ორგანიზაციაში აცხადებენ, რომ საარჩევნო მონიტორებად მანდატურების გამოყენება მიუთითებს ხელისუფლების განზრახვაზე, მოახდინოს არჩევნების მონოპოლიზება და შედეგების გაყალბება.
რამდენიმე დღის წინ, ორგანიზაციას ნაცნობი მანდატურები დაუკავშირდნენ, რომლებმაც ანონიმურობის გარანტიის პირობით მათ შემდეგი ინფორმაცია მიაწოდეს: “ერთ-ერთი ავტორიტეტული ორგანიზაცია, რომელიც 2006 წლიდან აკვირდება არჩევნებს საქართველოში, დამკვირვებლებად ამზადებს 1000 მანდატურს, რომლებსაც სხვადასხვა რეგიონებში გადაანაწილებენ. გადამზადებული მანდატურების ძირითადი ნაწილი კი, თბილისის საარჩევნო უბნებზე დარჩება”.
“მანდატურებმა სამსახურის დაკარგვის შიშით, ანონიმურად დარჩენა გვთხოვეს, სამაგიეროდ მოგვაწოდეს ღირებული ინფორმაცია, რომ ადგილი აქვს ხელისუფლების მხრიდან ამ ინსტიტუტის დისკრედიტაციის მცდელობას და რაც მთავარია, ადმინისტრაციული რესურსის გამოყენებას. არჩევნებში მანდატურების გამოყენებით ხელისუფლება არღვევს საარჩევნო კოდესის 48-ე და 49-ე მუხლებს, რაც გულისხმობს არჩევნებში ადმინისტრაციული რესურსის გამოყენების აკრძალვას; ამიტომ, მივმართავთ პროკურატურას, დაინტერესდეს ამ ფაქტით,” _ განაცხადა ორგანიზაციის წარმომადგენელმა თაკო ნიბლაშვილმა.
ახალგაზრდა ადვოკატები არ აკონკრეტებენ იმ ორგანიზაციას, რომელიც მათი განცხადებით, “საიდუმლოდ თანამშრომლობს ხელისუფლებასთან და არჩევნების გაყალბებაში ეხმარება მას”.
“ჩვენ მოგეცით მინიშნებები, რომ ორგანიზაცია მდებარეობს თავისუფლების მოედანზე, არის საკრებულოსთან დაახლოებული, ცოტა ხნით ადრე შეეცვალა ხელმძღვანელობა, აკვირდება ადგილობრივ არჩევნებს და აქტიურად კურირებს სტუდენტურ თვითმმართველობებს. დანარჩენი კი თქვენ, ჟურნალისტებმა გამოიძიეთ,” _ განაცხადეს ახალგაზრდა ადვოკატებმა დღევანდელ პრესკონფერენციაზე.
“გურია ნიუსს” ამ მინიშნებების შემდეგ, რამდენიმე ვერსია ჰქონდა, თუმცა, გამორიცხვის მეთოდმა ორგანიზაციამდე “ახალი-თაობა, ახალი ინიციატივა” მიგვიყვანა და ამ “გონივრული ეჭვის” გადამოწმება ვცადეთ.
მისი ყოფილი ხელმძღვანელი, კოკი იონათამიშვილი თბილისის საკრებულოს წევრია, ორგანიზაცია კი აქტიურად მუშაობს საარჩვენო მონიტორინგის კუთხით. გარდა ამისა, იონათამიშვილის მეუღლე, ეკა ჭუმბურიძე, განათლების სამინისტროს საზოგადოებასთან ურთიერთობის ხელმძღვანელი იყო, რომელიც დიმიტრი შაშკინმა, ახლახან თავდაცვის სამინისტროში გადაიყვანა.
“2003 წლიდან, ორგანიზაცია აქტიურად მუშაობს ქვეყანაში არჩევნების მონიტორინგის კუთხით. არჩევნებზე ორგანიზაციას ჰყავს საშუალოდ 2000-კაციანი სადამკვირვებლო მისია, რომლის პრინციპია ობიექტურობა, პასუხისმგებლობა და პროფესიონალიზმი. ორგანიზაცია აქტიურად მონაწილეობს საარჩევნო სისტემასთან დაკავშირებული საკითხების განხილვაში და დიდ ყურადღებას აქცევს ამომრჩეველთა ინფორმირებულობისა და განათლების საკითხს,” _ ვკითხულობთ ორგანიზაციის ვებგვერდზე.
“გურია ნიუსი” “ახალი თაობა, ახალ-ინიციატივის” წარმომადგენელს დაუკავშირდა, რომელიც აცხადებს, რომ მართალია, ორგანიზაცია საარჩევნოდ დამკვირვებლებს ამზადებს, მაგრამ ეს პროცესი ჯერ არ დაუწყიათ. 2000-კაციან სადამკვირვებლო მისიაში კი, მათი მტკიცებით, არც ერთი მანდატური არ არის.
ანონიმური მანდატურების ინფორმაციით, საბოლოო ტრენინგი მათ სექტემბრის პირველ რიცხვებში ჩაუტარდებათ _ პროცესი სასწავლო წლის დაწყებამდე უნდა მოესწროს.
“გურია ნიუსმა” აღნიშნული ინფორმაციის გადამოწმება განათლების სამინისტროშიც სცადა, თუმცა როგორც მოსალოდენლი იყო, ჩვენი მცდელობა ამაო გამოდგა.
“გურია ნიუსი” ამ თემაზე მუშაობას აგრძელებს.
