მოპოვებული ინფორმაციის თანახმად, ამერიკის შეერთებულ შტატებში საქართველოს საელჩო საქართველოში მიმდინარე მოვლენებით დაინტერესებულ პირებს, მათ შორის, გავლენიან ამერიკელ ექსპერტებსა და მკვლევარებს, პოლიტიკური შინაარსის “იმეილებს” უგზავნის, რითაც ბიძინა ივანიშვილისა და პოლიტიკური კოალიცია “ქართული ოცნების” დისკრედიტაციას ცდილობს.
“მიგვაჩნია, რომ მსგავსი ქმედებები წარმოადგენს მმართველი პოლიტიკური პარტიის სასარგებლოდ სახელმწიფო რესურსების გამოყენებას. ერთი პარტიის ლობისტური მიზნებისთვის და შიდა პოლიტიკური მოწინააღმდეგეების სახელის გასატეხად დიპლომატიური სამსახურის გამოყენება დაუშვებელია და ასეთი ნაბიჯები დემოკრატიული ქვეყნების პრაქტიკას სრულად ეწინააღმდეგება,“-აცხადებს ეკა გიგაური “გურია ნიუსთან” საუბარში.
პოლიტიკური შინაარსის გზავნილების შესახებ “საერთაშორისო გამჭვირვალობას” ორმა ცნობილმა ამერიკელმა მკვლევარმა აცნობა. ერთ-ერთმა მათგანმა ორგანიზაციას აშშ-ში საქართველოს საელჩოს მეორე მდივნის ხათუნა ოყროშიძის მიერ გაგზავნილი ელექტრონული წერილები მიაწოდა.
პირველი წერილით ოყროშიძე გაზეთ “ასავალ-დასავალის” სტატიის თარგმანს აგზავნის, რომელშიც საქართველოში აშშ-ს ყოფილი ელჩი ჯონ ბასი უარყოფითად არის მოხსენიებული. საქართველოს საელჩოს თანამშრომელი ასევე წერს, რომ “ასავალ-დასავალი” ბიძინა ივანიშვილის საყვარელი გამოცემაა და ეს გაზეთი ქსენოფობიური შინაარსის სტატიებით გამოირჩევა. მეორე წერილით ამერიკელ ექსპერტს ოყროშიძე უგზავნის ამონარიდებს სხვადასხვა ქართული გაზეთიდან, რომლებშიც პოლიტიკური პარტიის “მრეწველობა გადაარჩენს საქართველოს” წარმომადგენლების პოზიციებია დაფიქსირებული. საელჩოს თანამშრომელი იქვე აღნიშნავს, რომ ეს პოლიტიკური პარტია კოალიცია “ქართული ოცნების” წევრი გახდა და იგი გამოირჩევა ანტიდასავლური და საქართველოს ნატოში გაწევრების საწინააღმდეგო პოზიციით, ასევე სურს ქვეყანაში ბელორუსის მსგავსი ჩაკეტილი ეკონომიკის შექმნა, რომლის მთავარი პარტნიორიც რუსეთი იქნება. კიდევ ერთი ამერიკელი მკვლევარი დაუკავშირდა “საერთაშორისო გამჭვირვალობას”, რომელმაც განაცხადა , რომ მსგავსი ტიპის ელექტრონულ წერილებს საქართველოს საელჩოსგან ისიც ხშირად იღებს
“მიგვაჩნია, რომ ასეთი ქმედებები უხეშად არღვევს ქართულ კანონმდებლობას და ეწინააღმდეგება დემოკრატიულ ქვეყნებში დამკვიდრებულ დიპლომატიურ პრაქტიკას. დიპლომატიური სამსახურის შესახებ საქართველოს კანონის მე-15 მუხლის თანახმად, “დიპლომატიურ თანამდებობაზე დანიშვნის მომენტიდან პირი წყვეტს ნებისმიერ აქტიურ პოლიტიკურ საქმიანობას. დიპლომატიურ სამსახურში მოღვაწეობის პერიოდში დიპლომატიური თანამდებობის პირი პოლიტიკურად ნეიტრალურია და არა აქვს უფლება, ეწეოდეს საქმიანობას/პროპაგანდას ნებისმიერი პოლიტიკური პარტიის, ორგანიზაციის, გაერთიანების სასარგებლოდ ან წინააღმდეგ”, _ ნათქვამია “საერთაშორისო საქართველო გამჭვირვალობის” მიერ დღეს გავრცელებულ განცხადებაში.
