჭედილია რუსი და უკრაინელი ტურისტებით. ურეკს რაც შეეხება, დატვირთვა ნაკლებია. შარშანწინ იყო პიკი, შარშან იკლო, წელსაც ნაკლებად არის დატვირთვა ქობულეთსა და ბათუმთან შედარებით.
ურეკი ცნობილია სამკურნალო პოტენციალით, მაგრამ მოუწესრიგებელია ინფრასტრუქტურა. როგორი სამკურნალო თვისებებიც უნდა ჰქონდეს ურეკის ქვიშას, როცა კურორტზე არ იქნება კანალიზაცია, ყოველ წუთს არის შიში, რომ ინფექციური დაავადებები გავრცელდეს. გარდა ამისა, შუქი ქარის ყველა ამოვარდნაზე ითიშება, არის წყლის პრობლემაც. მართალია, ამ ბოლო დროს, დაიწყო ინფრასტრუქტურაზე საუბარი, რასაც კანალიზაციის, წყლის, გაზის და შუქის პრობლემის მოგვარება უნდა მოყვეს. მოკლედ, მთავარია რეკლამირება და კვლევა, შემდეგ კი სახელმწიფოსგან კეთილი ნება, _ გვითხრა კურორტის სპეციფიკაში ჩახედულმა პიროვნებამ, რომელიც საჯარო მოხელეა და ვინაობას ამ მოტივით არ ამხელს.
