ოლიმპიური კომიტეტის პრესსამსახურის უფროსი კახა ბერიძე “გურია ნიუსთან” საუბარში აცხადებს, რომ 2 დღის წინ, საქართველოს პრეზიდენტი მომავალი ოლიმპიადის მონაწილეებს შეხვდა და ღირსეული ჯილდო აღუთქვა, თუმცა იქ კონკრეტულ თანხაზე საუბარი არ ყოფილა
“ჩემთვის გაუგებარია, რაზე დაყრდნობით ავრცელებს ამ ინფორმაციას რადიო “თავისუფლება”. ჩვენს კომიტეტში ფულადი ჯილდოს ოდენობაზე არანაირი დოკუმენტი არ დევს.როგორც ჩანს, ეს ჟურნალისტის ვარაუდია, რომელიც ეფუძნება წინა ოლიმპიადის მონაცემებს, გახსოვთ ალბათ, მაშინ საქართველომ ოქროს მედალზე 1 მილიონი დააწესა”.
რადიო “თავისუფლების“ ევროპული ბიუროს მიერ გავრცელებული ოლიმპიური პრემიების საერთაშორისო რეიტინგის მიხედვით, ოქროს მედლის მფლობელებისთვის განკუთვნილი 1 200 000 აშშ დოლარით საქართველო ლიდერობს. 510 000 აშშ დოლარით მეორე ადგილზე აზერბაიჯანია.
ვერცხლის მედალზე საქართველოს გრაფაში 30 000 დოლარია გაწერილი, ხოლო ბრინჯაოზე – 20 000.
მეორე და მესამე კატეგორიებზე დაწესებული პრემიებით აზერბაიჯანი ლიდერობს. ვერცხლის მედალზე მას – 225 000 აშშ დოლარი, ხოლო ბრინჯაოზე 128 000 დოლარი აქვს დაწესებული. აღსანიშნავია, რომ რეიტინგში მოხვედრილ ქვეყნებს შორის, საქართველოს და აზერბაიჯანის გარდა, ოქროს მედალზე არც ერთს 250 000 დოლარზე მეტი არ აქვს დაწესებული.
ამერიკელი ოლიმპიური ჩემპიონი 25 000 დოლარს მიიღებს, რუსეთის 125 000 დოლარს, იტალიის – 172 200, უკრაინის – 100 000, ბელორუსიის – 150 000, გერმანიის კი – 18 300 აშშ დოლარს.
“გურია ნიუსის” შეკითხვას, რომელი წყაროებიდან ხდება სპორტსმენებისთვის დაწესებული ფულადი ჯილდოების დაფინანსება, ოლიმპიურ კომიტეტში პასუხი არ გასცეს.
“ეს ნამდვილად არ ვიცი, ალბათ ბიუჯეტიდან, რადგანაც სახელმწიფო პრემიაა, სახელმწიფო ბიუჯეტიდან დაფინანსდება ალბათ,” _ განაცხადა კახა ბერიძემ “გურია ნიუსთან” საუბარში.
